ជាតិ
សង្គមជាតិ
ក្បួនខ្នាតអុជធូបរបស់ជនជាតិចិន នៅក្នុងពិធីសែនចូលឆ្នាំចិន
× ភ្នំពេញ៖ ការអុជធូបនៅពេលសែនរបស់ជនជាតិចិន ក្នុងពិធីបុណ្យចូលឆ្នាំចិន ត្រូវធ្វើឡើងតាមក្បួនខ្នាត និងទៅតាមបុគ្គលដែលគេចង់ឧទ្ទិស។ បើតាមលោក លឹម កញ្ចរ៉ុង គ្រូភាសាចិន នៅវិទ្យាស្ថានអន្តរជាតិកម្ពុជា-អាស៊ាន ជនជាតិចិនអុជធូបចំនួន៨សរសៃ សម្រាប់សែនជំនាងផ្ទះ។ គេអុជធូប៥សរសៃ នៅកន្លែងព្រះសម្មាសម្ពុទ្ធ ៣សរសៃសម្រាប់សែនជំនាងចង្ក្រាន និងគេអុជធូប១សរសៃៗ នៅសងខាងផ្ទះ ដើម្បីឧទ្ទិសដល់អ្នកតា លោកយាយ និងទេវតាដែលថែរក្សានៅក្នុងផ្ទះ។ លោក លឹម កញ្ចរ៉ុង ពន្យល់ទៀតថា ការអុជធូបនេះ ក៏ត្រូវអុជពីអ្នកដែលមានឋានៈខ្ពស់ ទៅទាប ហើយត្រូវអុជពីឆ្វេង មកស្តាំផងដែរ។
សូមទស្សនាបទសម្ភាសរវាងកញ្ញា សៅ សុខអេង នៃសារព័ត៌មានថ្មីៗ និងលោក លឹម កញ្ចរ៉ុង គ្រូបង្រៀនភាសាចិននៅវិទ្យាស្ថានអន្តរជាតិកម្ពុជា-អាស៊ាន(CAM-ASEAN)ដូចតទៅ៖
លោក លឹម កញ្ចរ៉ុង គ្រូបង្រៀនភាសាចិននៅវិទ្យាស្ថានអន្តរជាតិកម្ពុជា-អាស៊ាន បានលើកឡើងថា ការអុជធូប គឺធ្វើឲ្យទីកន្លែងសែនមានក្លិនក្រអូប មានរាសីឡើង មានសំណាង លាភ និងទ្រព្យសម្បត្តិចូលហូរហៀរ។ លោកបញ្ជាក់ថា ការអុជធូប ត្រូវតែអុជពីអ្នកដែលមានឋានៈខ្ពស់ ទៅទាប ហើយត្រូវអុជពីឆ្វេង មកស្តាំ ហើយហៅឈ្មោះបុគ្គលនោះផងដែរ។
លោក លឹម កញ្ចរ៉ុង បានបញ្ជាក់ដូច្នេះថា៖«បើមានប៉ុន្មាននាក់ ត្រូវតែអុជទៅតាមចំនួនមនុស្សហ្នឹងដូចគ្នា។ បើជើងធូបមួយហ្នឹងសែនចំពោះឪពុក យាយ ម្តាយ ម្តាយក្មេង យើងអុជជូនគាត់ម្នាក់តែមួយសរសៃបានហើយ។ យើងអាចអុជសរុបជើងធូបទាំងអស់ យើងអុជតែ៥សរសៃបានហើយ សម្រាប់អុជជារៀងរាល់ថ្ងៃសីល ឬក៏ថ្ងៃដែលយើងសែនទូទៅ សម្រាប់តំណាងឲ្យដូនតា និងកូនចៅយើងទាំងអស់»។
បើតាមលោក លឹម កញ្ចរ៉ុង ជនជាតិចិនអុជធូបចំនួន៨សរសៃ សម្រាប់សែនជំនាងផ្ទះ។ គេអុជធូប៥សរសៃ នៅកន្លែងព្រះសម្មាសម្ពុទ្ធ ៣សរសៃសម្រាប់សែនជំនាងចង្ក្រាន និងគេអុជធូប១សរសៃៗនៅសងខាងផ្ទះ ដើម្បីឧទ្ទិសដល់អ្នកតា និងទេវតាដែលថែរក្សានៅក្នុងផ្ទះ។ លោក លឹម កញ្ជរ៉ុង ពន្យល់លម្អិតដូច្នេះ៖«ដើម្បីសែនឲ្យត្រូវនឹងជំនាងផ្ទះ គេត្រូវតែអុជធូបចំនួន៨សរសៃ សម្រាប់តំណាងឲ្យទិសទាំង៨។ កាលណាគេសែនឲ្យគ្រប់ទិសទាំង៨នេះ ទៅទីណាក៏ទទួលបានសុខសាន្ត។ សម្រាប់អ្នកដែលរកស៊ី នឹងទទួលបានអតិថិជនកាន់តែច្រើន។ ចំពោះការសែនជំនាងចង្ក្រានវិញ គឺអុជតែ៣សរសៃ កន្លែងព្រះសម្មាសម្ពុទ្ធ អុជតែ៥សរសៃ ដែលតំណាងឲ្យភាពថ្គុំថ្កើង និងរុងរឿង។ សម្រាប់សែននៅព្រះភូមិ គេអុជចំនួន៣សរសៃ។ ចំណែកនៅសងខាងផ្ទះ គេអុជចំនួន១សរសៃៗ។ កាលណាគេអុជ គេត្រូវឧទ្ទិសដល់អ្នកតា លោកយាយ និងទេវតាដែលបានថែរក្សានៅក្នុងផ្ទះយើង ដោយយើងត្រូវហៅលេខផ្ទះ និងលេខផ្លូវ ដើម្បីតាមថែរក្សាផ្ទះយើង»៕
© រក្សាសិទ្ធិដោយ thmeythmey.com