ជាតិ
លោកតា អៃ លោកតា អឿម ចាស់ព្រឹទ្ធិចារ្យបងប្អូនដែលលះបង់ពេលវេលាជិត៣០ឆ្នាំក្នុងការជួយជួសជុលប្រាសាទឥដ្ឋ លោកតា ស៊ឹម អឿម (ឆ្វេង) លោកតា ស៊ឹម អៃ (ស្ដាំ) អង្គុយនៅជណ្ដើរជ្រុងខាងត្បូងនៃប្រាសាទបាគង ថ្ងៃទី២១ មករា ឆ្នាំ២០២០
× សៀមរាប៖ អស់រយៈពេលជិត៣០ឆ្នាំមកហើយ ដែលលោកតា ស៊ឹម អៃ និងលោកតា ស៊ឹម អឿម បានចូលរួមបំពេញការងារជួសជុលប្រាសាទឥដ្ឋក្នុងតំបន់រមណីយដ្ឋានអង្គរ។ ច្រើនឆ្នាំមកនេះ ចាស់ព្រឹទ្ធិចារ្យទាំងពីរបានជួយជួសជុលប្រាសាទច្រើនកន្លែង ពិសេសក្រុមប្រាសាទឥដ្ឋដែលលោកតាចេះជំនាញនេះពីអ្នកជំនាញការបរទេសតាំងពីឆ្នាំ ១៩៩៣មក។ ការជួសជុលប្រាសាទឥដ្ឋមិនមែនជារឿងងាយស្រួលទេ ហើយក៏មិនសូវមានអ្នកចេះដែរ។ សម្រាប់លោកតា ដ្បិតថាវាមានការលំបាក នឿយហត់ រួមនិងប្រាក់ថ្ងៃមិនសូវបានច្រើន តែដោយសារក្ដីស្រឡាញ់ ស្ដាយ និងចង់អភិរក្សទុកសម្រាប់កូនចៅជំនាន់ក្រោយ និងយល់ថាវត្តមានប្រាសាទនេះហើយ ទើបទាក់ទាញទេសចរមកកម្ពុជាច្រើនលាននាក់ក្នុងមួយឆ្នាំៗ ទើបលោកតាប្ដេជ្ញាមិនបោះបង់ការងារនេះឡើយ។ ចាស់ព្រឹទ្ធិចារ្យអ្នកជំនាញជួសជុលប្រាសាទឥដ្ឋប្រាប់ថា នេះជាអ្វីដែលោកតាអាចជួយប្រទេសជាតិបាន ជំនួសឱ្យការកាន់អាវុធដើម្បីការពារប្រទេសជាតិ។
ព័ត៌មានពិស្ដារ សូមស្ដាប់បទសម្ភាសរវាងអ្នកនាង អ៊ីសា រ៉ហានី ដែលជួបសម្ភាសផ្ទាល់ជាមួយលោកតា អៃ និងលោកតា អឿម នៅការដ្ឋានជួសជុលប្រាសាទឥដ្ឋនៅប្រាសាទបាគង ដូចតទៅ៖
ឆ្នាំនេះ លោកតា អៃ ដែលជាបងមានអាយុ៧៥ឆ្នាំ រីឯលោកតា អឿម ជាប្អូនអាយុ៦៧ឆ្នាំ។ ទោះរាងកាយចាស់ក៏ពិតមែន តែលោកទាំងពីរនៅតែមានកម្លាំងសម្រាប់កិច្ចការអភិរក្សប្រាសាទ។ លោកទាំងពីរប្រាប់ថា មានការសោកស្ដាយ អាណិតប្រាង្គប្រាសាទខ្មែរដែលមានចំនួនច្រើនសន្ធឹក និងរងការខូចខាតច្រើនដែលត្រូវការការជួសជុលឡើងវិញ។ លោកតាថា អ្វីដែលលោកកំពុងធ្វើរាល់ថ្ងៃនេះ គឺដោយសារចិត្តនឹកស្ដាយ និងចង់ជួសជុលប្រាសាទទាំងនោះសម្រាប់កូនខ្មែរជំនាន់ក្រោយបានឃើញ ពិសេសសម្រាប់វិស័យទេសចរណ៍កម្ពុជាទាំងមូល។
ជាមួយគ្នានោះ លោកតាក៏បារម្ភពីចំនួនកម្មករដែលចេះជួសជុលប្រាសាទឥដ្ឋ ថានៅមានចំនួនតិច។ លោកតាចង់ឱ្យរាជរដ្ឋាភិបាលលើកទឹកចិត្តដល់អ្នកជំនាញការឬកម្មករជួសជុលប្រាសាទទាំងអស់ ដូចជាផ្តល់ប្រាក់ខែសមរម្យ ព្រោះថាពួកគេជាមនុស្សសំខាន់ក្នុងការអភិរក្ស និងជួសជុលប្រាសាទបុរាណខ្មែរឱ្យមានព្រលឹងឡើងវិញ៕
Tag:
ប្រាសាទឥដ្ឋ
តា អៃ
តា អឿម
ប្រាសាទបាគង
ប្រាសាទលលៃ
© រក្សាសិទ្ធិដោយ thmeythmey.com