ផ្តើមពីសរសេរអត្ថបទខ្លីបង្ហោះហ្វេសប៊ុក ជំរុញឲ្យនិស្សិតស្ថាបត្យកម្ម លីនប៉ាវ ក្លាយជាអ្នកនិពន្ធសៀវភៅ

ជាតិ

បទយកការណ៍ / បទសម្ភាសន៍

វីដេអូ

ផ្តើមពីសរសេរអត្ថបទខ្លីបង្ហោះហ្វេសប៊ុក ជំរុញឲ្យនិស្សិតស្ថាបត្យកម្ម លីនប៉ាវ ក្លាយជាអ្នកនិពន្ធសៀវភៅ

25, Jan 2020 , 4:59 pm

រូបភាព

ដោយ: អ៊ុត រស្មី (Uth Raksmey)

ភ្នំពេញ៖ ផ្តើមពីការសរសេរអត្ថបទរឿងខ្លីៗ និងរឿង«ដំបូលផ្ទះស្រី» ដែលអត្ថបទប្រលោមលោកដំបូងរបស់យុវជន ស៊ុយ លីនប៉ាវ សម្រាប់បង្ហោះលើហ្វេសប៊ុក និងទទួលបានការគាំទ្រច្រើនពីអ្នកអាន។ ផ្តើមពីការនិពន្ធរឿងខ្លីៗបង្ហោះតាមហ្វេសប៊ុកនេះហើយ ធ្វើឲ្យនិស្សិតឆ្នាំទី៤ ផ្នែកស្ថាបត្យកម្ម ស៊ុយ លីនប៉ាវ ក្លាយជាអ្នកនិពន្ធសៀវភៅវ័យក្មេងមួយរូប។ ក្នុងរយៈពេលមួយឆ្នាំកន្លះ យុវជវ័យ២១ឆ្នាំរូបនេះ បានឆ្លៀតពីការសិក្សា និពន្ធសៀវភៅអប់រំបែបកុមារ និងប្រលោមលោកបានរហូតដល់ទៅ៧ក្បាល។ ជានិស្សិតសិក្សាផ្នែកវិទ្យាសាស្ត្រមែនពិត តែយ៉ាងណា លីនប៉ាវ នៅតែបន្តនិពន្ធសៀវភៅសម្រាប់បោះពុម្ភ និងសរសេររឿងខ្លីៗបង្ហោះតាមហ្វេសប៊ុក ដើម្បីជាការកម្សាន្ត និងចែករំលែកដល់អ្នកអាន។

សូមអញ្ជើញទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មាន ThmeyThmey ជាមួយលោក ស៊ុយ លីនប៉ាវ អ្នកនិពន្ធរឿងប្រលោមលោក ដូចតទៅ៖

ជានិស្សិតឆ្នាំទី៤ ផ្នែកស្ថាបត្យកម្ម នៅវិទ្យាស្ថានបច្ចេកវិទ្យាកម្ពុជា តែ លីនប៉ាវ ស្រឡាញ់ចូលចិត្តវិស័យតែងនិពន្ធ។ ក្នុងបទសម្ភាសជាមួយសារព័ត៌មានថ្មីៗ លោក លីនប៉ាវ បានបញ្ជាក់ថា ថ្វីបើការនិពន្ធនៅក្នុងហ្វេសប៊ុក មិនអាចធ្វើឲ្យរូបលោកទទួលបានកម្រៃ ដូចការនិពន្ធសៀវភៅក្ដី តែការគាំទ្រពីអ្នកអានតាមហ្វេសប៊ុកនេះហើយ ដែលធ្វើឲ្យរូបលោកបានក្លាយជាអ្នកនិពន្ធដូចសព្វថ្ងៃ។ លោកបានរៀបរាប់យ៉ាងដូចច្នេះ៖«បានជាខ្ញុំស្រលាញ់ការបង្ហោះរឿងក្នុងហ្វេសប៊ុក ព្រោះវាជាកម្លាំងចិត្តមួយយ៉ាងធំឲ្យខ្ញុំឈានជើងចូលក្នុងវិស័យតែងនិពន្ធ។ នៅពេលដែលខ្ញុំបង្ហោះរឿងនៅក្នុងហ្វេសប៊ុក ធ្វើឲ្យខ្ញុំសប្បាយចិត្តជាងពេលចេញជាសៀវភៅ។ ទម្រាំចេញជាសៀវភៅមួយក្បាលៗ គឺតានតឹងមែនទែន តែពេលបង្ហោះតាមហ្វេសប៊ុកធ្វើឲ្យខ្ញុំសប្បាយ និងមានកម្លាំងចិត្តនឹងធ្វើវា»។

រឿងប្រលោមលោកដែល លីនប៉ាវ បានបង្ហោះតាមហ្វេសប៊ុកភាគច្រើនជារឿងបែបកំប្លែង ដែលឲ្យអ្នកអានហើយសប្បាយចិត្តកាត់បន្ថែមអារម្មណ៍ស្មុគស្មាញពីការសិក្សានិងការធ្វើការងារ។ អ្នកនិពន្ធសម្បុរស រូបនេះបានអះអាងថា ខ្លួនចង់ឃើញស្នាមញញឹមរបស់អ្នកអានតាមរយៈការអានរឿងប្រលោមលោករបស់ខ្លួន។ ទោះបីមមាញឹកក្នុងការសិក្សា និងនិពន្ធសៀវភៅយ៉ាងណាក៏ដោយ តែអ្នកនិពន្ធ រូបនេះ គ្មានបំណងបោះបង់ការនិពន្ធប្រលោមលោកតាមហ្វេសប៊ុកឡើយ។

ការសសេររឿងខ្លីៗ និងប្រលោមលោកតាមហ្វេកប៊ុក បានធ្វើឲ្យយុវជនវ័យ២១ឆ្នាំ ស៊ុយ លីនប៉ាវ វិវត្តន៍ខ្លួនរហូតក្លាយជាអ្នកនិពន្ធវ័យក្មេងមួយរូប។ បច្ចុប្បន្ននេះ លីនប៉ាវ មានស្នាដៃសៀវភៅប្រលោមលោក និងរឿងបែបកុមារចំនួន៧ស្នាដៃ ដូចជា រឿងបឹងអតីត កូនអ្នករើសសំរាម សារិកាតូច បណ្ដឹងគីង្គក់ មានលុយបាត់ម៉ែ ចរិយាយក្សកំណាច និងកូនស្វាតូចនិងហ្មដំរី៕