អន្តរជាតិ
លោកនាយករដ្ឋមន្រ្តីថៃ ប្រាយុទ្ធ ចន្ទអូចា (ខាងឆ្វេង) ចាប់ដៃជាមួយប្រធានាធិបតីចិន ស៊ី ជិនភីង។ រូបភាព៖ Xinhua
×![]()
ដោយ: ថ្មីៗ
នៅក្នុងឆ្នាំ ២០១៩កន្លងមកនេះ ចិន បានក្លាយជាដៃគូវិនិយោគដ៏ច្រើនជាងគេបំផុតរបស់ថៃ ដោយបានវ៉ាជប៉ុន។ គម្រោងផ្លូវមួយខ្សែក្រវាត់មួយ ឬសង្គ្រាមពាណិជ្ជកម្មរវាងចិន និងអាមេរិក ឬការលើកចិត្តរបស់រដ្ឋាភិបាលថៃក្នុងវិស័យវិនិយោគជាដើម អាចជាមូលហេតុដែលចិនអាចពង្រីកការវិនិយោគរបស់ខ្លួននៅប្រទេសអាស៊ានមួយនេះ។ នេះបើតាមការចុះផ្សាយរបស់កាសែត South China Morning Post នៅថ្ងៃទី២៤ មករា។ 
គិតត្រឹមខែតុលា ឆ្នាំ២០១៩ ពាក្យស្នើសុំវិនិយោគរបស់ចិន ដែលមានតម្លៃប្រមាណជា ៨,៥ពាន់លានដុល្លារ បានរុញចិនឲ្យស្ថិតនៅកំពូលតារាងនៃដៃគូវិនិយោគរបស់ថៃ។ គម្រោង៨,៥ ពាន់លានដុល្លារ បានធ្វើឲ្យចិនយកឈ្នះ ទំហំវិនិយោគជប៉ុនប្រមាណជា ២,៣ពាន់លានដុល្លារ និង ហុងកុងប្រមាណ ១,១ពាន់លានដុល្លារ នៅក្នុងឆ្នាំ២០១៩។ នេះបើតាមទិន្នន័យរបស់ក្រុមប្រឹក្សាវិនិយោគថៃ។
ក្នុងទំហំទឹកប្រាក់ប្រមាណជា ៨,៥ពាន់លានដុល្លាររបស់ចិននេះ មានមួយចំណែកប្រមាណជា ៧,៣ពាន់លានដុល្លារ គឺយកទៅវិនិយោគលើគម្រោងរថភ្លើងល្បឿនលឿនដែលតភ្ជាប់ពីអាកាសយានដ្ឋាន Suvarnabhumi ទៅអាកាសយានដ្ឋានDon Muang និងទៅអាកាសយានដ្ឋាន U-tapao។ ក្រុមហ៊ុនថៃ និងចិន ដែលក្នុងនោះមានក្រុមហ៊ុនរដ្ឋចិនផងនោះ បានចុះហត្ថលេខានៅក្នុងខែតុលា ឆ្នាំ២០១៩។
អ្នកវិភាគ និងសាស្ត្រាចារ្យថៃ បានយល់ឃើញថា គម្រោងវិនិយោគសំខាន់ៗ មិនមែនកើតមានជារៀងរាល់ឆ្នាំទេ ហើយការវិនិយោគនេះទៀតសោត គឺជាដំណាក់កាលដំបូងតែប៉ុណ្ណោះរបស់ចិន។ ក្នុងដំណាក់ដំបូងនេះហើយ ទើបកំណើនវិនិយោគចិនមានការកើនឡើងយ៉ាងលឿន និងមានទឹកប្រាក់ដ៏ច្រើនបែបនេះ។ ហេតុនេះ ទើបចិនអាចយកឈ្នះជប៉ុន និងក្លាយជាដៃគូវិនិយោគដ៏ច្រើនជាងគេបំផុតរបស់ថៃនៅក្នុងឆ្នាំ ២០១៩។
ពាក់ព័ន្ធនឹងបញ្ហានេះ វាមានមូលហេតុមួយចំនួន ដែលអាចបណ្តាលឲ្យក្រុមហ៊ុនចិនមកវិនិយោគនៅថៃ។ មូលហេតុទាំងនោះ អាចបណ្តាលមកពីសង្គ្រាមពាណិជ្ជកម្មរវាងចិន និងអាមេរិក គោលនយោបាយលើកទឹកចិត្តពីសំណាក់រដ្ឋាភិបាលថៃ និងគម្រោងផ្លូវមួយ ខ្សែក្រវាត់មួយរបស់ចិនជាដើម។
សូមបញ្ជាក់ថា នៅក្នុងតំបន់អាស៊ីអាគ្នេយ៍ដីគោក វៀតណាម គឺជាដៃគូប្រកួតតែមួយគត់របស់ថៃ ក្នុងការទាកទាញវិនិយោគទុនមកពីបរទេស។ ហេតុនេះ ថៃតែងតែប្រឹងប្រែងប្រកួតប្រជែងជាមួយ វៀតណាមជានិច្ច បើទោះបីជាខ្លួនល្អជាងវៀតណាមទាំងហេដ្ឋារចនាសម្ពន្ធ បរិយាកាសវិនិយោគសម្រាប់បរទេស និងប្រព័ន្ធចង្វាក់ផលិតកម្មក្នុងវិស័យសំខាន់ៗក៏ដោយ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
