អន្តរជាតិ
អភិបាលក្រុងវូហាន សារភាពថា អសមត្ថភាពគ្រប់គ្រងវិបត្តិកូរ៉ូណាវីរុស អភិបាលក្រុងវូហាន លោក Zhou Xiangwan អំឡុងពេលធ្វើសន្និសីទព័ត៌មាន កាលពីថ្ងៃអាទិត្យ ២៦ ខែមករា ឆ្នាំ២០២០ (សារព័ត៌មាន Shanghai Daily)
× អភិបាលក្រុង វូហាន លោក Zhou Xiangwan សារភាពថា ការគ្រប់គ្រង់វិបត្តិកូរ៉ូណាវីរុសរបស់រដ្ឋបាលលោក នៅពុំទាន់ល្អគ្រប់គ្រាន់នៅឡើយទេ ហើយលោកមានឆន្ទៈក្នុងការចុះចេញពីតំណែង។ ការលើកឡើងរបស់លោក ធ្វើឡើងខណៈលោកនាយករដ្ឋមន្ត្រីចិន លី ខឹឈាំង បានទៅដល់ទីក្រុងដោយផ្ទាល់ដើម្បីដឹកនាំកិច្ចប្រឹងប្រែងទប់ស្កាត់ការរាតត្បាតវីរុសនេះ ខណៈចំនួនអ្នកស្លាប់កើនដល់៨១នាក់។
ក្នុងបទសម្ភាសន៍ជាមួយប្រព័ន្ធផ្សព្វផ្សាយរដ្ឋចិន CCTV កាលពីថ្ងៃចន្ទ ២៧ មករា លោក Zhou Xiangwang បានការពារការសម្រេចចិត្តរបស់លោកក្នុងការបិទច្រកចេញចូលរបស់ទីក្រុង វូហាន ដែលមានប្រជាជនសរុប ១១លាននាក់។ ត្រង់នេះ លោក បកស្រាយថា ការធ្វើបែបនេះ គឺជាវីធីសាស្ត្រដ៏មានប្រសិទ្ធភាពបំផុតដើម្បីរាំងខ្ទប់ការសាយភាយនៃជំងឺរលាកសួតប្រភេទថ្មីនេះ ហើយសង្កត់ធ្ងន់ថា លោកមានឆន្ទៈទទួលខុសត្រូវ។
«ប្រសិនបើ ប្រជាជន ចង់ទទួលបានគណនេយ្យភាព (ពាក់ព័ន្ធរឿងបិទច្រកចេញចូល) ហើយសាធារណជន មានប្រតិកម្មខ្លាំងចំពោះរឿងនេះ យើងមានឆន្ទៈក្នុងការលាលែង»។ លោកអភិបាលក្រុង វូហាន បញ្ជាក់ដូច្នេះ ដោយសារភាពទៀតថា ពលរដ្ឋហាក់មិនពេញចិត្តចំពោះចំណាត់ការនេះឡើយ។
មែនទែនទៅ ការលើកឡើងរបស់លោកអភិបាលក្រុង Zhou Xiangwang ធ្វើឡើងខណៈលោកនាយករដ្ឋមន្ត្រីចិន លី ខឹឈាំង នៅថ្ងៃទី២៧ ខែមករា បានទៅដល់ទៅក្រុងវូហាន ខេត្តហ៊ូប៊ី ។ ការធ្វើដំណើរទស្សនកិច្ចនៅតំបន់នៅកណ្ដាលរាតត្បាតនេះរបស់លោក លី គឺដើម្បីទៅដឹកនាំក្រុមការងារជាន់ខ្ពស់មួយដោយផ្ទាល់ក្នុងគោលដៅប្រយុទ្ធប្រឆាំងនឹងជំងឺរលាកសួតប្រភេទថ្មីនេះ។
សូមបញ្ជាក់ថា គិតមកត្រឹមថ្ងៃចន្ទ ២៧ ខែមករា ការស្លាប់ដោយសារជំងឺរលាកសួតប្រភេទថ្មីក្នុងប្រទេសចិន បានកើនឡើងដល់ ៨១ នាក់ ហើយមានករណីឆ្លងសរុប ២៨០០នាក់ ដោយភាគច្រើនគឺស្ថិតក្នុងប្រទេសចិន។ វិធានការជាច្រើន ត្រូវបានដាក់ចេញដើម្បីទប់ស្កាត់ការរាលដាល និងការព្យាបាល។ បច្ចុប្បន្ន អាជ្ញាធរចិន កំពុងសម្រុកសាងសង់មន្ទីរពេទ្យចំនួនពីរដដើម្បីទទួលព្យាបាលអ្នកជំងឺ។ សម្ភារ និងគ្រឿងបរិក្ខារទាំងឡាន ត្រូវបានបញ្ជូនទៅកាន់វូហានដើម្បីពន្លឿនការសាងសង់មន្ទីរពេទ្យ៕
Tag:
ចិន
វូហាន
Zhou Xianwang
© រក្សាសិទ្ធិដោយ thmeythmey.com