ជាតិ
សង្គមជាតិ
គណៈកម្មការជាតិ នឹងដាក់ដេញថ្លៃឈើខុសច្បាប់ជិត១០ម៉ែត្រគូប ដើម្បីប្រមូលថវិកាចូលរដ្ឋ រូបពីហ្វេសប៊ុកលោក អេង ហ៊ី អ្នកនាំពាក្យគណៈកម្មាធិការដើម្បីទប់ស្កាត់ និងបង្រ្កាបបទល្មើសធនធានធម្មជាតិ
× ភ្នំពេញ៖ អាជ្ញាធរបានឃាត់រថយន្តចំនួន៤៩១គ្រឿង ដែលបានដឹកឈើ ខុសច្បាប់ជិត១០ម៉ែត្រត្រីគុណ និងឃាត់បានជនសង្ស័យ៥៩នាក់ កាលពីឆ្នាំ២០១៩កន្លងមក។ ឈើខុសច្បាប់ដែលអាជ្ញាធរឃាត់បាន នឹងដាក់ជាការដេញថ្លៃ សម្រាប់ប្រមូលថវិកាជូនរដ្ឋ ដើម្បអភិវឌ្ឍសង្គមជាតិ។ នេះបើតាមរបាយការណ៍របស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិដែលចេញផ្សាយនៅថ្ងៃទី២ ខែកុម្ភៈ ឆ្នាំ២០២០។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស និងជាគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជាក់នៅលើគណនីហ្វេសប៊ុករបស់ខ្លួនថា គណៈកម្មការជាតិ បានចាប់យករថយន្ត៤៩១គ្រឿងពីអ្នកប្រព្រឹត្តិបទល្មើស ខណៈដែលរថយន្តកែច្នៃ ២១២គ្រឿងទៀត ត្រូវបានបំផ្ទុះ និងដុតកម្ទេចចោល។
«ឈើដែលចាប់បានខាងលើ គណៈកម្មការជាតិ កំពុងថែរក្សាមិនឱ្យបាត់ ឬឆេះដោយប្រការណាមួយឡើយ ហើយឈើនេះត្រូវបានដាក់ឱ្យដេញថ្លៃ ឬពិគ្រោះថ្លៃ ដើម្បីប្រមូលថវិកាជូនជាតិ»។ នេះជាការបញ្ជាក់ពីលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស និងជាគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។
បើតាមលោក អេង ហ៊ី អាជ្ញាធរបានទប់ស្កាត់ ការកាប់ឈើ និងការដឹកជញ្ជូនឈើដោយខុសច្បាប់ បែបទ្រង់ទ្រាយធំ មានលក្ខណៈល្អប្រសើរហើយ។ អាជ្ញាធរក៏នឹងពង្រឹងការទប់ស្កាត់សកម្មភាពការដឹកឈើតាមរយៈរថយន្តធុនតូច ដែលមានជា គោយន្ត ម៉ូតូ រទេះគោ រទេះក្របី រ៉ឺម៉ក់ជាដើម ដើម្បីចូលរួមថែរក្សាព្រៃឈើឱ្យបានគង់វង្ស សម្រាប់ជាប្រយោជន៍ជាតិ និងពិភពលោកទាំងមូល។
ដើម្បីទប់ស្កាត់ និងបង្ក្រាបបទល្មើសធនធានធម្មជាតិ គណៈកម្មាការជាតិ បានដាក់ចេញនូវវិធានការឲ្យបណ្តាអភិបាលរាជធានីខេត្ត សហការជាមួយនឹងអាជ្ញាធរដែលស្ថិតនៅក្នុងដែនសមត្ថកិច្ចខ្លួន បន្តការតាមដាន និងបង្ក្រាបបទល្មើសព្រៃឈើខុសច្បាប់ និងចុះត្រួតពិនិត្យសិប្បកម្មកែច្នៃឈើឲ្យបានញឹកញាប់ ។
គិតចាប់ពីឆ្នាំ២០១៤ ដល់ឆ្នាំ២០១៨ រដ្ឋបាលព្រៃឈើ សហការជាមួយរដ្ឋបាលថ្នាក់ក្រោមជាតិ ជាពិសេសការចូលរួមយ៉ាងសកម្មរបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ចាប់ឃាត់បទល្មើសព្រៃឈើ សត្វព្រៃ និងដីព្រៃ ៨,៦០០ករណី។ ក្នុងនោះពិន័យអន្តរកាលចំនួន ២,៨៨៤ករណី បញ្ជូនទៅតុលាការ ៥,៧១៦ករណី។ ចាប់ឃាត់ឈើមូលជ្រុង ចម្រុះប្រភេទចំនួន ១០,៦៨៣ម៉ែត្រគូប, ឈើអាចម្រុះប្រភេទ ២៤,៣១៤ម៉ែត្រគូប។ ឈើក្រញូងក្រាក់ និងក្រញូងសាច់ចំនួន ៣៦២ម៉ែត្រគូប និង២០,៥៨៤គីឡូក្រាម។ នេះបើតាមនាយកដ្ឋាននីតិកម្ម និងពង្រឹងការអនុវត្តន៍ច្បាប់នៃរដ្ឋបាលព្រៃឈើ៕
© រក្សាសិទ្ធិដោយ thmeythmey.com