អន្តរជាតិ
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី២៨ ខែមករា បានបញ្ចេញផែនការសន្តិភាពនៅមជ្ឈិមបូព៌ាដើម្បីដោះស្រាយជម្លោះរ៉ាំរ៉ៃរវាងអ៊ីស្រាអែល និងប៉ាឡេស្ទីន។ ទោះលោក ត្រាំ ខ្លួនឯងចាត់ទុកជាកិច្ចព្រមព្រៀងប្រចាំសតវត្សរ៍ក្ដី ផែនការនេះ ត្រូវមើលឃើញថា លំអៀងទៅរកអ៊ីស្រាអែលដែលជាសម្ព័ន្ធមិត្តស្អិតល្មួតរបស់អាមេរិក។ ប៉ាឡេស្ទីនឯណោះ ដែលប្រកាសមិនទទួលយកផែនការនេះតាំងពីដើមមកនោះ ក៏បន្តទាត់ចោលគម្រោងរបស់លោក ត្រាំ ទៀត។
ក្រោយទុកឲ្យគេរង់ចាំជាយូរ ប្រធានាធិបតី ដូណាល់ ត្រាំ ក៏បានបើកទំព័រផែនការសន្តិភាពនៅមជ្ឈិមបូព៌ាអំឡុងពេលកម្មវិធីនៅសេតវិមានដែលមានវត្តមាននាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ ។ លោក ត្រាំ បានសន្យាផ្ដល់ក្ដីសង្ឃឹមថ្មីដល់ដំណោះការស្វែងរងសន្តិភាពក្នុងជម្លោះដ៏រ៉ាំរ៉ៃជាងគេនៅមជ្ឈិមបូព៌ា។ ប៉ុន្តែផែនការសន្តិភាពនេះ រងការរិះគន់ខ្លាំងតាំងពីចាប់ផ្ដើមមក ព្រោះលំអៀងទៅរកអ៊ីស្រាអែលខ្លាំងជ្រុល។
ក្រោមផែនការនេះ អាមេរិក នឹងទទួលស្គាល់ការមិនអាចបំបែកនៃទីក្រុងហ្សេរុយសាឡិមជារដ្ឋធានីរបស់អ៊ីស្រាអែល ហើយអាមេរិកនឹងទទួលស្គាល់សំណង់ខុសច្បាប់របស់អ៊ីស្រាអែលនៅទឹកដីរបសប៉ាឡេស្ទីន។ ចំណែករដ្ឋធានីប៉ាឡេស្ទីនរបស់នឹងក្លាយជារដ្ឋពេញលក្ខខណ្ឌនៅថ្ងៃខាងមុខ គឺតាំងនៅទីក្រុងហ្សេរុយសាឡិមខាងកើតដែលខ្លួនកំពុងគ្រប់គ្រងស្រាប់។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ដោយហៅផែនការនេះជាច្រកចេញពិតប្រាកដឈានទៅកាន់ដំណោះស្រាយប្រទេសពីរ លោក ត្រាំ អះអាងថា ប៉ាឡេស្ទីន នឹងក្លាយជារដ្ឋពេញលេញនៅថ្ងៃខាងមុខ បើអាចបំពេញតាមលក្ខខណ្ឌក្នុងផែនការរាប់ទាំងការគ្រប់គ្រងលើកម្លាំងប្រដាប់អាវុធរបស់ខ្លួនដើម្បីធានាសុវត្ថិភាពរបស់អ៊ីស្រាអែល។ លើសពីនោះ ទាំងប៉ាឡេស្ទីន ទាំងអ៊ីស្រាអែល នឹងមានពេលចរចាបួនឆ្នាំសំដៅបង្កើតរដ្ឋប៉ាឡេស្ទីនមួយផងដែរ។
យ៉ាងណាមិញ ប៉ាឡេស្ទីន បានទាត់ចោលផែនការនេះ។ មិនមានវត្តមានតំណាងប៉ាឡេស្ទីនចូលរួមក្នុងពិធីនៅសេតវិមានឡើយ ហើយក៏គ្មានមុខក្នុងការដំណើរការព្រាងផែនការនេះដែរ។ ប្រធានាធិបតីប៉ាឡេស្ទីន Mahmud Abbas និយាយថា កិច្ចព្រមព្រៀងនេះ នឹងមិនអាចឆ្លងទៅណារួចឡើយ ហើយប្រជាជនប៉ាឡេស្ទីន នឹងទម្លាក់កិច្ចព្រមព្រៀងនេះទៅក្នុងធុងសម្រាមប្រវត្តិសាស្ត្រផងដែរ។ ចំណែកក្រុមហាម៉ាស់វិញ លើកឡើងថា ខ្លួននឹងមិនទទួលយកការបាត់បង់ទីក្រុងហ្សេរុយសាឡិមឡើយ។
បាតុកររាប់ពាន់នាក់ បានប្រមូលគ្នាតវ៉ាផែនការរបស់លោក ត្រាំ នៅតំបន់ត្រើយខាងកើត និងជ្រោយកាហ្សា។ ចំណែកប្រតិកម្មពីបរទេសវិញ មានចម្រុះគ្នា។ រុស្ស៊ីនៅសង្ស័យផែនការរបស់អាមេរិក ខណៈអារ៉ាប៊ីសាអូឌីត ចេញមុខសរសើរដែលប្រឹងប្រែងដោះស្រាយបញ្ហា។ សហភាពអឺរ៉ុបវិញ ក៏លើកឡើងថា ខ្លួននឹងសិក្សាពីផែនការរបស់អាមេរិកឲ្យពិស្ដារ៕
Tag:
អាមេរិក
អ៊ីស្រាអែល
ប៉ាឡេស្ទីន
ដូណាល់ ត្រាំ
មជ្ឈិមបូព៌ា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
