ជាតិ
អាជ្ញាធរ ស្នើពលរដ្ឋតាមបណ្តោយស្ទឹងសង្កែ កុំចេញពីផ្ទះ១ថ្ងៃ ព្រោះមានការសម្អាតមីន ក្រុមអង្គភាពកំចាត់មីនបានចុះដល់ទីតាំងដែលប្រទេះឃើញគ្រប់មិនទាន់ផ្ទះ នៅជិតស្ពានថ្មចាស់ (រូបពីរដ្ឋបាលខេត្តបាត់ដំបង)
× ភ្នំពេញ៖ រដ្ឋបាលក្រុងបាត់ដំបង ស្នើទៅប្រជាពលរដ្ឋ រស់នៅតាមបណ្ដោយផ្លូវលេខ១ ក្នុងភូមិកំពង់ក្របី ភូមិកម្មករ សង្កាត់ស្វាយប៉ោ និងតាមបណ្តោយផ្លូវលេខ១៥៩D ក្នុងភូមិរំចេក៤ សង្កាត់រតនៈ ចាប់ពីចំណុចស្ពានសម្តេច ស ខេង ដល់ ស្ពាន សម្ដេច ហ៊ុន សែន កុំឲ្យចេញពីផ្ទះ និងធ្វើចរាចរណ៍ឆ្លងកាត់ផ្លូវទាំងពីរនេះ រយៈពេល១ថ្ងៃ គឺនៅថ្ងៃទី៣០ ខែមករា ឆ្នាំ២០២០ ដោយសារតែក្រុមការងារអង្គភាពកំចាត់មីន នឹងចុះបោសសម្អាតមីន នៅទីតាំងនោះ ដែលស្ថិតនៅតាមបណ្ដោយច្រាំងស្ទឹងសង្កែ។
លោក ឆាយ ម៉ាទីណាល់ នាយករដ្ឋបាលសាលាខេត្តបាត់ដំបង បានថ្លែងប្រាប់សារព័ត៌មានថ្មីៗតាមទូរស័ព្ទថា ការស្នើឲ្យក្រុមការងារអង្គភាពកំចាត់មីន ចុះសម្អាតមីននៅទីតាំងតាមបណ្ដោយច្រាំងស្ទឹងសង្កែ គឺដោយសារក្រុមការងារកែលម្អច្រាំងស្ទឹង បានប្រទះឃើញគ្រាប់មិនទាន់ផ្ទុះ៥គ្រាប់ ដែលបន្សល់ទុកតាំងសម័យសង្គ្រាម។
លោក ឆាយ ម៉ាទីណាល់ បន្ថែមថា៖«ការកែកម្អច្រាំងស្ទឹងនេះ គឺដើម្បីរៀបចំត្រៀមអបអរសាទរពិធីបុណ្យទន្លេនៅអំឡុងខែ៣ ខាងមុខនេះ។» ទន្ទឹមនឹងនេះ លោក ស្នើឲ្យពលរដ្ឋដែលរស់នៅតាមបណ្ដោយស្ទឹងសង្កែ ចាប់ពីចំណុចស្ពានសម្តេច ស ខេង និង ស្ពានសម្ដេច ហ៊ុន សែន កុំចេញពីផ្ទះឬឆ្លងកាត់ផ្លូវ ព្រោះអាចបង្កគ្រោះថ្នាក់ជាយថាហេតុ៕
Tag:
សម្អាតមីន
កែលម្អច្រាំងស្ទឹងសង្កែ
© រក្សាសិទ្ធិដោយ thmeythmey.com