ជាតិ
កម្ពុជារកឃើញកូរ៉ូណាវីរុស១ករណីលើជនជាតិចិននៅខេត្តព្រះសីហនុ
× កម្ពុជារកឃើញមេរោគ កូរ៉ូណាវីរុស១ ករណី លើបុរសជនជាតិចិន អាយុ៦០ឆ្នាំម្នាក់ ដែលបានធ្វើដំណើរពីខេត្តវូហាន មកកាន់ខេត្តព្រះសីហនុ។ នេះបើតាមការបញ្ជាក់របស់រដ្ឋមន្ត្រីក្រសួងសុខាភិបាលកម្ពុជា នៅក្នុងសន្និសីទកាសែតនៅយប់ថ្ងៃទី ២៧ មករានេះ។
លោក ម៉ម ប៊ុនហេង បានបញ្ជាក់ថា ជនជាតិចិននោះ ចូលមកកម្ពុជាកាលពីថ្ងៃទី២៣ ខែមករា។ លោករដ្ឋមន្រ្តី ថ្លែងដូច្នេះថា៖«គិតត្រឹមម៉ោង៣រសៀល ថ្ងៃទី២៧ ខែមករា ឆ្នាំ២០២០នេះ ក្រសួងបានស្រាវជ្រាវរកឃើញ មានការបញ្ជាក់ពីវិទ្យាស្ថានប៉ាស្ទ័រកម្ពុជា នូវករណីវិជ្ជមានវីរុសកូរ៉ូណា នៅលើជនជាតិចិនម្នាក់ឈ្មោះ ចា ជិនហួ ភេទប្រុស អាយុ៦០ឆ្នាំ ធ្វើដំណើរមកពីទីក្រុងវូហាន ជាមួយក្រុមគ្រួសារ៤នាក់ ដែលបានយកមកធ្វើវិភាគទាំង៤នាក់ មានវិជ្ជមានវីរុសកូរ៉ូណា តែម្នាក់គត់ គឺបុរសឈ្មោះ ចា ជិនហួ»។
គិតត្រឹមវេលាម៉ោង៧ និង៤៣នាទី ល្ងាចថ្ងៃចន្ទនេះ អ្នកជំងឺរលាកសួតបង្កដោយមេរោគកូរ៉ូណាប្រភេទថ្មី មានជាង២៨០០នាក់ ដោយភាគច្រើនបំផុតនៅប្រទេសចិន ដែលរួមបញ្ចូលទាំងហុងកុង ម៉ាកាវ និងតៃវ៉ាន់ផងដែរ។ អ្នកស្លាប់មាន៨១នាក់ ដែលស្ថិតនៅក្នុងប្រទេសចិនទាំងអស់។
ប្រទេសផ្សេងទៀតដែលឆ្លងជំងឺនេះរួមមាន អូស្ត្រាលី សហរដ្ឋអាមេរិក ជប៉ុន កូរ៉េខាងត្បូង បារាំង ណេប៉ាល់ ហើយកម្ពុជាជាប្រទេសអាស៊ានទី៥ បន្ទាប់ពីថៃ (៨ករណី), សិង្ហបុរី (៤ករណី), ម៉ាឡេស៊ី (៤ករណី) និងវៀតណាម (២ករណី)៕
© រក្សាសិទ្ធិដោយ thmeythmey.com