អន្តរជាតិ
ប្រមុខ UN បង្ហាញកង្វល់ជុំវិញការរើសអើងពូជសាសន៍ ដោយសារកូរ៉ូណាវីរុស អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូតេរ៉េស។ រូបភាព៖ Xinhua
× អគ្គលេខាធិការអង្គការសហប្រជាជាតិ (UN) លោក អាន់តូនីញ៉ូ ហ្គូតេរ៉េស (Antonio Guterres) នៅថ្ងៃទី៤ ខែកុម្ភៈ បានលើកឡើងពីកង្វល់ជុំវិញការរើសអើសពូជសាសន៍ ដោយសារតែការផ្ទុះកូរ៉ូណាវីរុសនៅក្នុងប្រទេសចិន។ បើតាមលោកប្រមុខអង្គការសហប្រជាជាតិ ប្រទេសទាំងអស់ គួរតែចេះសហការគ្នា ជាជាងរើសអើសក្រុមមនុស្សដែលគ្មានកំហុស ឬជនរងគ្រោះ។
តាមរយៈសន្និសីទកាសែត នាថ្ងៃទី៤ ខែកុម្ភៈ លោក អាន់តូនីញ៉ូ ហ្គូតេរ៉េស ប្រមុខអង្គការសហប្រជាជាតិ បានលើកឡើងពីបញ្ហាការរើសអើងពូជសាសន៍ លើក្រុមមនុស្សដែលគ្មានកំហុស និងក្រុមជាតិសាសន៍ ដែលកំពុងរងគ្រោះ ដោយសារកូរ៉ូណាវីរុស។ ទោះមិននិយាយចំឈ្មោះ លោក ហ្គូតេរ៉េស ទំនងចង់សំដៅនិន្នាការស្អប់ជនជាតិចិន ក្រោយការផ្ទុះឡើងកូរ៉ូណាវីរុស។
ពាក់ព័ន្ធទៅនឹងបញ្ហានេះ លោក ហ្គូតេរ៉េស បានអំពាវនាវឲ្យមានសាមគ្គីភាពជាអន្តរជាតិ និងគាំទ្រចិនឲ្យបានខ្លាំងបំផុត ក្នុងពេលប្រទេសមួយនេះ ក៏ដូចជាប្រទេស ឬតំបន់ផ្សេងទៀតកំពុងជួបប្រឈមមុខនឹងកូរ៉ូណាវីរុស។ បើតាមលោកអគ្គលេខាធិការអង្គការសហប្រជាជាតិ ប្រទេសទាំងអស់ គួរតែចេះសហការជាមួយចិន និងប្រទេសរងគ្រោះផ្សេងទៀត ជាជាងរើសអើសពូជសាសន៍ ឬក្រុមមនុស្សដែលគ្មានកំហុស ឬជនរងគ្រោះ ដោយសារកូរ៉ូណាវីរុស។ នេះបើតាមការចុះផ្សាយរបស់ទីភ្នាក់ព័ត៌មានរដ្ឋចិន Xinhua។
លោក ហ្គូតេរ៉េស បានទទួលស្គាល់ថា ចិនបានខិតខំប្រឹងប្រែងប្រមូលធនធានរបស់ខ្លួនជាច្រើន និងសមត្ថភាពរបស់ខ្លួនយ៉ាងខ្លាំងដើម្បីឆ្លើយតប ក៏ដូចជាប្រយុទ្ធប្រឆាំងនឹងកូរ៉ូណាវីរុស។
ក្រៅពីក្តីព្រួយបារម្ភជុំវិញការប្រកាន់ពូជសាសន៍ និងការសរសើរ អគ្គលេខាធិការអង្គការសហប្រជាជាតិរូបនេះ ក៏បានបង្ហាញពីទឹកចិត្តក្នុងការគាំទ្រចិនផងដែរ ក្នុងការប្រយុទ្ធប្រឆាំងនឹងវីរុសដ៏សាហាវមួយនេះ។ លោកប្រធានអង្គការសហប្រជាជាតិ បានទទួលស្គាល់ថា កូរ៉ូណាវីរុសគឺជាបញ្ហាធំ និងមានបញ្ហាពិបាកក្នុងការដោះស្រាយ។ ដើម្បីឆ្លើយតបនឹងបញ្ហានេះ លោក ហ្គូតេរ៉េស បានសង្កត់ធ្ងន់ថា អង្គការសហប្រជាជាតិ នឹងជួយរៃអង្គាសថវិកា និងធនធានផ្សេងទៀត ដើម្បីជួយចិន។
កន្លងមក អង្គការសុខភាពពិភពលោក ដែលជាទីភ្នាក់ងារមួយរបស់អង្គការសហប្រជាជាតិ បានជួយចិនយ៉ាងសស្រាក់សស្រាំ ក្នុងការជួយចិនទប់ស្កាត់ ក៏ដូចជាផ្សព្វផ្សាយ និងចាត់វិធានការ លើកូរ៉ូណាវីរុស ដើម្បីកុំឲ្យមានការរីកសាយភាយខ្លាំងទៅកាន់ពិភពលោក។ ជាពិសេស អង្គការសុខភាពពិភពលោក ក៏បានបញ្ជូនអ្នកជំនាញរបស់ខ្លួនទៅប្រទេសចិនផងដែរ ដើម្បីទប់ស្កាត់ការរាលដាល និងគ្រប់គ្រងវីរុសថ្មីនេះ៕
Tag:
UN
ចិន
កូរ៉ូណាវីរុស
© រក្សាសិទ្ធិដោយ thmeythmey.com