អ្នកស្លាប់​ដោយសារ​កូ​រ៉ូ​ណា​វីរុស​ចំនួន​៨០​ភាគរយ មាន​អាយុ​លើសពី ៦០​ឆ្នាំ​
អន្តរជាតិ
អ្នកស្លាប់​ដោយសារ​កូ​រ៉ូ​ណា​វីរុស​ចំនួន​៨០​ភាគរយ មាន​អាយុ​លើសពី ៦០​ឆ្នាំ​
05, Feb 2020 , 7:39 pm        
រូបភាព
​តាម​ទិន្នន័យ​របស់​គណៈកម្មកា​រ​សុខាភិបាល​ជាតិចិន មនុស្ស​ដែល​បាន​បាត់​បង់ជីវិត ដោយសារ​ជំងឺ​រលាក​សួត​បង្កដោយ​កូ​រ៉ូ​ណាវី​រុស​ប្រភេទ​ថ្មី (2019-NoCv) ប្រមាណ​៨០​ភាគរយ​មាន​អាយុ​លើសពី ៦០​ឆ្នាំ​។

 
​គិត​ត្រឹម​ថ្ងៃទី​៥ ខែកុម្ភៈ អ្នកស្លាប់​ដោយសារ​ជំងឺ​រលាក​សួត ដែល​បង្កដោយ​កូ​រ៉ូ​ណាវី​រុស​ប្រភេទ​ថ្មី នៅ​ចិន​ទាំងអស់ មាន​ប្រមាណ​ជិត​៥០០​នាក់​។ គ្រាន់តែ​ខេត្ត​ហ៊ូ​ប៉ី​ប៉ុណ្ណោះ ចំនួន​អ្នកស្លាប់​មាន​រហូតដល់ ៩៧​ភាគរយ​ឯណោះ​។ បើតាម​លោកស្រី Jiao Yahui នាយករង​រដ្ឋបាល​សុខាភិបាល នៃ​គណៈកម្មការ​សុខាភិបាល​ជាតិចិន អត្រា​មរណភាព​ដោយសារ​ជំងឺ​រលាក​សួត ដែល​បង្កដោយ​កូ​រ៉ូ​ណាវី​រុស​ប្រភេទ​ថ្មី នៅក្នុង​ក្រុង​វូ​ហាន មាន​ចំនួន ២,១​ភាគរយ ចំណែក​នៅក្នុង​ខេត្ត​ហ៊ូ​ប៉ី​ទាំងមូល មាន​ចំនួន ៣,១​ភាគរយ​។ 
 
​ក្នុងចំណោម​អ្នកស្លាប់​ជិត​៥០០​នាក់​នៅក្នុង​ប្រទេស​ចិន ៨០​ភាគរយ​មាន​អាយុ​លើសពី ៦០​ឆ្នាំ និង​៧៥​ភាគរយ​មាន​ជំងឺ​ផ្សេងទៀត គួបផ្សំ​ជាមួយ​កូ​រ៉ូ​ណាវី​រុស​។ លើសពីនេះ អត្រា​ស្លាប់​នៅក្នុង​ប្រទេស​ចិន​នេះ គឺមាន​ចំនួន ២​ភាគ​៣ គឺជា​បុរស​។ ចំណែក​អ្នកជំងឺ​មាន​អាយុ​ក្មេង​ជាងគេ​បំផុត គឺជា​ទារក ដែលមាន​អាយុ ត្រឹមតែ​មួយខែ​ប៉ុណ្ណោះ​។ នេះ​បើតាម​ការចុះផ្សាយ​របស់​សារព័ត៌មាន CNN ។ 
 
​តាម​ការបញ្ជាក់​របស់​លោកស្រី Jiao អ្នកជំងឺ​ដែល​ផ្ទុក​កូ​រ៉ូ​ណាវី​រុស និង​ភាព​សុខភាព​ល្អប្រសើរ អាចជា​សះស្បើយ​យ៉ាងហោចណាស់​រយៈពេល ៩​ថ្ងៃ ចំណែក​អ្នកជំងឺ​មាន​ស្ថានភាព​ធ្ងន់ធ្ងរ​ត្រូវ​ប្រើពេល​ច្រើនជាង ២០​ថ្ងៃ​។ 
 
​សូមបញ្ជាក់ថា បញ្ហា​កូ​រ៉ូ​ណាវី​រុស បាន​អុកឡុក​យ៉ាងខ្លាំង​នៅក្នុង​ប្រទេស​ចិន ជាពិសេស​ខេត្ត​ហ៊ូ​ប៉ី ដែល​បង្ក​ឲ្យ​កើត​វិបត្តិ​ខ្វះ​គ្រែ​សម្រាប់​អ្នកជំងឺ និង​សម្ភារៈ​ពេទ្យ​យ៉ាងខ្លាំង​។ ដើម្បី​ដោះស្រាយ​បញ្ហា​នេះ ចិន​បាន​ខិតខំ​សាងសង់​មន្ទី​ពេទ្យ​សម្រាប់​ព្យាបាល​អ្នកជំងឺ ក្នុង​រយៈពេល​យ៉ាង​លឿន​បំផុត ចំណែក​សម្ភារៈ​ពេទ្យ ដែល​ខ្វះខាត ចិន​បាន​ទិញ​ពី​ប្រទេស​មួយចំនួន និង​ទទួល​ជំនួយ​ពី​ប្រទេសជិតខាង​ខ្លះ​៕

Tag:
 ចិន​
  កូ​រ៉ូ​ណាវី​រុស
© រក្សាសិទ្ធិដោយ thmeythmey.com