អន្តរជាតិ
ជប៉ុន ឃាត់នាវាដឹកអ្នកដំណើរ ៣៥០០នាក់ ដើម្បីពិនិត្យរកកូរ៉ូណាវីរុស នាវាទេសចរណ៍ Diamond Princess។ រូបភាព៖ Reuters
× ជប៉ុន បានឃាត់ទុកនាវាទេសចរណ៍មួយគ្រឿង ដែលមានផ្ទុកអ្នកដំណើរ ៣៥០០នាក់នៅកំពង់ផែ Yokohama នៅថ្ងៃទី៣ ខែកុម្ភៈ ដើម្បីពិនិត្យមើលកូរ៉ូណាវីរុស។ ការឃាត់ទុកនាវាដឹកអ្នកដំណើរនេះ គឺធ្វើឡើង បន្ទាប់ពីជប៉ុន បានរកឃើញករណីកូរ៉ូណាវីរុសមួយទៀតលើអ្នកដំណើរម្នាក់ ដែលធ្វើដំណើរមកពីហុងកុងកាលពីថ្ងៃទី២៥ ខែមករា។
នាវាទេសចរណ៍ធុនធំ Diamond Princess ដែលមានភ្ញៀវទេសចរចំនួន ២៥០០នាក់ និងកងនាវិកចំនួន ១០០០ នាក់ ត្រូវបានអាជ្ញាធរជប៉ុន ឃាត់ទុកបណ្តោះអាសន្ន ដើម្បីធ្វើរោគវិនិច្ឆ័យលើអ្នកដំណើរទាំងអស់ ជុំវិញកូរ៉ូណាវីរុស។ ចំណាត់ការរបស់ជប៉ុនបែបនេះ គឺធ្វើឡើងដើម្បីធានាថាកូរ៉ូណាវីរុស នឹងមិនអាចរាតត្បាតនៅជប៉ុន ដូចក្នុងប្រទេសចិន ម្យ៉ាងដើម្បីសុវត្ថិភាពរបស់ប្រជាជនជប៉ុនទាំងអស់។
ការផ្អាកការធ្វើដំណើរនាវាទេសចរណ៍ធុនធំមួយនេះ ធ្វើឡើង បន្ទាប់ពីបុរសម្នាក់វ័យ ៨០ឆ្នាំម្នាក់ ដែលបានចាកចេញពីទីក្រុងហុងក្រុង នាថ្ងៃទី២៥ ខែមករា ត្រូវបានអាជ្ញាធរជប៉ុនរកឃើញថា មានផ្ទុកកូរ៉ូណាវីរុស។
បើសម្តីរបស់អ្នកដំណើរម្នាក់ក្នុងនាវាប្រាប់ទីភ្នាក់ងារព័ត៌មានជប៉ុន Kyodo អ្នកដំណើរទាំងអស់ ត្រូវគេតម្រូវឲ្យស្នាក់នៅក្នុងបន្ទប់រៀងៗខ្លួន ដើម្បីរង់ចាំការធ្វើរោគវិនិច្ឆ័យនាថ្ងៃទី៤ ខែមករា។ ជាពិសេស ការចាកចេញរបស់អ្នកដំណើរចេញពីនាវា នឹងត្រូវពន្យារពេលរយៈពេល ២៤ម៉ោង។
នេះ មិនមែនជាលើកទីមួយទេ ដែលជប៉ុនឃាត់នាវាទេសចរណ៍ ដើម្បីធ្វើរោគវិនិច្ឆ័យអ្នកដំណើរ។ កន្លងមក នាវាទេសចរណ៍មួយ ត្រូវបានអាជ្ញាធរជប៉ុនឃាត់ទុកផងដែរ នៅកំពង់ផែក្នុងក្រុង ណាហា (Naha) ខេត្ត Okinawa ដើម្បីត្រួតពិនិត្យករណីវីរុសនេះ។
សូមបញ្ជាក់ថា ដើម្បីទប់ស្កាត់កូរ៉ូណាវីរុស និងករណីឆ្លងនៅក្នុងប្រទេស ជប៉ុនហាមឃាត់ភ្ញៀវទេសចរទាំងអស់មិនឲ្យទៅខេត្តហ៊ូប៉ី ប្រទេសចិន និងហាមឃាត់ជនជាតិចិន មកពីខេត្តហ៊ូប៉ីទាំងអស់ចូលមកជប៉ុនផងដែរ។ ចំណែកអ្នកដែលចេញរោគសញ្ញាកូរ៉ូណាវីរុសទាំងអស់ ត្រូវជប៉ុន បដិសេធមិនឲ្យចូលមកក្នុងប្រទេស។ គិតមកត្រឹមពេលនេះ ជប៉ុន បានរកឃើញអ្នកជំងឺផ្ទុកកូរ៉ូណាវីរុសមានចំនួន ២០នាក់ហើយ៕
Tag:
ជប៉ុន
កូរ៉ូណាវីរុស
© រក្សាសិទ្ធិដោយ thmeythmey.com