នៅព្រឹកថ្ងៃចន្ទនេះ សំណាង និង សុធីរ មិនមានកាតព្វកិច្ចការងារច្រើនពេកទេ។ ដូច្នេះ ពួកគេទាំងពីរនាក់ចំណាយពេលវេលាមកពិសាកាហ្វេដូចសព្វដង។ នៅព្រឹកនេះ មិត្តភក្តិទាំងពីរជជែកគ្នារឿងសង្គមជំនួសឲ្យរឿងនយោបាយ។ ប្រធានបទនោះ គឺរឿងលេងហ្វេសប៊ុកនៅកម្ពុជា។ ហ្វេសប៊ុកកំពុងបំផ្លាញផលិតភាពការងារនៅកម្ពុជាឬ?។
សំណាង៖ អា សុធីរ!។ អ្ហែងមានមិត្តភក្តិច្រើនធ្វើការនៅក្រៅប្រទេសទាំងខ្មែរ ទាំងបរទេស។ នៅបរទេស តើក្រុមហ៊ុន ឬស្ថាប័នរដ្ឋអនុញ្ញាតឲ្យបុគ្គលិកឬមន្ត្រីលេងហ្វេសប៊ុកតាមចិត្តឬទេ?
សុធីរ៖ ម៉េចបានជាអ្ហែងសួរសំណួរនេះមកកាន់អញ?
សំណាង៖ ព្រោះនៅកម្ពុជា គេលេងគ្រប់តែគ្នា។ លេងគ្មានឈប់ ក្នុងក្រុមហ៊ុន ឬស្ថាប័នរដ្ឋខ្លះ លេងអត់ធ្វើការធ្វើងារអីទេ។ ក្រុមហ៊ុន ឬស្ថាប័នខ្លះសឹងដួលបះជើងទៅហើយ ព្រោះតែទាំងកូនចៅ ទាំងមេ នាំគ្នាលេងហ្វេសប៊ុក។ អ៊ីចឹងហើយ បានជាអញសួរថា តើនៅបរទេសដូចកម្ពុជាដែរទេ? អញបញ្ជាក់ប្រាប់អ្ហែងថា អញមិននិយាយពីកម្ពុជាទាំងមូលទេណា៎ អា សុធី។
សុធីរ៖ សំណាង! នៅអឺរ៉ុប ក្នុងប្រទេសមួយចំនួន ដូចជា នៅស្រុកបារាំង ជាដើម បុគ្គលិករដ្ឋ ឬបុគ្គលិកក្រុមហ៊ុនមិនអាចប្រើប្រាស់ទូរសព្ទសម្រាប់ទាក់ទងដោយសេរី ឬលេងហ្វេសប៊ុកដោយសេរីក្នុងម៉ោងធ្វើការងារបានឡើយ។ កន្លែងខ្លះ គេមានបទបញ្ជាផ្ទៃក្នុងរបស់គេ។ រីឯកន្លែងខ្លះទៀត អត់មានទេ តែបុគ្គលិកមានសតិសម្បជញ្ញៈខ្លួនឯងតែម្តង។
។
សំណាង៖ តើគេមានច្បាប់ហាមឃាត់ឬទេ?
សុធីរ៖ ដូចជា មិនមានជាច្បាប់អីទេ។ តែនេះ គឺជាវិន័យដែលបុគ្គលិកម្នាក់ៗត្រូវតែដឹងដោយខ្លួនឯង ឬពេលខ្លះ ក្រុមហ៊ុន ឬស្ថាប័ននីមួយៗត្រូវមានបទបញ្ជាផ្ទៃក្នុងរបស់គេ។ រឿងច្បាប់របស់រដ្ឋដូចជាមិនមានទេ សំណាង។
សំណាង៖ អត់មានច្បាប់ទេ។ ចុះបើបុគ្គលិកល្មើសនឹងបទបញ្ជាផ្ទៃក្នុង គេធ្វើដូចម្តេចដែរ?
សុធីរ៖ អូហ៍ នៅអឺរ៉ុប ថៅកែមិននិយាយច្រើនទេក្នុងក្រុមហ៊ុន។ គេប្រាប់ម្តង គេព្រមានពីរដង និងលើកទី៣ គេដេញចោលតែម្តង។
សំណាង៖ ចុះនៅស្រុកខ្មែរអាចធ្វើអ៊ីចឹងបានដែរឬទេ?
សុធីរ៖ នៅស្រុកខ្មែរ វាពិបាកបន្តិច។ ពិបាកកែទម្លាប់ហ្នឹងបន្តិច។ តែបើដេញចោល មានតែដេញច្រើនគ្នា ព្រោះ បុគ្គលិក ឬមន្ត្រី (មួយចំនួនច្រើនគួរសម) លេងហ្វេសប៊ុកទៅហើយនៅក្នុងម៉ោងការងាររបស់ខ្លួន! សំណាង! ធ្វើភ្លាមៗមិនបានទេនៅស្រុកខ្មែរ។ ត្រូវធ្វើបន្តិចម្តងៗសិន ត្រូវធ្វើឲ្យគេយល់សិន។ មន្ត្រី ឬបុគ្គលិកខ្លះ យកលេសលេងហ្វេសប៊ុកថា ធ្វើការដែរនោះ។ អានេះ គឺជារឿងដែលលំបាក និងពិបាក។ គេពិបាកដោះស្រាយរឿងនេះណាស់។ ដូច្នេះ មានតែមន្ត្រី និងបុគ្គលិកខ្លួនឯងទេដែលដឹងថា ខ្លួនឯងធ្វើការ ឬលេងហ្វេសប៊ុក៕
មុននឹងបែកគ្នាពីហាងការហ្វេ សុធីរ និងសំណាង ក៏និយាយកំប្លែងលេងដាក់គ្នាទៅវិញទៅមកថា ពួកគេក៏លេងហ្វេសប៊ុកនៅម៉ោងធ្វើការដែរ។ តែពួកគេសន្យាឈប់លេងនៅពេលខាងមុខនេះ៕