អន្តរជាតិ
ប្រធានាធិបតីអាមេរិក ដូណាល់ ត្រាំ ស្វាគមន៍មេដឹកនាំប្រឆាំងវ៉េណេស៊ុយអេឡា ហ័ន ក្វៃដូ នៅសេតវិមាន។ រូបភាព AFP
×![]()
ដោយ: តន ចាន់រិទ្ធារ៉ា
សហរដ្ឋអាមេរិក នៅថ្ងៃទី៦ ខែកុម្ភៈ បានព្រមានពីផលវិបាកបើរដ្ឋាភិបាលប្រធានាធិបតី នីកូឡាស់ ម៉ាឌុយរ៉ូ ហ៊ានប៉ះពាល់មេដឹកនាំប្រឆាំង ហ័ន ក្វៃដូ ពេលត្រឡប់ទៅស្រុកវិញនោះ។ បច្ចុប្បន្ន លោក ក្វៃដូ កំពុងស្ថិតលើទឹកដីអាមេរិកដែលទទួលស្គាល់លោកជាមេដឹកនាំស្របច្បាប់តែមួយគត់របស់វ៉េណេស៊ុយអេឡា។ ជាអ្វីដែលគេមើលឃើញថាជាការគំរាមលោក ក្វៃដូ នោះ ទីក្រុងការ៉ាកាស់ បានចាប់ឃុំខ្លួនជនជាតិវ៉េណេស៊ុយអេឡាដែលមានសញ្ជាតិអាមេរិក។
បើមិនចង់មានបញ្ហា កុំប៉ះលោក ហ័ន ក្វៃដូ ។ នេះជាសារព្រមានរបស់លោក Elliott Abrams ប្រេសិតពិសេសរដ្ឋាភិបាលអាមេរិកសម្រាប់កិច្ចវ៉េណេស៊ុយអេឡា ផ្ញើទៅកាន់របបដឹកនាំរបស់ប្រធានាធិបតី នីកូឡាស់ ម៉ាឌុយរ៉ូ ជុំវិញការវិលត្រឡប់ទៅវិញរបស់លោក ក្វៃដូ ។
លោក Abrams ដែលដឹកនាំយុទ្ធនាការទម្លាក់លោក ម៉ាឌុយរ៉ូ ចេញពីតំណែងនោះ ប្រាប់អ្នកសារព័ត៌មាននៅថ្ងៃទី៦ ខែកុម្ភៈ ថា អាមេរិក បានត្រៀមវិធានការរួចហើយ បើលោក ក្វៃដូ ជួបបញ្ហាពេលទៅវ៉េណេស៊ុយអេឡាវិញនោះ។ ប្រេសិតរូបនេះ បានផ្ដាំឲ្យរដ្ឋាភិបាលទីក្រុងការ៉ាកាស់គិតគូរឲ្យបានត្រឹមត្រូវពីសកម្មភាពរបស់ខ្លួននៅក្រោយទស្សនកិច្ចនៅអាមេរិករបស់លោក ក្វៃដូ ហើយទង្វើណាមួយប្រឆាំងអ្នកនយោបាយប្រឆាំងរូបនេះ ជាកំហុសមួយមិនខាន។
«យើងមានការបារម្ភពីរឿងនេះ ហើយសង្ឃឹមថា លោកនឹងត្រឡប់ទៅវិញដោយសុវត្ថិភាព។» នេះជាការបន្ថែមរបស់លោក Abrams ដែលផ្សាយដោយទីភ្នាក់ងារព័ត៌មាន AFP ។
ការព្រមានរបស់មន្ត្រីអាមេរិកនេះ ធ្វើឡើងបន្ទាប់ពីរដ្ឋាភិបាលលោក ម៉ាឌុយរ៉ូ ហាក់ផ្ញើសារគំរាមលោក ក្វៃដូ ដែលគ្រោងត្រឡប់ទៅវ៉េណេស៊ុយអេឡាវិញ។ អាជ្ញាធរទីក្រុងការ៉ាកាស់ បានចាប់ខ្លួនអ្នកជំនួញប្រេង៦នាក់ដែលមានសញ្ជាតិវ៉េណេស៊ុយអេឡាផង និងអាមេរិកផង បន្ទាប់បានអនុញ្ញាតឲ្យពួកគេស្ថិតក្រោមការឃុំខ្លួនក្នុងផ្ទះ។
លោក ក្វៃដូ ដែលប្រកាសខ្លួនជាមេដឹកនាំស្របច្បាប់របស់វ៉េណេស៊ុយអេឡា បានទៅដល់ទឹកដីអាមេរិក ក្នុងគោលដៅស្វែងរកការគាំទ្រដើម្បីផ្លាស់ប្ដូររបបដឹកនាំលោក ម៉ាឌុយរ៉ូ ។ មេដឹកនាំប្រឆាំងរូបនេះ បានជួបជាមួយមេដឹកនាំសំខាន់ៗរបស់អាមេរិក ហើយក៏បង្ហាញមុខគួរឲ្យភ្ញាក់ផ្អើលក្នុងការថ្លែងសុន្ទរកថាប្រចាំឆ្នាំរបស់ប្រធានាធិបតី ដូណាល់ ត្រាំ ទៅទៀត។ លោក ត្រាំ ហៅលោក ក្វៃដូ ថា មេដឹកនាំស្របច្បាប់តែមួយគត់របស់វ៉េណេស៊ុយអេឡា។
ទោះមានការដាក់សម្ពាធខ្លាំងពីអន្តរជាតិក្ដី ការប្រឹងប្រែងរបស់លោក ក្វៃដូ ក្នុងការបណ្ដេញលោក ម៉ាឌុយរ៉ូ មិនទាន់ទទួលបានលទ្ធផលផ្លែផ្កាអ្វីឡើយ។ លោក ក្វៃដូ ដែលមានប្រទេសជាង៦០ ទទួលស្គាល់នោះ ប្ដេជ្ញាចិត្តបន្តយុទ្ធនាការនេះទៀត។ ប្រាប់អ្នកសារព័ត៌មានក្រោមជំនួបជាមួយប្រមុខអង្គការប្រទេសអាមេរិក (OAS) មេដឹកនាំប្រឆាំងរូបនេះអះអាងថា ក្រុមប្រឆាំងនឹងប្រមូលមនុស្សថែមទៀតនៅប៉ុន្មានថ្ងៃខាងមុខទៀត ទោះរឿងនេះប្រឈមមុខហានិភ័យក្ដី។
Tag:
អាមេរិក
វ៉េណេស៊ុយអេឡា
ហ័ន ក្វៃដូ
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com
