ពីនេះ ពីនោះ
តើគេប្រើពាក្យ«ប្រព្រឹត្ត»និង«ប្រព្រឹត្តិ»ខុសគ្នាដូចម្តេច?
× កាលណាគេប្រើពាក្យ«ប្រព្រឹត្ត»ដោយគ្មានស្រះ«ិ»នៅលើព្យញ្ជនៈ«ត»ទេនោះ គឺមានន័យថាពាក្យនោះជាកិរិយាសព្ទ ឬគុណសព្ទ ប៉ុន្តែកាលណាគេប្រើពាក្យ«ប្រព្រឹត្តិ»ដែលមានស្រះ«ិ»នៅពីលើនោះគឺសម្គាល់ថាពាក្យនេះជានាមសព្ទ។
គួរតែចំណាំថា ពាក្យ «ប្រព្រឹត្ត» គឺសម្គាល់ថាជាកិរិយាសព្ទ ដោយមានន័យថា ធ្វើតាម ប្រតិបត្តិតាម កាន់វត្តប្រតិបត្តិ។ បើគេប្រើឃ្លាដែលមានពាក្យ«ប្រព្រឹត្ត» គឺត្រូវប្រើជាឃ្លាថា កុំប្រព្រឹត្តទុច្ចរិត(កុំធ្វើអំពើអាក្រក់)។
តាមបែបវេយ្យាករណ៍បើគេចង់បង្វែរកិរិយាសព្ទ មកជានាមសព្ទវិញ គេអាចប្រើដោយយកពាក្យ ការ ក្តី សេចក្តីឬដំណើរ មកប្រើជាមួយកិរិយាសព្ទ «ប្រព្រឹត្ត» ដោយគោរពតាមវេយ្យាករណ៍ខ្មែរ ការ ក្តី សេចក្តី ឬដំណើរ ជានាមសព្ទ គឺប្រើជាមួយកិរិយាសព្ទ គឺការប្រព្រឹត្ត,សេចក្តីប្រព្រឹត្ត ដំណើរប្រព្រឹត្ត។
បើករណីគេមិនប្រើពាក្យ ការ,សេចក្តី ឬដំណើរ នៅពីមុខនឹងពាក្យ«ប្រព្រឹត្ត» ទេនោះ គេអាចជំនួសដោយប្រើជា«ប្រព្រឹត្តិ»ក៏បាន ព្រោះវាជានាមសព្ទស្រាប់។ បើមិនចង់ឲ្យមានការភ័ន្តច្រឡំ គ្រាន់តែចងចាំថា បើប្រើកិរិយាសព្ទគឺនឹកឃើញដល់ពាក្យ «ប្រព្រឹត្ត» បើប្រើជានាមសព្ទ ឬគុណនាម គឺនឹកឃើញដល់ពាក្យ «ប្រព្រឹត្តិ»។
មានពាក្យជាច្រើនទៀតដែលពលរដ្ឋនៅប្រើបូកឡូកគ្នានៅឡើយថាពាក្យណាប្រើជាកិរិយាសព្ទ ហើយពាក្យណាប្រើជានាមសព្ទ ដូចជាពាក្យ អនុវត្ត និងអនុវត្តន៍, ទេសចរ និងទេសចរណ៍,អភិវឌ្ឃ និងអភិវឌ្ឍន៍។ល៕
© រក្សាសិទ្ធិដោយ thmeythmey.com