ជាតិ
សេដ្ឋកិច្ច
កូរ៉េ សន្យាផ្ដល់ជំនួយឥតសំណង សម្រាប់ប្រព័ន្ធE-Government កម្ពុជា លោក Anh Moon Suk ប្រធាននៃគណៈកម្មាធិការប្រឹក្សាយោបល់នៃប្រទេសកូរ៉េ ជួបពិភាក្សាជាមួយសម្ដេចនាយករដ្ឋមន្រ្តី ហ៊ុន សែន នាទីក្រុងសេអ៊ូល ប្រទេសកូរ៉េខាងត្បូង នៅថ្ងៃទី៥ កុម្ភៈ ២០២០
× ភ្នំពេញ៖ រដ្ឋាភិបាលកូរ៉េខាងត្បូង សន្យាផ្ដល់ជំនួយឥតសំណងដល់កម្ពុជា សម្រាប់រៀបចំប្រព័ន្ធ E-Government (រដ្ឋាភិបាលអេឡិចត្រូនិក) ក្នុងការអនុវត្តការងារតាមបែបបច្ចេកវិទ្យា ដើម្បីសម្រួលដល់ការគ្រប់គ្រងរបស់រដ្ឋាភិបាលកម្ពុជា។ លោក Anh Moon Suk ប្រធាននៃគណៈកម្មាធិការប្រឹក្សាយោបល់នៃប្រទេសកូរ៉េ បានអះអាងបែបនេះ ប្រាប់ទៅសម្ដេចនាយករដ្ឋមន្ត្រី ហ៊ុន សែន នៅក្នុងជំនួបពិភាក្សា នាទីក្រុងសេអ៊ូល នៅថ្ងៃទី៥ កុម្ភៈនេះ។
លោក Anh Moon Suk បាននិយាយថា ការប្រើប្រាស់ប្រព័ន្ធ E-Government នេះ វានឹងជួយកិច្ចការងាររបស់រដ្ឋាភិបាលកម្ពុជា នៅគ្រប់វិស័យទាំងអស់ ដោយធានាពីតម្លាភាព និងគណនេយ្យភាពសង្គម។ ដោយមើលឃើញពីតម្រូវការកម្ពុជានេះ លោក Anh Moon Suk បានអះអាងថា រដ្ឋាភិបាលកូរ៉េ នឹងជួយរៀបចំបច្ចេកទេស E-Government ដល់រដ្ឋាភិបាលកម្ពុជា។
«នៅក្នុងប្រទេសកូរ៉េគឺមានភ្នាក់ងារសង្គមព័ត៌មានជាតិរបស់កូរ៉េ និងជាស្ថាប័នទទួលខុសត្រូវមួយក្នុងការជួយដល់រដ្ឋាភិបាលកម្ពុជា ក្នុងការធ្វើយ៉ាងណាបណ្ដុះបណ្ដាលលើវិស័យ IT (Information Technology) នេះ។ ហើយក្រោយពីការសិក្សានិងពិភាក្សារួចហើយនោះ គឺខាងរដ្ឋាភិបាលកូរ៉េនឹងរៀបចំការផ្ដល់ជាជំនួយឥតសំណងដល់ប្រទេសកម្ពុជាពាក់ព័ន្ធនឹងE-Government នេះក្នុងការបណ្ដុះបណ្ដាល និងការរៀបចំផែនការមេ និងការអភិវឌ្ឍធនធានមនុស្សក្នុងវិស័យ E-Government »។ នេះបើតាមហ្វេសប៊ុកសម្ដេច ហ៊ុន សែន ដែលបានស្រង់សម្ដីប្រធាននៃគណៈកម្មាធិការប្រឹក្សាយោបល់នៃប្រទេសកូរ៉េ។
កន្លងមករដ្ឋាភិបាលកម្ពុជា ក៏បានធ្វើកិច្ចការមួយចំនួនធំហើយ ពាក់ព័ន្ធនឹង E-Government នេះ។ ប៉ុន្តែអ្វីដែលសម្ដេច ហ៊ុន សែន ចង់បាននោះបន្ថែមនោះ គឺការបណ្ដុះបណ្ដាលរៀបចំផែនការមេការ និងចែករំលែកបទពិសោធន៍ពាក់ព័ន្ធនឹង E-Government ពីកូរ៉េដល់ប្រទេសកម្ពុជា ។ ជាពិសេសការបណ្ដុះបណ្ដាលមន្ត្រី ឱ្យមានជំនាញលើការអនុវត្តប្រព័ន្ធ E-Government នេះ។ ត្រង់ចំណុចនាយករដ្ឋមន្ត្រី បានស្នើសុំឲ្យភាគីកូរ៉េស្វែងយល់ពីស្ថានភាព IT និងបច្ចេកទេស E-Government នៅប្រទេសកម្ពុជា មុននឹងការរៀបចំផែនការមេ បណ្ដុះបណ្ដាលធនធានមនុស្សនេះ។
ប្រមុខរដ្ឋាភិបាល បាននិយាយដូច្នេះថា៖«ស្វាគមន៍ជាពិសេសនៅក្នុងការរៀបចំការបណ្ដុះបណ្ដាលការរៀបចំផែនការមេ ហើយ និងស្វាគមន៍ចំពោះជំនួយពីកូរ៉េ ក្នុងការបណ្ដុះបណ្ដាលផងដែរ ដើម្បីធ្វើយ៉ាងណាឱ្យE-Government ប្រទេសកម្ពុជាមានការរីកចម្រើនមួយកម្រិតធំទៀត»។
«រដ្ឋាភិបាលកូរ៉េ ចង់ជំរុញកិច្ចសហប្រតិបត្តិការរវាងកូរ៉េ និងកម្ពុជាពាក់ព័ន្ធនឹងការងារ E-Government នេះ» ។នេះជាការបញ្ជាក់របស់លោក Anh Moon Suk ដែលបានបន្ថែមថា ប្រធានាធិបតីកូរ៉េ ក៏មានឆន្ទៈខ្ពស់ និងគាំទ្រដល់រដ្ឋាភិបាលកម្ពុជាផងដែរ។
គួរបញ្ជាក់ថា ការិយាល័យ E-Government របស់កូរ៉េ ក៏បានចុះកិច្ចព្រមព្រៀងជាមួយក្រសួងមហាផ្ទៃកម្ពុជា ពាក់ព័ន្ធនឹងការជំរុញ E-Government កន្លងមកដែរ៕
Tag:
ហ៊ុន សែន
កូរ៉េខាងត្បូង
E-Government
© រក្សាសិទ្ធិដោយ thmeythmey.com