ជាតិ
សង្គមជាតិ
ខេមបូចា សាទរវិធានការអប់រំអ្នកផ្សព្វផ្សាយប្រាស់ចាកវិជ្ជាជីវៈ ជាជាងវិធានការផ្លូវច្បាប់ធ្ងន់ធ្ងរ លោក ម៉ៃទិត្យ ថារ៉ា នាយកប្រតិបត្តិសម្ព័ន្ធអ្នកសារព័ត៌មានកម្ពុជា(ខេមបូចា)
× ភ្នំពេញ៖ សម្ព័ន្ធអ្នកសារព័ត៌មានកម្ពុជា(ខេមបូចា) បានសាទរប្រសាសន៍សម្តេច ហ៊ុន សែន ក្នុងការចាត់វិធានអប់រំដល់អ្នកសារព័ត៌មាន ឬក្រុមផ្សព្វផ្សាយព័ត៌មានផ្សេងៗ ដោយមិនសំដៅការដាក់គុកច្រវាក់។ ខេមបូចា បានលើកឡើងថា ការអប់រំនេះ គឺជាវិធានការសមស្រប និងមានប្រសិទ្ធភាពបំផុត ដើម្បីធានានិរន្តភាពនៃការប្រើប្រាស់សេរីភាពរបស់អ្នកសារព័ត៌មាន និងការចូលរួមរបស់ពលរដ្ឋនៅក្នុងកិច្ចការសង្គម។
ការសាទរបានធ្វើឡើងបន្ទាប់ពីសម្ព័ន្ធអ្នកសារព័ត៌មានកម្ពុជា ព្រួយបារម្ភយ៉ាងខ្លាំងដល់អ្នកសារព័ត៌មានមួយចំនួនបានប្រើប្រាស់បណ្តាញសង្គម(ហ្វេសប៊ុក) ផ្សព្វផ្សាយព័ត៌មាន ដោយមិនប្រកាន់ខ្ជាប់វិជ្ជាជីវៈ និងក្រមសីលធម៌របស់ខ្លួន ដែលជំរុញឱ្យរដ្ឋាភិបាលដាក់ទោសទណ្ឌ ឬរងការគាបសង្កត់ ដោយសារតែការរាយការណ៍របស់ពួកគេ។ ប៉ុន្តែក្តីបារម្ភនេះបានរំសាយទៅវិញ ដោយសារតែរដ្ឋាភិបាល បានជ្រើសរើសយកវិធានការអប់រំ ជាជាងវិធានការផ្លូវច្បាប់ធ្ងន់ធ្ងរ។ នេះបើយោងតាមសេចក្តីថ្លែងការណ៍របស់សម្ព័ន្ធអ្នកសារព័ត៌មានកម្ពុជា នៅថ្ងៃទី៣កុម្ភៈ។
សម្ព័ន្ធអ្នកសារព័ត៌មានកម្ពុជា បានស្រង់សម្តីរបស់សម្តេច ហ៊ុន កាលពីថ្ងៃទី៣០មករា ឆ្នាំ២០២០ ក្នុងសន្និសីទសារព័ត៌មាន នៅទីស្តីការគណៈមន្ត្រីដូច្នេះ៖ «យើងយកវិធានការអប់រំ ជាការប្រសើរជាងវិធានការផ្លូវច្បាប់ធ្ងន់ធ្ងរ... អ្វីដែលខ្ញុំថាចាត់វិធានការ គឺមិនសំដៅលើគុកច្រវាក់ទេ...»។ បើតាមសម្ព័ន្ធអ្នកសារព័ត៌មានកម្ពុជា នៅក្នុងសង្គមប្រជាធិបតេយ្យ អ្នកសារព័ត៌មានដើរតួនាទីសំខាន់ក្នុងឃ្លាំងមើល ផ្សព្វផ្សាយពីចំណុចខ្វះខាតក្នុងសង្គម ដើម្បីជំរុញឱ្យមានវឌ្ឍនភាពសង្គមប្រកបដោយចីរភាព សមភាព និងយុតិ្តធម៌សង្គម។ ការផ្សព្វផ្សាយភាពខ្វះចន្លោះ ការអនុវត្តឆកល្វែង រួមទាំងកង្វះខាតនៃការប្រតិបត្តិក្រមសីលធម៌វិជា្ជជីវៈ មិនគួរត្រូវចាត់ទុកថាបទល្មើស ដែលទាមទារឱមានទណ្ឌកម្ម កាព្រមាន ឬវិធានការផ្លូវច្បាប់ទៅលើអ្នកសារព័ត៌មានឡើយ។
លោក ម៉ៃ ទិត្យថារ៉ា នាយកប្រតិបត្តិខេមបូចា បាននិយាយដូច្នេះថា៖ «ពួកគេត្រូវការ ការអប់រំទាក់ទងនឹងវិជ្ជាជីវៈ និងក្រមសីលធម៌របស់អ្នកសារព័ត៌មាន មិនមែនវិធានការជាផ្លូវច្បាប់លើពួកគេនោះទេ។ ជាថ្មីម្តងទៀត យើងក៏ជំរុញឱ្យរដ្ឋាភិបាលបើកទូលាយឡើងវិញ នូវសេរីភាពពេញលេញដល់អ្នកសារព័ត៌មាន កុំមានការគាបសង្កត់លើសេរីភាពសារព័ត៌មាន និងទទួលយកមតិចម្រុះពីគ្រប់ភាគី»។
ទន្ទឹមនឹងគ្នានេះ លោក ក៏អំពាវនាវដល់អ្នកសារព័ត៌មានទាំងអស់ ត្រូវអនុវត្តឱ្យបានខ្ជាប់ខ្ជួននូវក្រមសីលធម៌ វិជ្ជាជីវៈ ការរាយការណ៍ព័ត៌មានពិត ឥតលំអៀង ព័ត៌មានដែលមានប្រភពត្រឹមត្រូវ និងគ្រប់ជ្រុងជ្រាយ និងពង្រឹងឱកាន់តែប្រសើរឡើងនូវការគោរពដល់សិទិ្ធរបស់អ្នកដទៃ។ ជាពិសេសសិទ្ធឯកជនភាព សិទ្ធិកុមារ ជនពិការ និងសិទ្ធិស្ត្រី ជាដើម៕
Tag:
ខេមបូចា
អ្នកកាសែត
សារព័ត៌មាន
© រក្សាសិទ្ធិដោយ thmeythmey.com