រថយន្ត
អន្តរជាតិ
ឧស្សាហកម្មយានយន្តនៅវូហាន រងផលប៉ះពាល់ដោយសារកូរ៉ូណាវីរុស រថយន្តសារធារណៈត្រូវបានផ្អាក រីឯរថយន្តឯកជនត្រូវបានហាមឃាត់បណ្តោះអាសន្ននៅវូហាន។ រូបថត AFP
× ក្រុមហ៊ុនយានយន្តល្បីៗដែលមានជំនួញនៅក្រុងវូហាន កំពុងរងផលប៉ះពាល់ដោយសារតែការរាលដាលជំងឺរលាកសួតបង្កដោយវីរុសកូរ៉ូណាប្រភេទថ្មី (កូរ៉ូណាវីរុស)។ បើតាមការផ្សាយរបស់ CNN ក្រុងវូហានដែលស្ថិតនៅក្នុង Hubei មួយនេះ ត្រូវបានចាត់ទុកជាក្រុងឧស្សាហកម្មយានយន្តដ៏ធំមួយនៅប្រទេសចិន។
ក្រុមហ៊ុន General Motors (GM), Nissan, Renault, Honda និង Peugeot ជាដើម ស្ថិតក្នុងចំណោមរថយន្តម៉ាកល្បីៗលើពិភពលោក ដែលមានរោងចក្រនៅក្រុងវូហាន ដោយមានដៃគូផាគហ៊ុនជាមួយក្រុមហ៊ុនចិន។
ក្រុងដែលមានពលរដ្ឋប្រមាណ១១លាននាក់នេះ បានក្លាយជាទីក្រុងដ៏ស្ងប់ បន្ទាប់ពីអាជ្ញាធរ បានសម្រេចព្យួរការធ្វើចរាចរណ៍រថយន្តក្រុងសារធារណៈ និងហាមឃាត់រថយន្តឯកជនបើកបរ ខណៈអាជ្ញាធរព្យាយាមទប់ស្កាត់ការរាលដាលជំងឺរលាកសួត កូរ៉ូណាវីរុស។ ជាមួយគ្នានេះ ផ្លូវហាយវេសំខាន់ៗ ក៏ត្រូវបានបិទផងដែរ។
ករណីនេះ បានធ្វើឲ្យក្រុមហ៊ុនរថយន្ត មិនមានការលក់ចេញនោះឡើយ ដែលធ្វើឲ្យអាជីវកម្មជាច្រើនត្រូវរាំងស្ទះ ខណៈកាលពីឆ្នាំ២០១៩ ទីផ្សាររថយន្តនៅចិន ក៏បានធ្លាក់មកត្រឹម២.៣លានគ្រឿងរួចទៅហើយ។
ក្រុមហ៊ុន Renault របស់បារាំង លក់ចេញបាន១៨០ ០០០គ្រឿងនៅចិនកាលពីឆ្នាំមុន ពោលគឺ៥ភាគរយនៃទីផ្សារទាំងមូល។ ដូចគ្នាដែរ ក្រុមហ៊ុន PSA Group រំពឹងថា ការលក់ចេញ Peugeot និង Citroen របស់ខ្លួនបានប្រសើរនោះឡើយ ប៉ុន្តែក្រុមហ៊ុនភាគច្រើនរង់ចាំការផ្តល់អនុសាសន៍ពីអាជ្ញាធរចិន។
បើតាម Changliang Daily ការវិនិយោគលើឧស្សាហកម្មយានយន្ត និងគ្រឿងបន្លាស់នៅវូហាន មានតម្លៃប្រមាណ៥៧ពាន់លានដុល្លារអាមេរិក ដោយ កាលពីឆ្នាំ២០១៨ បង្ហាញថា ក្រុងវូហានទាំងមូលផលិតបានរថយន្ត១.៧លានគ្រឿង៕
© រក្សាសិទ្ធិដោយ thmeythmey.com