កីឡាជាតិ
ជាតិ
ក្រសួងអប់រំប្តេជ្ញាលុបបំបាត់សហព័ន្ធកីឡាដែលមានមន្ត្រីដើរតួជាចោរផង និងជាប៉ូលិសផង លោក ស សុខា រដ្ឋលេខាធិការក្រសួងអប់រំយុវជននិងកីឡា ថ្លែងក្នុងកិច្ចប្រជុំបូកសរុបការងារអនុវិស័យអប់រំកាយនិងកីឡាឆ្នាំ២០១៨-២០១៩ និងលើកទិសដៅអនុវត្តឆ្នាំ២០១៩-២០២០
× ចាប់ពីឆ្នាំ២០២០នេះតទៅមិនអនុញ្ញាតឲ្យសហព័ន្ធមួយ ដែលមានមន្ត្រីដើរតួជាចោរផង និងជាប៉ូលិសផងនោះទេ។ នេះជាការប្តេជ្ញាចិត្តរបស់លោក ស សុខា រដ្ឋលេខាធិការក្រសួងអប់រំ យុវជន និងកីឡា ដែលចាត់ទុកបញ្ហានេះ ជាកត្តានាំឲ្យសហព័ន្ធឈានទៅរកការដួលរលំ និងគ្មានភាពរីកចម្រើន។
ពាក្យមន្ត្រីដើរតួជាចោរផង និងជាប៉ូលិសផងនៅពេលនេះ គឺលោក ស សុខា ចង់សំដៅដល់មន្ត្រីសហព័ន្ធដែលបានទម្លាក់ខ្លួនពីប្រធានសហព័ន្ធ ឬអគ្គលេខាធិការមកធ្វើជាគ្រូបង្វឹកពេលចេញទៅប្រកួតនៅក្រៅប្រទេសម្តងៗ។ រដ្ឋលេខាធិការក្រសួងអប់រំ យុវជននិងកីឡារូបនេះប្តេជ្ញាថា ចាប់ពីឆ្នាំ២០២០ នេះតទៅ ក្រសួងអប់រំនឹងលុបបំបាត់មិនឲ្យមានបញ្ហានេះកើតឡើងទៀតឡើយ។
«នៅឆ្នាំ២០២០នេះ ខ្ញុំប្តេជ្ញាចិត្តថានឹងមិនឲ្យមានរឿងថ្នាក់ដឹកនាំឈរឈ្មោះជាគ្រូបង្វឹកពេលចេញទៅប្រកួតនៅក្រៅប្រទេសកើតឡើងទៀតទេ គ្រូជាគ្រូ អគ្គលេខាធិការជាអគ្គលេខាធិការ ប្រធានសហព័ន្ធជាប្រធានសហព័ន្ធ មិនឲ្យដើរតួថាបើគ្មានខ្ញុំអ្វីៗត្រូវរលំ អ្វីៗមិនអាចទៅរួច»។ នេះជាការលើកឡើងរបស់លោក ស សុខា ក្នុងសន្និសីទសារព័ត៌មានក្រោយកិច្ចប្រជុំបូកសរុបការងារអនុវិស័យអប់រំកាយនិងកីឡាឆ្នាំ២០១៨-២០១៩ និងលើកទិសដៅអនុវត្តឆ្នាំ២០១៩-២០២០ កាលពីថ្ងៃទី៤ កុម្ភៈ ឆ្នាំ២០២០។
ការលើកឡើងបែបនេះរបស់លោក ស សុខា ធ្វើឡើងក្រោយមានមន្ត្រីសហព័ន្ធមួយចំនួនបានទម្លាក់ខ្លួនពីប្រធានសហព័ន្ធ ឬអគ្គលេខាធិការមកធ្វើជាគ្រូបង្វឹកពេលចេញទៅប្រកួតនៅក្រៅប្រទេស ដើម្បីផលប្រយោជន៍ផ្ទាល់ខ្លួន តាមរយៈប្រាក់រង្វាន់ពីការឈ្នះមេដាយលើឆាកអន្តរជាតិ។ ជាក់ស្តែងសហព័ន្ធកីឡាកាយវប្បកម្ម និងលំហាត់ប្រាណលោក ស៊ីម សុកមង្គលរស្មី ដែលជាប្រធានសហព័ន្ធបានឈរឈ្មោះជាគ្រូបង្វឹកក្រោយកីឡាករ សំបូរ សុភ័ណ្ឌ ឈ្នះមេដាយមាសពិភពលោក ដើម្បីទទួលបានថវិកាលើកទឹកចិត្តពីរាជរដ្ឋាភិបាល។ តែបច្ចុប្បន្ន លោក ត្រូវបានសមាជិកបោះឆ្នោតទម្លាក់ពីប្រធានសហព័ន្ធ ដែលបច្ចុប្បន្នគ្រប់គ្រងដោយលោក តឹក ប៊ុនវី ដែលអតីតអគ្គលេខាធិការ។
អតីតតំណាងរាស្ត្រប្រចាំមណ្ឌលខេត្តព្រៃវែងរូបនេះអះអាងថា បច្ចុប្បន្ននៅសល់សហព័ន្ធតិចតួចប៉ុណ្ណោះ ដែលបន្តធ្វើសកម្មភាពបែបនេះ។ ជាមួយគ្នានេះលោកប្តេជ្ញាថា លោក នឹងលុបបំបាត់បញ្ហានេះឲ្យអស់នៅឆ្នាំ២០២០ ព្រោះលោកមិនឲ្យមន្ត្រីពីរបីនាក់ធ្វើព្យុះធ្វើភ្លៀងតាមអំពើចិត្ត ដែលនាំឲ្យប៉ះពាល់ដល់ប្រយោជន៍រួម និងការអភិវឌ្ឍវិស័យនៅកម្ពុជានោះទេ។ លោកជឿជាក់ថា បើមិនធ្វើកំណែទម្រង់ ឬវះកាត់មន្ត្រីខិលខូចទេ នោះនឹងធ្វើឲ្យវិស័យកីឡានៅកម្ពុជាដើរថយក្រោយជាក់ជាមិនខាន។
លោកបន្ថែមថា កន្លងមកក្រសួងអប់រំយុវជននិងកីឡា បានលុបបំបាត់បញ្ហាប្រកាន់បក្ខពួកពេលបញ្ជូនកីឡាករទៅចូលរួមប្រកួតនៅក្រៅប្រទេសឲ្យមានភាពល្អប្រសើរផងដែរ។ តែលោកទទួលស្គាល់ថា បញ្ហានេះមិនទាន់អាចលុបបំបាត់បាន១០០ភាគរយនៅឡើយទេ តែលោកនឹងព្យាយាមលុបបំបាត់បញ្ហានេះឲ្យបាន។
«លឺតែគេលើកថា សហព័ន្ធមួយចំនួនពេលចេញទៅប្រកួតនៅក្រៅ ហៅតែមិត្តភក្តិ បងប្អូន ឬអ្នកមានសាច់ញាតិជាគ្រូ ដែលមានគុណផលមិនសូវល្អទៅជំនួសកីឡាករ ដែលគាត់មានសមត្ថភាពក្នុងការចូលរួមប្រកួត។ តែបញ្ហានឹងកន្លងមក យើងបានជម្រះរួចហើយ។ តែខ្ញុំសុំទទួលស្គាល់ពាក់ព័ន្ធសហព័ន្ធមួយ ឬអាចពីរបីមកទល់ពេលនេះ នៅសេសលស់ថា មនុស្សម្នាក់ដើរតួជាចោរផងជាប៉ូលិសផង អានឹងមិនអាចទៅរួចទៀតទេ»។ នេះជាការលើកឡើងរបស់លោក ស សុខា៕
© រក្សាសិទ្ធិដោយ thmeythmey.com