វិសាខាចាត់ទុកឆ្នាំ២០២០ជាឆ្នាំមាស និងប្តេជ្ញាខិតខំប្រឹងប្រែងស្វែងរកជើងឯកឲ្យបាន

កីឡាជាតិ

ជាតិ

វិសាខាចាត់ទុកឆ្នាំ២០២០ជាឆ្នាំមាស និងប្តេជ្ញាខិតខំប្រឹងប្រែងស្វែងរកជើងឯកឲ្យបាន

03, Feb 2020 , 9:19 pm

រូបភាព

លោកស្រី កែ សួនសុភី (ឆ្វេង)ប្រធានក្លិបបាល់ទាត់វិសាខា

ដោយ:

ក្លិបបាល់ទាត់វិសាខាត្រូវបានបង្កើតនៅឆ្នាំ២០១៦ ក្លិបនេះបានឡើងមកលេងក្នុងក្របខណ្ឌមិត្តហ្វូនខេមបូឌានលីគនៅឆ្នាំ២០១៨ ក្រោយពួកគេទទួលបានជើងឯកក្នុងការប្រកួតលីគក្របខណ្ឌទី២។ វិសាខាបានចាត់ទុកឆ្នាំ២០២០ ជាឆ្នាំមាសសម្រាប់ខ្លួនក្នុងការប្រជែងដណ្តើមជើងឯកក្នុងពានរង្វាន់លីគកំពូល និងពានសម្តេច ហ៊ុន សែន។ ក្លិបនេះ ក៏បានផ្លាស់ប្តូរឈ្មោះកីឡដ្ឋានដែលកំពុងបំពាក់កៅអីអង្គុយបន្ថែម និងកែលម្អហេដ្ឋារចនាសម្ព័ន្ធមួយចំនួនផងដែរ។

លោកស្រី កែ សួនសុភី ប្រធានក្លិបបាល់ទាត់វិសាខា មានមោទកភាពយ៉ាងខ្លាំងចំពោះសមិទ្ធផល ដែលក្លិបសម្រេចបាននាពេលកន្លងមក បន្ទាប់ពីទទួលបានចំណាត់ថ្នាក់លេខ៣ក្នុងពានរង្វាន់លីគកំពូលឆ្នាំ២០១៨ ពីការចូលរួមលើកដំបូង និងលេខ២នៅឆ្នាំ២០១៩។ ប៉ុន្តែលទ្ធផលទាំងនេះ មិនទាន់អាចឆ្លើយតបនឹងមហិច្ឆិតាបាននៅឡើយទេ ដ្បិត លោកស្រី ចង់ឃើញវិសាខាក្លាយជាម្ចាស់ជើងឯក និងតំណាងឲ្យកម្ពុជាក្នុងការប្រកួតលើឆាកអន្តរជាតិ។

សម្រាប់ប្រធានក្លិបដែលចូលកាន់តំណែងជំនួសស្វាមី គឺលោក ស សុខា កាលពីអំឡុងខែធ្នូ ឆ្នាំ២០១៨រូបនេះ មិនគ្រាន់តែចង់ឲ្យវិសាខាក្លាយជាក្លិបមានសមត្ថភាពខ្លាំង និងល្បីល្បាញក្នុងក្របខណ្ឌជាតិប៉ុណ្ណោះទេ តែចង់ឲ្យក្លិបនេះមានសមត្ថភាពអាចប្រកួតប្រជែងជាមួយក្លិបក្នុងតំបន់ និងមានកេរ្តិ៍ឈ្មោះល្បីល្បាញនៅលើឆាកអន្តរជាតិ។

នាពិធីបង្ហាញសមាសភាពថ្នាក់ដឹកនាំ គ្រូបង្វឹក កីឡាករ និងឯកសណ្ឋានសម្រាប់ត្រៀមរដូវកាលថ្មីនៅថ្ងៃទី១ កុម្ភៈ ឆ្នាំ២០២០ នាមជ្ឈមណ្ឌលពិព័រណ៍កោះពេជ្រ លោកស្រី កែ សួនសុភី បានចាត់ទុកឆ្នាំ២០២០ ជាឆ្នាំមាសសម្រាប់ខ្លួន។ ក្នុងន័យនេះ លោកស្រី ទំនងជាជឿជាក់ថា វិសាខានឹងអាចក្លាយជាម្ចាស់ជើងឯកនៅឆ្នាំនេះ។

«ក្នុងរយៈពេល៣ឆ្នាំកន្លងមកនេះពួកយើងបានឆ្លងកាត់បទពិសោធន៍យ៉ាងច្រើន ហើយឆ្នាំនេះដែរជាឆ្នាំទី៤របស់ពួកយើងត្រូវនឹងឆ្នាំ២០២០។ ពួកយើងបាននិយាយថា ឆ្នាំនេះ គឺជាឆ្នាំមាសរបស់យើង ហើយពួកយើងជាក្រុមគ្រួសារតែមួយ នឹងខិតខំប្រឹងប្រែងស្វែងរកជើងឯកឲ្យបាន»។ លោកស្រី សួនសុភី លើកឡើងដូច្នេះ ជាមួយការជំរុញឲ្យថ្នាក់ដឹកនាំក្លិបគ្រប់ជាន់ថ្នាក់ និងកីឡាករទាំងអស់ ត្រូវខិតខំប្រឹងប្រែងឲ្យអស់ពីសមត្ថភាព ដើម្បីឈានទៅសម្រេចគោលដៅរបស់ក្លិបទៅថ្ងៃអនាគត។

លោកស្រីបានបង្ហាញអារម្មណ៍រំភើបរីករាយយ៉ាងខ្លាំង ដែលបានវិវត្តខ្លួនពីអ្នកផ្តល់កម្លាំងចិត្តដល់ស្វាមី(លោក ស សុខា)ក្លាយជាចំណែកមួយក្នុងអភិវឌ្ឍវិស័យកីឡាបាល់ទាត់នៅកម្ពុជា។ តែយ៉ាងណា លោកស្រី ចង់ឃើញស្ត្រីជាច្រើនចូលរួមប្រឡូកក្នុងវិស័យកីឡានេះ។ «នាងខ្ញុំចង់ឲ្យស្ត្រីចូលរួមនៅក្នុងវិស័យកីឡាឲ្យកាន់តែច្រើនដើម្បីជួយគ្នាលើកស្ទួយវិស័យកីឡានៅកម្ពុជាឲ្យមានការអភិវឌ្ឍន៍បន្ថែមទៀត»។ នេះជាការបន្ថែមរបស់លោកស្រី សួនសុភី។

នៅក្នុងកម្មវិធីបង្ហាញកីឡាករនិងឯកសណ្ឋាននោះដែរ ក្លិបបាល់ទាត់វិសាខាបានប្រកាសផ្លាស់ប្តូរឈ្មោះកីឡដ្ឋានពីវិសាខាទៅជាកីឡដ្ឋានព្រីនស៍ ដែលជាដៃគូឧបត្ថម្ភធំរបស់ខ្លួន។ សម្រាប់ការត្រៀមប្រជែងដណ្តើមជើងឯកក្នុងរដូវកាលថ្មី យើងសង្កេតវិសាខាបាននាំចូលកីឡាករកម្ពុជា និងបរទេសមួយចំនួន និងតែងតាំងគ្រូបង្វឹកថ្មីផងដែរ។

ជាមួយគ្នានេះ វិសាខា បានជួសជុលកែលម្អហេដ្ឋារចនាសម្ព័ន្ធមួយចំនួនដូចជាបំពាក់ប្រព័ន្ធស្រោចទឹកដោយស្វ័យប្រវត្តិនៅក្នុងទីលាន និងបំពាក់កៅអីអង្គុយបន្ថែម ដើម្បីឆ្លើយតបនឹងកំណើនអ្នកគាំទ្រ។ បើតាមលោក រ៉ា នូវិបុត្រ នាយកប្រតិបត្តិក្លិបបាល់ទាត់វិសាខា ក្រោយការបំពាក់កៅអីបន្ថែម ទីលានបាល់ទាត់វិសាខាអាចផ្ទុកអ្នកទស្សនាពី៧ទៅ៨ពាន់នាក់ ខណៈបច្ចុប្បន្នផ្ទុកបានតែ៥ពាន់នាក់ប៉ុណ្ណោះ៕