កីឡាជាតិ
ជាតិ
កីឡដ្ឋានតម្លៃជាង១៥០លានដុល្លារ ដែលជាជំនួយរបស់ចិន សាងសង់បាន៨០ភាគរយហើយ
លោក វ៉ាត់ ចំរើន អគ្គលេខាធិការ NOCC និងរូបប្លង់គំរូនៃកីឡដ្ឋានមរតកតេជោ
×![]()
កីឡដ្ឋានលំដាប់អន្តរជាតិនៃពហុកីឡដ្ឋានជាតិមរតកតេជោ ដែលជាជំនួយឥតសំណងរបស់រដ្ឋាភិបាលចិនគ្រោងបញ្ចប់ការសាងសង់នៅចុងឆ្នាំ២០២០។ ថ្នាក់ដឹកនាំកីឡាកម្ពុជាចាត់ទុកសមិទ្ធផលនេះ គឺជាមរតកមានតម្លៃមិនអាចកាត់ថ្លៃបាន ដែលបង្ហាញពីចំណងមិត្តភាពដែកថែបដ៏រឹងមាំ និងស្អិតល្មួតរវាងកម្ពុជា-ចិន។ កីឡដ្ឋាននេះ សាងសង់លើផ្ទៃដីទំហំជាង១៦ហិកតា ដែលអាចផ្ទុកអ្នកទស្សនាបានប្រមាណ៦ម៉ឺននាក់។
កីឡដ្ឋានបាល់ទាត់លំដាប់អន្តរជាតិ ដែលជាសមិទ្ធផលទី២នៃពហុកីឡដ្ឋានជាតិមរតកតេជោ នឹងបញ្ចប់ការសាងសង់ដូចគ្រោងទុកនៅចុងឆ្នាំ២០២០ ខណៈបច្ចុប្បន្នស្ថាបនាបានប្រមាណ៧០ទៅ៨០ភាគរយហើយ។ នេះបើតាមការបញ្ជាក់របស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ដែលចាត់ទុកសមិទ្ធផលនេះជាមរតកដ៏មានតម្លៃមិនអាចកាត់ថ្លៃបានរបស់រដ្ឋាបាលចិនមកលើកម្ពុជា។
«ការពន្លឿនក្នុងការសាងសង់ (កីឡដ្ឋានបាល់ទាត់មរតកតេជោ) ទទួលបានលទ្ធផលវិជ្ជមានដូចការកំណត់ គឺនៅថ្ងៃទី៣១ ខែធ្នូ ឆ្នាំ២០២០ នឹងចប់សព្វគ្រប់។ បច្ចុប្បន្នការសាងសង់សម្រេចបាន៧០ទៅ៨០ភាគរយហើយ នៅតែការពន្លឿនបន្តិចទៀតទេ នឹងចប់សព្វគ្រប់ទាំងគ្រោង ការតុបតែង និងបំពាក់សម្ភារផ្សេងៗ ដូច្នេះការសាងសង់នឹងបញ្ចប់ដូចការគ្រោងទុក»។ លោក វ៉ាត់ ចំរើន លើកឡើងដូច្នេះពេលផ្តល់បទសម្ភាសជាមួយសារព័ត៌មាន Thmey Thmey កាលពីថ្ងៃទី២៣ ខែមករា ឆ្នាំ២០២០។
កីឡដ្ឋានលំដាប់អន្តរជាតិដែលជាបច្ចេកវិទ្យាចុងក្រោយរបស់ចិន សាងសង់លើផ្ទៃដីជាង១៦ហិកតា ដោយគ្រោងចំណាយថវិកា១៥៨លានដុល្លារ ដែលជាជំនួយឥតសំណងរបស់រដ្ឋាភិបាលចិន។ កីឡដ្ឋាននេះអាចផ្ទុកអ្នកទស្សនាបានប្រមាណ៦ម៉ឺននាក់ និងអាចជម្លៀងទស្សនិកជនត្រឹមរយៈពេល៧នាទីក្នុងករណីមានហេតុការណ៍មិនប្រក្រតីកើតឡើង។ នេះបើតាមការអះអាងរបស់លោក វ៉ាត់ ចំរើន។
នាពិធីសម្ពោធដំឡើងបង្គំកៅអីអង្គុយកាលពីថ្ងៃទី៩ ខែមករា ឆ្នាំ២០១៩ វិស្វករចិនដែលជាអ្នកទទួលបន្ទុកសាងសង់កីឡដ្ឋាននេះបានលើកឡើងថា ការដំឡើងបង្គំកៅអីនីមួយៗមានភាពលម្អៀងបូក ឬដកពីរសង់ទីម៉ែត្រតែប៉ុណ្ណោះ។ បង្គំកៅអីនេះ មានសភាពរលោង រចនាឡើងជាមួយបច្ចេកវិទ្យាទំនើបចុងក្រោយរបស់ចិន និងមានបំពាក់ QR កូដ ដើម្បីត្រួតពិនិត្យគុណភាពទៀតផង។
លោក វ៉ាត់ ចំរើន បានប្រដូចទំនាក់ទំនងរវាងកម្ពុជា-ចិនទៅនឹងដែកថែម ដែលគ្មានអ្នកណាអាចបំបែកបំបាក់បាន។ ការលើកឡើងបែបនេះ ដោយសារកម្ពុជាមានទំនាក់ទំនងផ្នែកកីឡាជាមួយចិនតាំងជំនាន់សម្តេចព្រះបរមរតនកោដ្ឋ នរោត្តម សីហនុ មកម្លេះ តាមរយៈការជួយកសាងបុរីកីឡា និងរៀបចំព្រឹត្តិការណ៍កីឡាហ្គាណេហ្វូ (Ganefo)នៅឆ្នាំ១៩៦៦។
លោក ថោង ខុន រដ្ឋមន្ត្រីក្រសួងទេសចរណ៍ធ្លាប់មានប្រសាសន៍កន្លងមកថា ការជួយសាងសង់ពហុកីឡដ្ឋានជាតិមរតកតេជោគឺបង្ហាញពីការយកចិត្តទុកដាក់របស់រដ្ឋាភិបាលចិន ក្នុងការរួមចំណែកជួយអភិវឌ្ឍនៅកម្ពុជា។ កីឡដ្ឋាននេះសាងសង់ក្រោមរចនាបទខ្មែរមានរាងដូចសំពៅ ដែលបង្ហាញពីសន្តិភាព មិត្តភាពដ៏រឹងមាំនិងយូរអង្វែងរវាងកម្ពុជា-ចិន ទាំងផ្នែកនយោបាយនិងពាណិជ្ជកម្ម។
តាមរយៈកីឡដ្ឋាននេះ វាបានផ្តល់ការងារ និងជួយបណ្តុះបណ្តាលជំនាញវិស្វកម្មដល់ពលរដ្ឋខ្មែរជាច្រើនផងដែរ។ ក្នុងចំណោមវិស្វករ និងកម្មការសរុបចំនួន៥៨០នាក់មានជនជាតិកម្ពុជាចំនួន២៤២នាក់។ ត្រង់ចំណុចនេះ រដ្ឋមន្ត្រីក្រសួងទេសចរណ៍ខាងលើបានថ្លែងអំណរគុណដល់ខាងវិស្វករចិន ដែលបានចែករំលែកបទពិសោធដល់ប្រជាជនកម្ពុជា។
កីឡដ្ឋានដែលជាសមិទ្ធផលធំជាងគេនៃពហុកីឡដ្ឋានជាតិមរតកតេជោ បានបើកការដ្ឋានសាងសង់នៅថ្ងៃទី៤ មេសា ឆ្នាំ២០១៧ ក្រោមវត្តមានសម្តេចនាយករដ្ឋមន្ត្រី ហ៊ុន សែន ក្នុងអំឡុងពេលសម្ពោធដាក់ឲ្យប្រើប្រាស់សមិទ្ធផលដំណាក់កាលទី១ ដែលមានដូចជាមជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល, ទីលានបាល់បោះ, និងអគារស្នាក់នៅរបស់អត្តពលិក។ កីឡដ្ឋាននេះសាងសង់ឡើង ដើម្បីត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២នៅឆ្នាំ២០២៣៕
Tag:
ពហុកីឡដ្ឋានជាតិមរតកតេជោ
វ៉ាត់ ចំរើន
© រក្សាសិទ្ធិដោយ thmeythmey.com
