អន្តរជាតិ
លោក ប្រាយុទ្ធ ធានាថា រដ្ឋាភិបាលគ្រប់គ្រងស្ថានការណ៍កូរ៉ូណាវីរុសបាន១០០ភាគរយ លោកនាយករដ្ឋមន្ត្រីថៃ ប្រាយុទ្ធ ចន្ទអូចា (AFP)
× រដ្ឋាភិបាលថៃ បានផ្តល់ការធានាជូនពលរដ្ឋថៃថា អាជ្ញាធរថៃ មានសមត្ថភាពរាំងខ្ទប់ទាំងស្រុងនូវការផ្ទុះឡើងនៃកូរ៉ូណាវីរុស ខណៈខ្លួនកំពុងរឹតបន្ដឹងការតាមដាន និងវាយតម្លៃលើស្ថានភាពការឆ្លងវីរុសនេះ។ នេះបើតាមការបញ្ជាក់របស់លោកនាយករដ្ឋមន្ត្រីថៃ ប្រាយុទ្ធ ចន្ទអូចា នៅកាលពីថ្ងៃចន្ទ ២៧ ខែមករា។ រំលងមួយថ្ងៃប៉ុណ្ណោះ ក្រោយការអះអាងនេះ មន្ត្រីសុខាភិបាលថៃ នៅរសៀលថ្ងៃ២៨ មករា បានប្រកាសថារកឃើញការឆ្លងជំងឺរលាកសួតប្រភេទថ្មី ដែលបង្កឡើងដោយកូរ៉ូណាវីរុសនេះ ៦ ករណីថ្មីផ្សេងទៀត ខណៈសរុបទៅ គឺមាន ១៤ករណីហើយក្នុងប្រទេសថៃ។
«រដ្ឋាភិបាល គ្រប់គ្រងស្ថានការណ៍ (កូរ៉ូណាវីរុស) នេះបាន១០០ភាគរយ»។ លោកនាយករដ្ឋមន្ត្រី បញ្ជាក់បែបនេះក្នុងកញ្ចក់ទូរទស្សន៍ ដើម្បីជូនដំណឹងដល់ប្រជាជនថៃ កាលពីថ្ងៃចន្ទ ២៧ ខែមករា ហើយក៏មានគោលដៅបន្ថូរបន្ថយកខ្វល់របស់ពលរដ្ឋពាក់ព័ន្ធនឹងបញ្ហានេះផងដែរ។
តាមការចុះផ្សាយកាសែតថៃបាងកកប៉ុស្តិ៍ លោក ប្រាយុទ្ធ បញ្ជាក់ថា ចំណាត់ការបង្ការទុកជាមុនដែលដាក់ចេញដោយរដ្ឋាភិបាលថៃ គឺស្របតាមបទដ្ឋានអន្តរជាតិ ហើយការប្រើឧបករណ៍ឆ្លុះមើលអ្នកដំណើរអន្តរជាតិគឺមានប្រសិទ្ធភាព។ មេដឹកនាំថៃរូបនេះ សង្កត់ធ្ងន់ទៀតថា មនុស្ស៥នាក់ក្នុងចំណោម៨នាក់ដែលរកឃើញថាឆ្លងវីរុសនេះ បានជាសះស្បើយ ហើយបានអនុញ្ញាតឲ្យចេញពីមន្ទីរពេទ្យ ខណៈអ្នកដទៃទៀត កំពុងសម្រាកព្យាបាលដោយយកចិត្តទុកដាក់បំផុត។
ម្យ៉ាងទៀត ប្រមុខរដ្ឋាភិបាលថៃរូបនេះ បញ្ជាក់ឲ្យដឹងទៀតថា ក្រសួងសុខភាពសាធារណៈ បានដំឡើងប្រតិបត្តិការអាសន្នសុខភាពសាធារណៈរបស់ខ្លួនទៅកម្រិតទី៣ ហើយនោះគឺ កម្រិតខ្ពស់បំផុត ។ គោលដៅគឺដើម្បីធានាថា សហគមន៍ទូទាំងប្រទេស ក៏ដូចជា មន្ទីរពេទ្យ និងព្រលានយន្តហោះ អាចឆ្លើយតបភាពធ្ងន់ធ្ងរនៃការផ្ទុះឡើងកូរ៉ូណាវីរុស។
ទន្ទឹមនឹងការពង្រឹងប្រតិបត្តិការអាសន្នសសុខភាពសាធារណៈ លោកឧត្តមសេនីយ៍ ប្រាយុទ្ធ បានសង្កត់ធ្ងន់ពីភាពចាំបាច់ក្នុងការផ្តល់នូវការពិតស្តីពីការផ្ទុះឡើងនៃវីរុស ដោយមិនមានការលាក់បាំងអ្វីឡើយ។ លោក បន្ថែមថា ប្រព័ន្ធសុខាភិបាលនិងសុខភាពសាធារណៈរបស់ប្រទេសថៃ មានសមត្ថភាពគ្រប់គ្រាន់ក្នុងការត្រួតពិនិត្យនិងការពារការផ្ទុះជំងឺឆ្លងធំ ៗ។
ទោះបីជាមានការអះអាងធានាពីការគ្រប់គ្រងស្ថានការណ៍ការឆ្លងទាំងស្រុងរបស់លោកនាយករដ្ឋមន្ត្រីថៃក៏ដោយក្ត៏ អាជ្ញាធរសុខាភិបាលថៃ នៅរសៀលថ្ងៃអង្គារ ទី២៨ ខែមករា បានរកឃើញករណីឆ្លងកូរ៉ូណាវីរុស៦ករណីថ្មីផ្សេងទៀតក្នុងចំណោមភ្ញៀវទេសចរដែលមកពីប្រទេសចិន។ តួលេខថ្មីនេះ បានធ្វើឲ្យករណីឆ្លងក្នុងប្រទេសថៃកើនឡើងសរុបដល់ ១៤ករណី ។
ករណី៥ កើតលើមនុស្សអាយុពី៦ ទៅ៧០ឆ្នាំ ដែលមកពីខេត្ត Hubei ជាមួយក្រុមគ្រួសារ ហើយករណីមួយទៀត អ្នកជំងឺមកពីទីក្រុង Chonqing។ នេះបើតាមការអះអាងរបស់អគ្គនាយករងនៃនាយកដ្ឋានគ្រប់គ្រងជំងឺឆ្លង លោក Tanarak Plipat ដែលត្រូវបានដកស្រង់ដោយទូរទស្សន៍ Channel NewsAsia ៕
Tag:
ថៃ
ប្រាយុទ្ធ ចន្ទអូចា
កូរ៉ូណាវីរុស
© រក្សាសិទ្ធិដោយ thmeythmey.com