អន្តរជាតិ
អាមេរិក មានករណីឆ្លងកូរ៉ូណាវីរុសពីមនុស្សទៅមនុស្សជាលើកដំបូង រូបភាព៖ Reuters
× អាជ្ញាធរសុខាភិបាលអាមេរិក នៅថ្ងៃទី៣០ ខែមករា បានប្រកាសថា អាមេរិកមានករណីឆ្លងកូរ៉ូណាវីរុសពីមនុស្សទៅមនុស្សលើកដំបូងបង្អស់ក្នុងទឹកដីរបស់ខ្លួន។ ករណីនេះ គឺជាការឆ្លងរវាងភរិយា និងស្វាមីមួយគូ ដែលរស់នៅក្នុងរដ្ឋ Illinois។
គិតមកត្រឹមពេលនេះ អាមេរិក បានរកឃើញកូរ៉ូណាវីរុសក្នុងករណីទី៦ និងជាលើកដំបូងបង្អស់នៅក្នុងទឹកដីអាមេរិក ដែលមានករណីឆ្លងពីមនុស្សទៅមនុស្ស។ អាជ្ញាធរសុខាភិបាលអាមេរិក អះអាងថា គឺជាឆ្លងពីភរិយា ដែលមានផ្ទុកកូរ៉ូណាវីរុស ទៅស្វាមី។
តាមការអះអាងរបស់មជ្ឈមណ្ឌលបង្ការ និងជំងឺរបស់អាមេរិក ជនជាតិអាមេរិក ប្រាំនាក់ បានឆ្លងវីរុសប្រភេទថ្មីនេះ បន្ទាប់ពីដំណើរកម្សាន្តទៅចិន។ ប៉ុន្តែក្នុងចំណោមអ្នកជំងឺទាំង៥នេះ មានស្ត្រីម្នាក់ផ្ទុកកូរ៉ូណាវីរុស និងបានចម្លងវីរុសនេះ ទៅស្វាមីរបស់ខ្លួន។
វេជ្ជបណ្ឌិត Allison Arwady សមាជិកគណកម្មការមួយនៅនាយកដ្ឋានសុខាភិបាល បានបញ្ជាក់ថា បើទោះបីជា មានករណីឆ្លងជាលើកដំបូងនៅក្នុងអាមេរិកក៏ដោយ វាមិនមានការប្រកាសអាសន្នណាមួយនៅក្នុងតំបន់ទេ។ ការណ៍នេះ ទំនងមកពី ករណីឆ្លងពីមនុស្សទៅមនុស្ស នៅអាមេរិកមានតិចនៅឡើយ ទើបគេមិនទាន់ប្រកាសអាសន្ន។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ដើម្បីទប់ស្កាត់ និងការពារសុវត្ថិភាពប្រជាពលរដ្ឋរបស់ខ្លួនពីការឆ្លងកូរ៉ូណាវីរុស អាមេរិក បានជម្លៀសប្រជាជនរបស់ខ្លួនពីក្រុងវូហាន ប្រទេសចិន។ ពេលនេះ អាមេរិកបានយកប្រជាពលរដ្ឋរបស់ខ្លួនទៅដាក់នៅកន្លែងដោយឡែកមួយ នៅមូលដ្ឋានទ័ពអាកាស March Air Reserve Base ក្បែរទីក្រុង Los Angeles ដើម្បីតាមដានសុខភាពរបស់ពួកគេ។ ប្រជាជនជម្លៀសនេះ ត្រូវគេដាក់នៅដោយឡែកពីគេរយៈពេល ១៤ថ្ងៃសិន ដើម្បីធានាថា អ្នកទាំងនោះមិនមានផ្ទុកកូរ៉ូណាវីរុស និងមិនមានរោគសញ្ញាផ្សេងៗ។ នេះបើតាមសម្ដីមន្ត្រីសុខាភិបាលអាមេរិកនៅថ្ងៃទី៣០ ខែមករា។
ក្រៅពីប្រជាពលរដ្ឋ អាមេរិកក៏បានជម្លៀសបុគ្គលិក និងគ្រួសារខ្លះៗ ពីស្ថានទូត ស្ថានកុងស៊ុល នៅទីក្រុងប៉េកាំង ក្រុងChengdu, ក្រុង Guangzhou, ក្រុង Shanghai និងក្រុងShenyang ផងដែរ ដើម្បីការពារសុវត្ថិភាពពីការឆ្លងកូរ៉ូណាវីរុស ដែលកំពុងផ្ទុះឡើងនៅក្នុងប្រទេសចិន៕
Tag:
អាមេរិក
ចិន
កូរ៉ូណាវីរុស
© រក្សាសិទ្ធិដោយ thmeythmey.com