ជាតិ
បទយកការណ៍ / បទសម្ភាសន៍
លោក ស្រ៊ិន សុខមាន ចងក្រងឯកសារ«អគារបេតិកភណ្ឌ»ជាភាសាជាតិ ដើម្បីបន្ថយការពឹងផ្អែកលើឯកសារបរទេស លោក ស្រ៊ិន សុខមាន ជាអ្នកនិពន្ធ និងជាស្ថាបនិកគេហទំព័រ Amazing Cambodia
× ភ្នំពេញ៖ ជាអ្នកនិពន្ធ និងជាស្ថាបនិកគេហទំព័រ Amazing Cambodia លោក ស្រ៊ិន សុខមាន បានបោះពុម្ពសៀវភៅស្ដីពីអគារបេតិកភណ្ឌដែលមានចំណងជើងថា “កម្ពុជាកន្លះសតវត្សរ៍មុន និងក្រោយ” ភាគ១ ជាខេមរភាសា។ ចងក្រងឯកសារស្រាវជ្រាវជាភាសាជាតិ លោក ស្រ៊ិន សុខមាន បញ្ជាក់ថាដើម្បីកាត់បន្ថយការពឹងផ្អែកទាំងស្រុង តែទៅលើឯកសារបទេស។
ដើម្បីជ្រាបកាន់តែច្បាស់ សូមស្ដាប់បទសម្ភាសរវាងកញ្ញា ប៉ូ សាគុន អ្នកសារព័ត៌មានថ្មីៗ ជាមួយលោក ស្រ៊ិន សុខមាន ស្ថាបនិកគេហទំព័រ Amazing Cambodia ខាងក្រោមដូចតទៅ៖
“កម្ពុជាកន្លះសតវត្សរ៍មុន និងក្រោយ” ភាគ១ បានលើកយកអគារចំនួន៤៨ មកបរិយាយអំពីការប្រែប្រួលឈ្មោះរបស់សំណង់អគារស្ថាបត្យកម្មនីមួយៗ ទៅតាមសម័យកាល បរិយាយពីកាលបរិច្ឆេទសម្ភោធន៍អគារ ពីតួនាទីរបស់អគារកាលសម័យមុន និងពីបច្ចុប្បន្នភាពរបស់អគារ ជាដើម។
ចំណាយពេលស្រាវជ្រាវអស់រយៈពេលជិត១០ឆ្នាំ លោក ស្រ៊ិន សុខមាន ដែលជាស្ថាបនិកគេហទំព័រ Amazing Cambodia ទើបតែសម្រេចបានជំហានដំបូង នៃការចងក្រងឯកសារ អគារបេតិកភណ្ឌដែលមានអាយុចំណាស់ជាងគេ ក្នុងសតវត្សរ៍ទី១៤ និងអាយុតិចជាងគេក្នុងអំឡុងឆ្នាំ១៩៧១-១៩៧២ ទៅជាសៀវភៅភាគ១ ដែលមានកម្រាស់១២០ទំព័រ។
បែងចែងអគារស្ថាបត្យកម្មទាំង៤៨ជា៥ប្រភេទ សៀវភៅ “កម្ពុជាកន្លះសតវត្សរ៍មុន និងក្រោយ” ភាគ១ ជ្រើសរើសយកតែអគារនៅរាជធានីភ្នំពេញមកបង្ហាញតែប៉ុណ្ណោះ ដែលមានប្រភេទអគារបែបទេសចរណ៍ វត្តបុរាណ មន្ទីរពេទ្យ សាលារៀន សណ្ឋាគារនិងភោជនីយដ្ឋានល្បីៗ កាលពីសម័យមុន ជាខេមរភាសា។
លោក សុខមាន ពន្យល់បន្ថែម៖«ខ្ញុំសង្កេតឃើញថាខ្មែរយើងពីមួយសម័យកាល ទៅមួយសម័យកាល ច្រើនតែពឹងផ្អែកលើឯកសារស្រាវជ្រាវជាភាសាបរទេស ដោយជនបរទេស។ ខ្មែរយើងមួយចំនួននៅតែមានគំនិតថា ឯកសាររបស់បរទេស គួរឱ្យទុកចិត្តច្រើន។ ក៏ប៉ុន្តែហេតុអ្វីបានជាយើងមិនខំពង្រឹងគុណភាពស្នាដៃជាភាសាជាតិ? សៀវភៅនេះមានប្រយោជន៍ច្រើន សម្រាប់និស្សិតស្ថាបត្យកម្ម ហើយមនុស្សគ្រប់គ្នាក៏អាចមើលបាន»។
សម្រាប់គម្រោងបន្តលោក ស្រ៊ិន សុខមាន នឹងបោះពុម្ពសៀវភៅ “កម្ពុជាកន្លះសតវត្សរ៍មុន និងក្រោយ” ភាគ២ និងភាគ៣ ព្រមទាំងសៀវភៅស្ដីពីរោងភាពយន្ត ដែលសុទ្ធសឹងតែជាអគារបេតិកភណ្ឌសាងសង់មុនសម័យសង្គ្រាមខ្មែរក្រហម៕
Tag:
អគារ
បេតិកភណ្ឌ
ស្រាវជ្រាវ
ឯកសារ
បរទេស
ជាតិ
ស្រ៊ិន សុខមាន
© រក្សាសិទ្ធិដោយ thmeythmey.com