ជាតិ
សុខភាព
ក្រសួងសុខាភិបាល៖ កុំដំឡើងថ្លៃម៉ាស់ ទុកលទ្ធភាពឲ្យពលរដ្ឋគ្រប់គ្នាទិញប្រើបានផង!
ពលរដ្ឋនៅប្រទេសជាច្រើនពាក់ម៉ាស់ដើម្បីទប់ស្កាត់ការឆ្លងកូរ៉ូណាវីរុស។ រូបថត AFP
×![]()
ដោយ: ឡាយ សុភាវតី
ភ្នំពេញ៖ ក្រសួងសុខាភិបាល តាមរយៈហ្វេសប៊ុករបស់ខ្លួន បានអំពាវនាវឲ្យអ្នកលក់ដូរ មិនត្រូវដំឡើងតម្លៃម៉ាស់ ស្របពេលដែលជំងឺរលាកសួតបង្កឡើងដោយវីរុសកូរ៉ូណា (2019-nCoV) បន្តរាលដាលនៅប្រទេសចិន និងបណ្តាប្រទេសមួយចំនួនទៀត។
«សុំកុំដំឡើងថ្លៃម៉ាស់ ទុកលទ្ធភាពឲ្យបងប្អូនប្រជាពលរដ្ឋគ្រប់គ្នា ដែលមានតម្រូវការប្រើប្រាស់អាចទិញប្រើបានផង ដើម្បីជាការចូលរួមការពារសុខភាពផ្ទាល់ខ្លួនលើការចម្លងជំងឺនេះ និងជាការធ្វើបុណ្យកុសលសម្រាប់លោកអ្នកជាអ្នកលក់ម៉ាស់នេះផង»។ នេះជាការអំពាវនាវរបស់ក្រសួងសុខាភិបាល។
ជាមួយគ្នានេះក្រសួងបានណែនាំថា ប្រសិនប្រើពលរដ្ឋគ្មានម៉ាស់ គឺអាចប្រើកន្សែង ឬក្រដាសជូតមាត់ សម្រាប់ទប់មាត់នៅពេលក្អកបាន ហើយត្រូវលាងដៃជាមួយសាប៊ូនិងទឹកស្អាត ភ្លាមក្រោយពេលក្អក។
គិតត្រឹមថ្ងៃទី២៧ ខែមករា កូរ៉ូណាវីរុសនេះ បានឆ្លងលើមនុស្សប្រមាណ២៨០០នាក់ ហើយអ្នកស្លាប់កើនដល់៨០នាក់នៅប្រទេសចិន។ ក្រៅពីចិន ប្រទេស និងតំបន់ផ្សេងទៀត ដែលមានករណីរាលដាលរួមមាន ថៃ ហុងកុង ម៉ាកាវ តៃវ៉ាន់ សិង្ហបុរី ម៉ាឡេស៊ី អាមេរិក ជប៉ុន វៀតណាម កូរ៉េខាងត្បូង អូស្ត្រាលី បារាំង ណេប៉ាល់ និងកាណាដា៕
Tag:
សុខភាព
កូរ៉ូណាវីរុស
© រក្សាសិទ្ធិដោយ thmeythmey.com
