អន្តរជាតិ
កូរ៉ូណាវីរុស៖ ជប៉ុនឡើងដល់១៤ករណី សិង្ហបុរី១៣ អូស្ត្រាលីមាន៩ រូបថត៖ AFP
× ជប៉ុន សិង្ហបុរី អូស្ត្រាលី ក៏ដូចជាចិន សុទ្ធតែកើនករណីអ្នកមានជំងឺរលាកសួតបង្កដោយមេរោគកូរ៉ូណាប្រភេទថ្មី។ ជប៉ុនឡើងដល់១៤ករណី សិង្ហបុរីឡើងដល់១៣ និងអូស្ត្រាលីឡើងដល់៩ ស្របពេលអ្នកជំងឺសរុបឡើងដល់ជាង៨០០០នាក់ និងមានអ្នកស្លាប់១៧០នាក់ ដោយគិតត្រឹមម៉ោង១០ និង៣០នាទី ល្ងាចថ្ងៃទី៣០ ខែមករា នេះ។
ក្រោយអះអាងពីការរកឃើញអ្នកជំងឺ៣នាក់ ដែលស្ថិតក្នុងចំណោមមនុស្សជាង២០០នាក់ដែលត្រូវបានជម្លៀសពីវូហាន ទូរទស្សន៍ NHK បានអះអាងពីការរកឃើញអ្នកជំងឺបីនាក់បន្ថែមទៀតនៅជប៉ុន ដែលឲ្យចំនួនអ្នកជំងឺសរុបនៅជប៉ុន កើនដល់១៤ករណី។
អ្នកទាំងបីនាក់នោះ មាននិស្សិតចិនវ័យជាង២០ឆ្នាំម្នាក់ដែលរស់នៅក្រុងក្យូតូ បុរសបរទេសវ័យជាង៥០ឆ្នាំម្នាក់ និងស្ត្រីអ្នកនាំភ្ញៀវវ័យប្រមាណ៣០ឆ្នាំម្នាក់ ដែលបានធ្វើដំណើរទៅកាន់ខេត្តហ៊ូណាន។
នៅសិង្ហបុរី ករណីសរុបឡើងដល់១៣ បន្ទាប់ពីក្រសួងសុខាភិបាល បានអះអាងពីលទ្ធវិជ្ជមានរបស់មនុស្ស៣នាក់បន្ថែមទៀត។ អ្នកទាំងនោះ សុទ្ធតែជាស្ត្រីទាំងអស់ដែលមាន វ័យ៣១ឆ្នាំ ៣៦ឆ្នាំ និងនិងឆ្នាំ ដែលសុទ្ធតែទៅលេងសិង្ហបុរីជាមួយក្រុមគ្រួសារតាមការបរិច្ឆេទផ្សេងៗគ្នា។
នៅអូស្ត្រាលី អ្នកជំងឺទីពីរនៅរដ្ឋ Queensland ត្រូវបានតេស្តិ៍រកឃើញរោគសញ្ញា ដែលនាំឲ្យអូស្ត្រាលីទាំងមូល មានចំនួនកើនដល់៩ករណី។ បើតាមការផ្សាយរបស់ news.au.com អ្នកជំងឺទី៩នោះ ជាស្ត្រីជនជាតិចិនអាយុ៤២ឆ្នាំ មកពីក្រុងវូហាន។ គាត់ជាសមាជិកក្នុងក្រុមអ្នកទេសចរជាមួយអ្នកជំងឺបុរសវ័យ៤៤ឆ្នាំ នៅ Queensland ដូចគ្នា។
ក្រៅពីចិន និងតំបន់រដ្ឋបាលពិសេសហុងកុង ម៉ាកាវ និងតៃវ៉ាន់ ប្រទេសផ្សេងទៀតដែលមានអ្នកជំងឺកូរ៉ូណា រួមមាន ថៃ សិង្ហបុរី ជប៉ុន អូស្ត្រាលី ម៉ាឡេស៊ី បារាំង សហរដ្ឋអាមេរិក អាល្លឺម៉ង់ កូរ៉េខាងត្បូង អេមីរ៉ាតអារ៉ាប់រួម កាណាដា វៀតណាម កម្ពុជា ហ្វាំងឡង់ ណេប៉ាល់ ហ្វីលីពីន ឥណ្ឌា និងស្រីលង្កា៕
© រក្សាសិទ្ធិដោយ thmeythmey.com