អន្តរជាតិ
ឥណ្ឌូណេស៊ី នឹងចាត់វិធានការទាំងអស់ ដើម្បីធានាថាគ្មានកូរ៉ូណាវីរុសក្នុងប្រទេស រូបភាព៖ Antara
× ឥណ្ឌូណេស៊ី នឹងចាត់វិធានការគ្រប់បែបយ៉ាង ដើម្បីធានាថា គ្មានករណីកូរ៉ូណាវីរុសកើតឡើងនៅក្នុងប្រទេស ខណៈពេលប្រទេសជិតខាងខ្លួនដូចជាសិង្ហបុរី និងម៉ាឡេស៊ី បានរកឃើញអ្នកផ្ទុកវីរុសប្រភេទថ្មី។ នេះបើតាមការអះអាងរបស់រដ្ឋមន្ត្រីសុខាភិបាលឥណ្ឌូណេស៊ី លោក Terawan Agus Putranto នៅថ្ងៃទី២៨ ខែមករា។
« គ្រប់វិធានការទាំងអស់ នឹងត្រូវធ្វើឡើង ដើម្បីប្រាកដថាគ្មានករណីផ្ទុះកូរ៉ូណាវីរុសនៅក្នុងឥណ្ឌូណេស៊ី»។ នេះជាពាក្យសម្តីរបស់លោករដ្ឋមន្ត្រីក្រសួងសុខាភិបាលឥណ្ឌូណេស៊ី ប្រាប់អ្នកកាសែត នៅក្រៅកិច្ចប្រជុំគណៈរដ្ឋមន្ត្រី។ ក្នុងន័យនេះ ឥណ្ឌូណេស៊ី បានត្រៀមមន្ទីពេទ្យរហូតដល់ទៅ ១០០កន្លែង ដើម្បីព្យាបាលអ្នកជំងឺមានផ្ទុកវីរុសប្រភេទថ្មី ហើយក៏ជាកន្លែងសម្រាប់ដាក់អ្នកជំងឺនៅដោយឡែកពីគេផងដែរ។
បើទោះបីជាឥណ្ឌូណេស៊ី មិនទាន់មានករណីផ្ទុះកូរ៉ូណាវីរុសណាមួយកើតឡើងក៏ដោយ លោករដ្ឋមន្ត្រីសុខាភិបាល បានបញ្ជាក់ថា ឥណ្ឌូណេស៊ី បានត្រៀមខ្លួនរួចរាល់ ក្នុងការដោះស្រាយវីរុសប្រភេទថ្មី ហើយមន្ទីពេទ្យ ១០០កន្លែងនេះ គឺវាគ្រប់គ្រាន់សម្រាប់ដាក់អ្នកជំងឺ នៅក្នុងដំណាក់កាលដំបូង ប្រសិនបើកូរ៉ូណាវីរុសមាននៅក្នុងឥណ្ឌូណេស៊ី។
ប្រជាជនឥណ្ឌូណេស៊ី ជាច្រើននាក់ កំពុងតែព្រួយបារម្ភពីបញ្ហានេះ ដោយសារសង្ស័យថាមានកូរ៉ូណាវីរុស អាចកើតឡើងនៅក្នុងប្រទេសរបស់ខ្លួន ស្របពេលប្រទេសជិតខាងខ្លួនដូចជាម៉ាឡេស៊ី សិង្ហបុរី បានរកឃើញវីរុសថ្មីនេះ ជាច្រើនករណី។ នៅសប្តាហ៍មុន ជនជាតិចិនម្នាក់ ដែលធ្វើការនៅការិយាល័យ Huawei នៅទីក្រុងហ្សាការតា បានប្រញាប់ទៅមន្ទីពេទ្យយ៉ាងលឿន ហើយមានប្រជាជនមួយចំនួនភ័យខ្លាចថា បុរសរូបនេះ អាចមានផ្ទុកកូរ៉ូណាវីរុស និងចម្លងទៅមនុស្សផ្សេងទៀត។
ដោយមើលពីការប្រញាប់ប្រញាល់របស់ជនជាតិចិនទៅមន្ទីពេទ្យបែបនេះ ការិយាល័យមួយចំនួននៅក្បែរនោះ បានប្រាប់ឲ្យបុគ្គលិករបស់ខ្លួនពាក់ម៉ាស់ និងនៅឲ្យឆ្ងាយពីការិយាល័យ Huawei ។ ក្រោយការពិនិត្យ អាជ្ញាធរសុខាភិបាលឥណ្ឌូណេស៊ី បានបញ្ជាក់ថា បុរសចិនរូបនេះ មានករណីឈឺបំពង់កតែប៉ុណ្ណោះ។
សូមបញ្ជាក់ថា ក្រៅពីការប្រយុទ្ធប្រឆាំងនឹងការរីករាលដាលនៃវីរុសកូរ៉ូណា និងការព្យាបាល លោករដ្ឋមន្ត្រីសុខាភិបាលឥណ្ឌូណេស៊ី ក៏បានលើកឡើង ពីបញ្ហាត្រួតពិនិត្យភ្ញៀវទេសចរចិននៅតាមអាកាសយានដ្ឋានក្នុងប្រទេសផ្សេង និងការបំពាក់កាម៉េរាកម្តៅនៅតាមអាកាសយានដ្ឋានជាដើម៕
Tag:
ឥណ្ឌូណេស៊ី
ចិន
កូរ៉ូណាវីរុស
© រក្សាសិទ្ធិដោយ thmeythmey.com