ជាតិ
មនុស្សជាង៧០នាក់ ដែលធ្វើដំណើរតាមយន្តហោះជាមួយបុរសជនជាតិចិនផ្ទុកវីរុសកូរ៉ូណា ពុំមានរោគសញ្ញាទេ
× ភ្នំពេញ៖ មនុស្សជាង៧០នាក់ ដែលបានធ្វើដំណើរតាមយន្តហោះជាមួយបុរសជនជាតិចិនផ្ទុកវីរុសកូរ៉ូណានោះ មិនមានរោគសញ្ញាអ្វីទេ។ នេះជាការបញ្ជាក់របស់លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល។
លោក លី សូវ៉ាន់ បានបញ្ជាក់ថា ក្រុមមន្ត្រីជំនាញក្រសួង បានចុះពិនិត្យលើសុខភាពរបស់មនុស្សជាង៧០នាក់នេះហើយ ប៉ុន្តែរកមិនឃើញថា ពួកគេមានផ្ទុកវីរុសកូរ៉ូណាឡើយ។ បើតាមលោក លី សូវ៉ាន់ មន្ត្រីជំនាញបានចុះពិនិត្យសុខភាពអ្នកដំណើរទាំងនោះនៅតាមបណ្ដាខេត្តគោលដៅ ដែលពួកគេកំពុងស្នាក់នៅ។ ថ្លែងប្រាប់សារព័ត៌មានថ្មីៗ នៅថ្ងៃទី២៨ មករា អ្នកនាំពាក្យរូបនេះ បាននិយាយដូច្នេះថា៖«យើងបានរកឃើញអ្នកប៉ះពាល់ និងជិះយន្តហោះជាមួយអ្នកជំងឺ រហូតពេលនេះ ម៉ោង២៖៤៩រសៀល នេះយើងបានពិនិត្យពួកគេដោយអ្នកខ្លះនៅបាត់ដំបង នៅសៀមរាបជាដើម ដោយរកពុំឃើញមានអ្នកចេញរោគសញ្ញាអ្វីនៅឡើយ »។
បើតាមលោក លី សូវ៉ាន់ ក្រសួងនឹងបន្តតាមដានសុខភាពមនុស្សទាំង៧០នាក់ទៀត។ «យើងនឹងតាមដាន និងទាក់ទងទៅគាត់ ដើម្បីសុំពិនិត្យសុខភាពគាត់ទៀត។ ហើយបើពួកគេមានរោគសញ្ញាមិនស្រួលខ្លួននោះ យើងក៏ប្រាប់ពួកគាត់ឱ្យទាក់មកយើងភ្លាម»។ នេះជាការបញ្ជាក់របស់លោក លី សូវ៉ាន់។
ដោយឡែកស្ថានភាពសុខភាពជនជាតិចិន ដែលរកឃើញមានផ្ទុកវីរុសកូរ៉ូណានោះ មានសភាពល្អធម្មតាទេ។ អ្នកនាំពាក្យក្រសួងសុខាភិបាល បានបញ្ជាក់ថា ៖«ស្ថានភាពអ្នកជំងឺរលាកសួតបង្កឡើងដោយមេរោគកូរ៉ាវីរុសប្រភេទថ្មី គាត់មានសុខភាពល្អ គ្មានរោគសញ្ញាធ្ងន់ធ្ងរទេ »។
នៅពេលសួរថា តើមន្ត្រីសុខាភិបាល អាចមានសមត្ថភាពគ្រប់គ្រាន់ក្នុងការព្យាបាលជំងឺរលាកសួតប្រភេទថ្មីនេះ ជាសះស្បើយដែរទេ ខណៈពលរដ្ឋកំពុងព្រួយបារម្ភ? លោក លី សូវ៉ាន់ បានតបវិញថា ក្រុមមន្ត្រីជំនាញមានសមត្ថភាពព្យាបាលជំងឺនេះតាមបច្ចេកទេស ខណៈគ្មានឱសថសម្រាប់ព្យាបាលឡើយ ដោយសារវាជាប្រភេទជំងឺថ្មី។
និយាយដល់ចំណុចនេះលោក លី សូវ៉ាន់ ក៏បានលើកបទពិសោធន៍ជោគជ័យរបស់កម្ពុជា ដែលបានទប់ស្កាត់និងព្យាបាលជំងឺ SARS នៅឆ្នាំ២០០៣, ជំងឺពងបែកដៃជើង ឆ្នាំ២០១២ ជំងឺផ្ដាសសាយបក្សី H5N1 ឆ្នាំ២០១៤-២០១៥ និងជំងឺរលាកផ្លូវដង្ហើម MERS ឆ្នាំ២០១៥ ជាដើម។
ទីក្រុងវូហាន គឺជាប្រភពដើមនៃការផ្ទុះមេរោគប្រភេទថ្មីម្យ៉ាង ហៅថា មេរោគកូរ៉ូណា ដែលអាចបង្កទៅជាជំងឺរលាកសួត។ មេរោគនេះ ចាប់ផ្ទុះកាលពីចុងខែធ្នូ ឆ្នាំ២០១៩។ គិតមកដល់ព្រឹកថ្ងៃទី២៨ ខែមករា ឆ្នាំ២០២០ អ្នកស្លាប់ដោយសារមេរោគកូរ៉ូណា បានកើនឡើងដល់ជាង១០៦នាក់ហើយ ខណៈអ្នកជំងឺបានកើនឡើងដល់ជាង៤ពាន់នាក់នៅក្នុងប្រទេសចិន។
មេរោគប្រភេទថ្មីដ៏គួរខ្លាច ដែលមិនទាន់មានវ៉ាក់សាំងពារពារនេះ បានរាលដាលទៅដល់បណ្តាលប្រទេស មួយចំនួន ដូចជា ថៃ វៀតណាម កម្ពុជា ជប៉ុន អាមេរិក អូស្ត្រាលី កូរ៉េខាងត្បូង កាណាដា ម៉ាឡេស៊ី សិង្ហបុរី បារាំង និងណេប៉ាល់, ម៉ាកាវ, ហុងកុង, និង តៃវ៉ាន់ ជាដើម តែពុំមានអ្នកបាត់បង់ជីវិតឡើយ ក្រៅតែពីនៅប្រទេសចិន៕
Tag:
លី សុវ៉ាន់
កូរ៉ូណាវីរុស
Coronavirus
© រក្សាសិទ្ធិដោយ thmeythmey.com