លោក ឌូ​ទើ​តេ ៖ ការ​ស្អប់​ជនជាតិ​ចិន​ជុំវិញ​កូ​រ៉ូ​ណា​វីរុស​នៅ​ហ្វីលីពីន ត្រូវតែ​បញ្ឈប់​
អន្តរជាតិ
លោក ឌូ​ទើ​តេ ៖ ការ​ស្អប់​ជនជាតិ​ចិន​ជុំវិញ​កូ​រ៉ូ​ណា​វីរុស​នៅ​ហ្វីលីពីន ត្រូវតែ​បញ្ឈប់​
04, Feb 2020 , 8:19 pm        
រូបភាព
ប្រធានាធិបតីហ្វីលីពីន រ៉ូ​ឌ្រី​ហ្គោ ឌូ​ទើ​តេ។ រូបភាព៖ Reuters
ប្រធានាធិបតីហ្វីលីពីន រ៉ូ​ឌ្រី​ហ្គោ ឌូ​ទើ​តេ។ រូបភាព៖ Reuters
​ប្រ​ធា​នាធ​ប​តី​ហ្វីលីពីន រ៉ូ​ឌ្រី​ហ្គោ ឌូ​ទើ​តេ នា​ថ្ងៃទី​៣ ខែកុម្ភៈ បាន​អំពាវនាវ​ឲ្យ​ប្រជាជន​របស់ខ្លួន​ទាំងអស់​ឈប់​ស្អប់ និង​រើសអើង​ជនជាតិ​ចិន ក្នុងពេល​ផ្ទុះ​កូ​រ៉ូ​ណាវី​រុស និង​បន្ទាប់ពី​មាន​ករណី​ស្លាប់​ម្នាក់ នៅ​ហ្វីលីពីន​។


 
​ការរើសអើង និង​ការ​ស្អប់ខ្ពើម​ជនជាតិ​ចិន បាន​កើនឡើង​យ៉ាងខ្លាំង​នៅ​ទីសាធារណៈ​ក្នុងប្រទេស​ហ្វីលីពីន បន្ទាប់ពី​កូ​រ៉ូ​ណាវី​រុស​ប្រភេទ​ថ្មី បាន​អុកឡុក​យ៉ាងខ្លាំង​នៅក្នុង​ប្រទេស​ចិន និង​ប្រទេស​ផ្សេងៗ ក្នុងនោះ​រួមទាំង​ហ្វីលីពីន​ផងដែរ​។ ជាក់ស្តែង នា​សកល​វិទ្យាល័យ Adamson បានស្នើ​ឲ្យ​និស្សិត​ចិន​ទាំងអស់ ស្ថិតនៅ​កន្លែង​ដោយឡែក​ពី​អ្នកដទៃ​រយៈពេល ១៤​ថ្ងៃ​សិន ដើម្បី​តាមដាន​ជំងឺ​។ ដោយសារតែ​មានការ​រិះគន់​ខ្លាំង​ពី​បញ្ហា​នេះ សកល​វិទ្យាល័យ​មួយ​នេះ បានស្នើ​បន្ថែមទៀត​ឲ្យ​សិស្ស ឬ​បុគ្គលិក​ទាំងឡាយណា ដែល​ធ្លាប់​ទៅ​ក្រុង​វូ​ហាន ឬ​តំបន់​កំណើត​វីរុស​ថ្មី​នេះ ឲ្យ​នៅ​កន្លែង​ដោយឡែក​ពី​គេ​ផងដែរ​។ 
 
​ពាក់ព័ន្ធ​នឹង​បញ្ហា​នេះ លោក រ៉ូ​ឌ្រី​ហ្គោ ឌូ​ទើ​តេ ប្រធានាធិបតី​ហ្វីលីពីន បាន​អះអាង​ដូច្នេះ​ថា​៖ « ចិន មានចិត្ត​ល្អ​ចំពោះ​យើង​[​ហ្វីលីពីន​], យើង​បានត្រឹមតែ​បង្ហាញ​ការពេញចិត្ត​សម្រាប់​ចិន​តែប៉ុណ្ណោះ​។ បញ្ឈប់​ការ​ស្អប់ខ្ពើម​នេះ​ទៅ​»​។ នេះ​បើតាម​ការចុះផ្សាយ​របស់​ទីភ្នាក់ងារ​ព័ត៌មាន Reuters​។ 
 
​តាមរយៈ​សន្និសីទកាសែត បន្ទាប់ពី​ជំនួប​ជាមួយ​ទីភ្នាក់ងារ​ទប់ស្កាត់​កូ​រ៉ូ​ណាវី​រុស លោក ឌូ​ទើ​តេ បាន​បញ្ចេញ​ជំហរ​ថា ប្រជាជន​ជាច្រើន បាន​បន្ទោស​ថា វីរុស​នេះ​បណ្តាលមកពី​ចិន ប៉ុន្តែ​មិនមែន​ទាំងអស់​ទេ វា​ក៏​អាច​ឆ្លង​មកពី​តំបន់​ផ្សេង​ផងដែរ​។ បើតាម​ប្រធានាធិបតី​ហ្វីលីពីន​វ័យ ៧៤​ឆ្នាំ​រូបនេះ បាន​បន្តថា វា​មិនមែនជា​កំហុស​របស់​ខាង​ណា​នោះទេ ទាំង​ចិន ទាំង​ហ្វីលីពីន ម្យ៉ាង​ចិន​ក៏បាន​សហការ​ជាមួយ​ហ្វីលីពីន​ផងដែរ លើ​បញ្ហា​កូ​រ៉ូ​ណាវី​រុស និង ការទប់ស្កាត់​វីរុស​ប្រភេទ​ថ្មី​។ 
 
​កន្លងមក ហ្វីលីពីន បានចេញ​ចំណាត់ការ​ហាមឃាត់​ជនបរទេស​ទាំងអស់ ដែល​មកពី​ប្រទេស​ចិន និង​ផ្អាក​ការផ្តល់​ទិដ្ឋាការ​មកដល់ សម្រាប់​ជនជាតិ​ចិន​ទាំងអស់​។ បន្ថែម​ពីលើ​នេះ លោក​ប្រធានាធិបតី​ហ្វីលីពីន  កំពុង​ពិនិត្យមើល​លទ្ធភាព ដើម្បី​ដាក់​ប្រើប្រាស់​មជ្ឈមណ្ឌល​ពិនិត្យ​សុខភាព​មួយកន្លែង ដែល​បរិច្ចាគ​ដោយ​សប្បុរសជន​ចិន ជា​កន្លែង​ដាក់​ប្រជាជន​ហ្វីលីពីន ដែល​ត្រូវបាន​គេ​ជម្លៀស​ចេញពី​ខេត្ត​ហ៊ូ​ប៉ី​ផងដែរ​៕ 

Tag:
 ហ្វីលីពីន​
  កូ​រ៉ូ​ណាវី​រុស
© រក្សាសិទ្ធិដោយ thmeythmey.com