អន្តរជាតិ
កូរ៉ូណាវីរុស៖ អាមេរិករៀបចំជម្លៀសប្រជាជនខ្លួនពី Wuhan ខណៈអ្នកស្លាប់កើនដល់ ៥៦ នាក់
×![]()
ដោយ: ថ្មីៗ
រដ្ឋាភិបាលអាមេរិកថ្ងៃអាទិត្យនេះ កំពុងរៀបចំជម្លៀសប្រជាជនខ្លួនពីទីក្រុង Wuhan ភាគកណ្តាលប្រទេសចិនដែលជាទីកន្លែងដែលជំងឺរលាកសួតកាចសាហាវ បង្កដោយកូរ៉ូណាវីរុស បានផ្ទុះឡើងនិងបន្តរាតត្បាត។
ក្រសួងការបរទេសអាមេរិកបានផ្តល់ដំណឹងថា ខ្លួនកំពុងរៀបចំយន្តហោះដើម្បីដឹកជញ្ជូនប្រជាជន និងមន្ត្រីខ្លួនដែលកំពុងមានវត្តមាននៅក្នុងទីក្រុង Wuhan នៃខេត្ត Hubei ភាគកណ្តាលប្រទេសចិន ខណៈ មនុស្ស៥៦នាក់ហើយបានស្លាប់ដោយសារជំងឺរលាកសួត បង្កដោយកូរ៉ូណាវីរុស។
បើតាមទីភ្នាក់ងារព័ត៌មាន AFP ដែលដកស្រង់សម្តីក្រសួងការបរទេសអាមេរិក យន្តហោះដឹកប្រជាជនអាមេរិកនឹងចាកចេញពីក្រុង Wuhan នៅថ្ងៃអង្គារ និងឆ្ពោះទៅកាន់ក្រុងសាន់ហ្វ្រាន់ស៊ីស្កូ។
យ៉ាងណាក៏ដោយ តាមរយៈសារដែលផ្ញើជូនប្រជាជនខ្លួននៅក្រុង Wuhanក្រសួងការបរទេស បានសង្កត់ធ្ងន់ថា ការដឹកជញ្ជូនតាមយន្តហោះនេះមានកំណត់សម្រាប់ប្រជាជនធម្មតា។
«លទ្ធភាពដែលយើងផ្តល់ឲ្យគឺពិតជាមានកម្រិត។ ក្នុងករណីដែលការដឹកជញ្ជូនមិនល្មមគ្រប់សម្រាប់អ្នកមានបំណងចង់ចាកចេញ អាទិភាពនឹងត្រូវផ្តល់ឲ្យប្រជាជនដែលមានហានិភ័យខ្ពស់ក្នុងការឆ្លងជំងឺសូតនេះ»។ ក្រសួងការបរទេសបានបញ្ជាក់ដូច្នេះ។
ក្រៅពីសហរដ្ឋអាមេរិក បារាំងក៏កំពុងរៀបចំជម្លៀសប្រជាជនខ្លួនចេញពីទីក្រុងដែលមានប្រជាជនប្រហែល ១១លាននាក់នេះដែរ។
បច្ចុប្បន្នប្រជាជននៅក្នុងទីក្រុងនេះត្រូវបានអាជ្ញាធរដាក់ឲ្យស្ថិតនៅដោយឡែកដើម្បីទប់ស្កាត់ការឆ្លងរាលដាលនៃជំងឺ ហើយបម្រាមធ្វើដំណើរតាមផ្លូវក៏ចូលជាធរមានចាប់ពីថ្ងៃអាទិត្យនេះដូចគ្នា។
គិតត្រឹមថ្ងៃទី២៦ ខែមករា ចំនួនអ្នកឆ្លងកូរ៉ូណាវីរុស កើនឡើងជិត ២០០០ នាក់ហើយ ដោយភាគច្រើនបំផុតនៅប្រទេសចិន។ កូរ៉ូណាវីរុសនេះត្រូវបានគេសន្និដ្ឋានថា ឆ្លងចេញពីគ្រឿងសមុទ្រ និងសត្វមានជីវិតដែលត្រូវបានគេជួញដូរនៅក្នុងផ្សារនាទីក្រុង Wuhan ដែរ។
ក្នុងចំណោមអ្នកឆ្លង មនុស្ស ៥៦នាក់រួចទៅហើយបានស្លាប់នៅចិន ។ ក្រៅពីចិន ប្រទេស និងតំបន់មួយចំនួនក៏មានករណីរាលដាលនៃជំងឺនេះដែក្នុងនោះរួមមាន ថៃ ហុងកុង ម៉ាកាវ តៃវ៉ាន់ សិង្ហបុរី ម៉ាឡេស៊ី វៀតណាម ជប៉ុន កូរ៉េខាងត្បូង សហរដ្ឋអាមេរិក អូស្ត្រាលី បារាំង ណេប៉ាល់ និងកាណាដា៕
© រក្សាសិទ្ធិដោយ thmeythmey.com
