ជាតិ
«បុណ្យពូជ»នៅភ្នំគូលែន ជំរុញឲ្យកសិករប្រើឧបករណ៍និងពូជដំណាំបុរាណឡើងវិញ
× ភ្នំពេញ៖ ប្រជាសហគមន៍ស្រុកបន្ទាយស្រី នឹងសហការជាមួយបណ្តាកសិករទូទាំងប្រទេស រៀបចំពិធីបុណ្យពូជដំណាំបុរាណខ្មែរ ក្រោមប្រធានបទ«ពូជបុរាណខ្មែរ ជាកេរ្តិ៍មរតកជាតិ» នៅថ្ងៃទី២៧-២៨ មករា។ បើតាមអ្នកស្រី កែវ សុភី តំណាងសហគមន៍រៀបចំពិធីបុណ្យនេះ មានគោលបំណងឱ្យកសិករ ប្រើប្រាស់ឧបករណ៍ និងពូជដំណាំបុរាណឡើងវិញ ដើម្បីកាត់បន្ថយការប្រើជីគីមីដែលទិញពីបរទេស, រក្សាគុណភាពដី, សុខភាព និងបង្កើនសាមគ្គីភាព។
អ្នកស្រី កែវ សុភី បានបញ្ជាក់ថាកម្មវិធីនេះ នឹងផ្តល់សារៈសំខាន់ដល់កសិករដែលកំពុងជូបប្រទះបញ្ហាលើការងារកសិកម្ម។ អ្នកស្រីបានពន្យល់យ៉ាងដូច្នេះ៖ «បច្ចុប្បន្ន កសិករបានបោះបង់ពូជស្រូវខ្មែររាប់រយមុខ ហើយទទួលយកពូជស្រូវ ថ្នាំ និងជីគីមីពីប្រទេសជិតខាង ដែលត្រូវចំណាយលុយច្រើនជារៀងរាល់ឆ្នាំ។ សកម្មភាពនេះបានធ្វើឱ្យ ប៉ះពាល់ដី ជីវៈចម្រុះ និងសុខភាពកសិករ ហើយធ្វើឱ្យមានគម្លាតសាមគ្គីភាព ព្រមទាំងបាត់វប្បធម៌ខ្មែរ និងជំពាក់បំណុលគេ»។
អ្នកស្រី សុភី បានរៀបរាប់បន្តថា ផលលំបាកចំពោះមុខបែបនេះ ទើបសហគមន៍ជាច្រើន រៀបចំកម្មវិធីនេះឡើង ដើម្បីផ្សព្វផ្សាយដល់កសិករ ឲ្យពិចារណាកាត់បន្ថយការចំណាយទិញពូជពីក្រៅប្រទេស ថែរក្សាឧបករណ៍បុរាណ និងគ្រាប់ពូជ។
កម្មវិធីបុណ្យពូជដំណាំបុរាណខ្មែរ ក្រោមប្រធានបទ«ពូជបុរាណខ្មែរ ជាកេរ្តិ៍មរតកជាតិ» ដែលរៀបចំនៅរង្វង់មូលភ្នំគូលែន ស្រុកបន្ទាយស្រី ខេត្តសៀមរាប នេះ មានប្រជាកសិករចូលរួមប្រមាណ១ពាន់នាក់។ រយពេលពីរថ្ងៃនៃកម្មវិធី ដែលត្រូវនឹងថ្ងៃទី២៧-២៨ មករា ឆ្នាំ២០២០ នេះ មានដូចជា ការសម្តែងធម្មទេសនាអំពីកសិកម្មតាមបែបធម្មជាតិ, ការតាំងពិព័រណ៍, ចែក គ្រាប់ពូជបុរាណ, បទពិសោធផ្នែកកសិកម្ម, ការប្រគុំតន្ត្រីសហគមន៍ជាដើម៕
Tag:
កសិករ
បុណ្យពូជបុរាណខ្មែរ
© រក្សាសិទ្ធិដោយ thmeythmey.com