ជាតិ
ទីលានបដិសណ្ឋារកិច្ចមុខអង្គរវត្តគ្រោងនឹងបញ្ចប់ការសាងសង់នៅចុងឆ្នាំ២០២០នេះ
× សៀមរាប៖ ការដ្ឋានសាងសង់ទីលានបដិសណ្ឋារកិច្ចមុខប្រាសាទអង្គរវត្ត កំពុងដំណើរការដោយរលូន ហើយរំពឹងថានឹងរួចរាល់ជាស្ថាពរនៅចុងឆ្នាំ២០២០នេះ។
លោក សោម សុផារ៉ាត អនុប្រធាននាយកដ្ឋានទ្រទ្រង់បច្ចេកទេស និងគម្រោងអន្ដរវិស័យនៃអាជ្ញាធរជាតិអប្សរាបានឱ្យដឹងថា មកដល់ពេលនេះការដ្ឋានទីលានបដិសណ្ឋារកិច្ចមុខប្រាសាទអង្គរវត្ត ឬហៅថា (Parvis) សម្រេចបានប្រមាណ៥០ភាគរយហើយ។ គោលបំណងនៃការរៀបចំទីលាននេះ ដើម្បីរៀបចំចរាចរណ៍ ការលក់ដូរ ក៏ដូចជាប្រែក្លាយបរិស្ថានឱ្យមានរបៀបរៀបរយល្អនៅមុខប្រាសាទអង្គរវត្តទាំងមូល។ នេះជាការបញ្ជាក់របស់លោក សុផារ៉ាត។
លោក សោម សុផារ៉ាត ពន្យល់បន្ថែមថា គម្រោងនេះបានសិក្សាតាំងពីឆ្នាំ២០១៣មក ដោយមានការសិក្សា និងត្រួតពិនិត្យយ៉ាងយកចិត្តទុកដាក់ពីថ្នាក់ដឹកនាំអាជ្ញាធរជាតិអប្សរា អង្គការយូណេស្កូ រួមនិងអ្នកជំនាញនៃគណៈកម្មាធិការអន្ដរជាតិ អាយស៊ីស៊ី-អង្គរ។ មកដល់ខែ កញ្ញា ឆ្នាំ២០១៩ ប្លង់មេនៃគម្រោងនេះត្រូវបានអនុម័ត ដោយអនុញ្ញាតឱ្យក្រុមហ៊ុនហ្គ្រីនអង្គរខលឈ័រ ភី-អិល-ស៊ី របស់កូរ៉េជាអ្នកស្ថាបនា ហើយរំពឹងថានឹងរួចរាល់នៅចុងឆ្នាំ២០២០។
តាមគម្រោងនៃការរៀបចំទីលាននេះ គឺមានសំណង់អាគារសរុបចំនួន២៥ ដែលមានទាំងស្ដង់លក់ម្ហូបអាហាររបស់អ្នកភូមិ អាគារផ្តល់ព័ត៌មាន អាគារតាំងបង្ហាញវត្ថុសិល្បៈវប្បធម៌ អាគារសង្គ្រោះបន្ទាន់សម្រាប់ភ្ញៀវទេសចរ អាគារលក់ផលិតផលខ្មែរ។ល។ ដែលអាគារទាំងអស់សង់ឡើងប្រកបដោយសុវត្ថិភាព និងស្ដង់ដាខ្ពស់។ ក្រោយការរៀបចំនេហះ អាជ្ញាធរជាតិអប្សរានឹងបន្តរៀបចំដាំស្មៅនិងដើមឈើបន្ថែមទៀត ក្នុងគោលដៅឱ្យបរិវេណទាំងអស់មានភាពបៃតង៕
Tag:
ទីលានបដិសណ្ឋារកិច្ច
អង្គរវត្ត
© រក្សាសិទ្ធិដោយ thmeythmey.com