ជាតិ
សុខភាព
កូរ៉ូណាវីរុស៖ សាលាខ្លះបិទទ្វារបណ្តោះអាសន្ន ខណៈសាលាជាច្រើនពង្រឹងការត្រួតពិនិត្យសុខភាពអនាម័យ
×![]()
ដោយ: ថ្មីៗ
សាលារៀនមួយចំនួននៅរាជធានីភ្នំពេញ ជាពិសេសសាលាឯកជន បានផ្អាកដំណើរការ ខណៈសាលារៀនខ្លះទៀត បានរឹតបន្តឹងការត្រួតពិនិត្យសុខភាពសិស្ស ដោយសារព្រួយបារម្ភពីស្ថានភាពមេរោគកូរ៉ូណាថ្មី ឬ កូរ៉ូណាវីរុស រាលដាលឆ្លងដល់សិស្ស។ កម្ពុជាបានប្រកាសរកឃើញកូរ៉ូណាវីរុស១ករណី លើបុរសជនជាតិចិន អាយុ៦០ឆ្នាំម្នាក់ ដែលបានធ្វើដំណើរពីខេត្តវូហាននៃប្រទេសចិន មកកាន់ខេត្តព្រះសីហនុ កាលពីយប់ថ្ងៃទី២៧មករា ឆ្នាំ២០២០។
សាលាអន្តរជាតិអាប៊ែនឌែនឡៃ បានសម្រេចផ្អាកដំណើរការសិក្សាចំនួន៤ថ្ងៃ គឺចាប់ពីថ្ងៃទី២៨ដល់៣១មករា ទើបអាចឱ្យសិស្សចូលរៀនធម្មតាវិញ នៅថ្ងៃទី១ កុម្ភៈ។ បុគ្គលិកផ្នែករដ្ឋបាលមួយរូបនៃសាលាអន្តរជាតិអាប៊ែនឌែនឡៃនេះ បានប្រាប់សារព័ត៌មានThmeyThmey ថា មូលហេតុនៃការឈប់សម្រាកនេះដោយសារបារម្ភពីហានិភ័យនៃមេរោគកូរ៉ូណា ក្នុងរយៈពេលប៉ុន្មានថ្ងៃចុងក្រោយនេះ។
បុគ្គលិកដដែលរូបនេះបានបន្តដូច្នេះថា៖«ការឈប់សម្រាកនេះគឺសាលាទុករយៈពេលត្រៀមសម្ភារៈ និងវិធានការការពារនៃការឆ្លងមេរោគកូរ៉ូណាថ្មី ដែលបានមកដល់ខ្មែរហើយនោះ។ រហូតដល់ថ្ងៃចូលរៀនធម្មតាវិញសាលារៀននឹងផ្តល់ម៉ាស សាប៊ូ និងអាកុល ដល់សិស្ស និងបង្កើនការត្រួតពិនិត្យ និងតាមដានសុខភាព សិស្ស ដើម្បីទប់ស្កាត់នៃការឆ្លងមេរោគនេះ»។
ទន្ទឹមនឹងសាលាបង្រៀនខ្លះបិទទ្វានោះ ប៉ុន្តែក៏នៅមានសាលារៀនផ្សេងទៀត កំពុងអនុវត្តនូវធានាការយ៉ាងខ្ជាប់ខ្ជួន ក្នុងការបង្ការ និងទប់ស្កាត់នៃការឆ្លងមេរោគកូរ៉ូណាដល់សិស្សផងដែរ។ ជាក់ស្ដែងវិទ្យាល័យព្រះស៊ីសុវត្ថិ បានរៀបចំឱ្យសិស្សពាក់ម៉ាស់ ,លាងដៃជាមួយសាប៊ូ និងអាល់កុល រួចទាំងត្រៀមសម្ភារៈវាស់កម្តៅសិស្សជាដើម។ ដោយឡែកសាលារៀនជំនាន់ថ្មី, សាលាអន្តរជាតិខេនរីដ, សាលាអន្តរជាតិ អាមេរិកាំងប៉ាស៊ីហ្វិក និងសាលាអន្តរជាតិ ជីនៀស ក៏ឱ្យសិស្សអនុវត្តបែបនេះដែរ។
នៅភ្នំពេញមានសាលារៀនឯកជនមួយចំនួនតូចប៉ុណ្ណោះ ដែលបានផ្អាកដំណើរការសាលារៀនរបស់ខ្លួន ដោយសារបារម្ភពីសា្ថនភាពនៃការរាលដាលមេរោគកូរ៉ូណាថ្មីនេះ។ ហើយក្រសួងមិនមានទិន្នន័យនៃសាលារៀនបិទទ្វារបណ្តោះអាសន្នឡើយ។ នេះបើតាមលោក រស់ សុវាចា អ្នកនាំពាក្យក្រសួងអប់រំ យុវជន និងកីឡា។
អ្នកនាំពាក្យរូបនេះ បានបន្តថាប្រាប់សារព័ត៌មានThmeyThmey តាមទូរសព្ទ ថា ក្រសួងបានសេចក្តីណែនាំសាជាថ្មីម្តងទៀត ដល់គ្រឹះស្ថានសិក្សាសាធារណៈនិងឯកជនទាំងអស់ឱ្យចូលរួមចាត់វិធានការការពារវីរុសកូរ៉ូណាថ្មី(2019-nCoV) នេះ។ ក្រសួងអប់រំក៏បានលើកទឹកចិត្តឱ្យបុគ្គលិក និងសិស្សានុសិស្ស ពាក់ម៉ាសការពារជាប្រចាំ ដោយមានការវាស់ស្ទង់សីតុណ្ហភាពក្នុងខ្លួនមុនពេលចូលរៀនជាដើម។ ដោយឡែកនៅតាមសាលារៀននីមួយៗ ក៏មានដាក់អាកុល សាប៊ូ សម្រាប់សិស្សលាងដៃ ឱ្យបានទៀងទាត់ និងញឹកញាប់ជាប្រចាំ ពិសេសមុនពេលបរិភោគអាហារ ឬក្រោយពេលប៉ះពាល់អ្វីដែលកខ្វក់ ព្រមទាំងមានការណែនាំឱ្យសិស្សចៀសវាងប៉ះពាល់អ្នកមានជំងឺផ្លូវដង្ហើម ប្រកាន់ខ្ជាប់នូវការអនុវត្តអនាម័យស្អាត សុវត្ថិភាពចំណីអាហារ មិនគួរទៅកាន់កន្លែងណាដែលមានមនុស្សអ៊ូអរពេក ព្រមទាំងបរិភោគទឹកឱ្យបានច្រើន។
សូមជម្រាបថា កូរ៉ូណាវីរុសថ្មីនេះ ដែលមានប្រភពពីទីក្រុង វូហាន (Wuhan) នៅខេត្តហ៊ូប៉ី ប្រទេសចិន ហើយបានបន្តរាតត្បាតដល់ប្រទេសនិងតំបន់ចំនួន១៨ ដែលមានជាង៤០០០ករណីនៃអ្នកឆ្លងមេរោគនេះ នៅជុំវិញពិភពលោក។ កម្ពុជាមានមួយករណី ដែលបានរកឃើញលើបុរសជនជាតិចិនវ័យ៦០ឆ្នាំ នៅខេត្តព្រះសីហនុ ដោយបានដំណើរពីទីក្រុងវូហាន ផ្ទាល់តែម្តង។
គិតត្រឹមព្រឹក ថ្ងៃទី២៨មករានេះ ចំនួនអ្នកស្លាប់ដោយសារការផ្ទុះកូរ៉ូណាវីរុសដែលបង្កជាជំងឺរលាកសួត បានហក់ឡើងដល់១០៦ នាក់ហើយ៕
ប្រភពរូបថត៖ ក្រសួងអប់រំ យុវជន និងកីឡា
Tag:
មេរោគ
កូរ៉ូណាវីរុស
© រក្សាសិទ្ធិដោយ thmeythmey.com
