កូរ៉េខាងត្បូង រកឃើញអ្នកផ្ទុកកូរ៉ូណាវីរុសពីរករណីទៀត ខណៈពេលម៉ាឡេស៊ីកើន ១ករណី

អន្តរជាតិ

កូរ៉េខាងត្បូង រកឃើញអ្នកផ្ទុកកូរ៉ូណាវីរុសពីរករណីទៀត ខណៈពេលម៉ាឡេស៊ីកើន ១ករណី

30, Jan 2020 , 4:53 pm

រូបភាព

រូបភាព៖ AFP

ដោយ: ធៀន ភារិន្ទ

គិតត្រឹមថ្ងៃទី៣០ ខែមករា កូរ៉េខាងត្បូង បានរកឃើញអ្នកផ្ទុកកូរ៉ូណាវីរុស ២ករណីបន្ថែមទៀត ខណៈពេលម៉ាឡេស៊ី រកឃើញ១ករណី។

បើតាមមជ្ឈមណ្ឌលបង្ការ និងគ្រប់គ្រងជំងឺ កូរ៉េខាងត្បូង បានរកឃើញអ្នកផ្ទុកវីរុសកូរ៉ូណាពីរនាក់ទៀត ដែលធ្វើឲ្យប្រទេសមួយនេះ មានករណីឆ្លងកើនដល់ ៦ករណី។ ចំពោះពីរករណីចុងក្រោយនេះ មន្ត្រីជំនាញ បានអះអាងថា មានម្នាក់ គឺបានត្រលប់មកពីទីក្រុងវូហាន ហើយចំណែកករណីមួយទៀត គឺជាការឆ្លងពីមនុស្ស ទៅមនុស្ស។ ការណ៍នេះ គឺជាលើកដំបូងនៅលើទឹកកូរ៉េខាងត្បូង ដែលមានការឆ្លងពីមនុស្សទៅមនស្ស។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។

ក្នុងថ្ងៃដដែលនេះ ម៉ាឡេស៊ី បានរកឃើញកូរ៉ូណាវីរុសមួយករណីបន្ថែមទៀត ដែលនេះគឺជាករណីទី ៨ របស់ម៉ាឡេស៊ី។ បើតាមអាជ្ញាធរសុខាភិបាល ស្ត្រីវ័យ ៤៩ឆ្នាំរូបនេះ ត្រូវបានគេបញ្ជូនទៅមន្ទីពេទ្យនៅ ក្រុង Johor Bahru ប៉ុន្តែលោកស្រី មានស្ថានភាពជំងឺល្អប្រសើរនៅឡើយ។

ប្រសិនបើគ្មានការប្រែប្រួលទេ កូរ៉េខាងត្បូង នឹងបញ្ជូនយន្តហោះមួយគ្រឿង ទៅទទួលប្រជាជនរបស់ខ្លួន ដែលរស់នៅក្នុងក្រុងវូហាន នាវេលាយប់ថ្ងៃទី៣០ ខែមករា។ ការណ៍នេះ ធ្វើឡើងបន្ទាប់ពីកូរ៉េខាងត្បូង បានពន្យារពេលអស់ជាច្រើនម៉ោង ដើម្បីជជែកពិភាក្សាជាមួយអាជ្ញាធរចិន។ ក្នុងវេលាម៉ោង៨ និង ៤៥នាទីយប់ យន្តហោះនឹងចាកចេញពីអាកាសយានដ្ឋានអន្តរជាតិ Incheon ទៅយកប្រជាជនប្រមាណជា ៣០០នាក់។

សូមបញ្ជាក់ថា កូរ៉េខាងត្បូង បានគ្រោងយកយន្តហោះចំនួនពីរគ្រឿង ទៅជម្លៀសប្រជាជនរបស់ខ្លួន និងពីរគ្រឿងទៀតនៅថ្ងៃបន្ទាប់ ប៉ុន្តែត្រូវបានចិនបដិសេធ និងអនុញ្ញាតឲ្យជម្លៀសប្រជាជនតែមួយគ្រឿងប៉ុណ្ណោះ។ ម្យ៉ាងយន្តហោះត្រូវហោះចេញនៅម៉ោង ១០ព្រឹកថ្ងៃទី៣០ ខែមករា ម្លេះ ប៉ុន្តែត្រូវពន្យាររហូតដល់ម៉ោង ៨យប់។ ហេតុផលនៃការពន្យារនេះ មិនត្រូវបានមន្ត្រីកូរ៉េខាងត្បូង បញ្ជាក់ឲ្យបានច្បាស់លាស់ឡើយ៕