ជាតិ
សង្គមជាតិ
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន
×![]()
ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីថ្ងៃទី៥ ខែកុម្ភៈ បានចុះហត្ថលេខាលើសេចក្តីសម្រេចស្តីពីការបង្កើតគណៈកម្មការសម្របសម្រួលដោះស្រាយវិវាទរបស់អ្នកសារព័ត៌មាន ដោយរូបលោកផ្ទាល់ជាប្រធាន និងមានសមាជិក២២នាក់ទៀត។
គណៈកម្មការគណៈកម្មការសម្របសម្រួលដោះស្រាយវិវាទរបស់អ្នកសារព័ត៌មាន គឺជាអ្នកសម្របសម្រួល និងដោះស្រាយបញ្ហាដែលអ្នកសារព័ត៌មានត្រូវបានគេប្តឹងខណៈពេលដែលកំពុងតែបំពេញភារកិច្ចការងារ។ ទទួលពាក្យបណ្តឹងរបស់អ្នកសារព័ត៌មានដែលមានបញ្ហានៅក្នុងបេសកម្មការងារ។ ពិគ្រោះយោបល់ ដើម្បីពិភាក្សាអំពីការខូចខាតដែលអាចកើតមានជាយថាហេតុ មុនពេលចេញផ្សាយអត្ថបទព័ត៌មានដែលទាក់ទងនឹងបញ្ហារសើប។
គណៈកម្មការនេះ នឹងសម្របសម្រួលក្នុងការបញ្ជូនពាក្យបណ្តឹងរបស់អ្នកសារព័ត៌មានវីជ្ជាជីវៈទៅក្រុមមេធាវីស្ម័គ្រចិត្តសម្តេចតេជាសែន។ ជាពិសេសតាមដានការអនុវត្តនីតិបណ្តឹងនីមួយៗតាំងពីដើមរហូតដល់ចប់ និងធ្វើរបាយការណ៍ឲ្យទៀងទាត់សម្រាប់ជូនដល់ថ្នាក់ដឹកនាំ។ នេះបើតាមសេចក្តីប្រកាសរបស់ក្រសួងព័ត៌មាន។
លោក ខៀវ កាញារីទ្ធ ផ្ទាល់ ជាប្រធាន នៃគណៈកម្មការ លោករដ្ឋលេខាធិការ សុខ ប្រសិទ្ធិ លោកអនុរដ្ឋលេខាធិការ មាស សុភ័ណ្ឌ និងលោក ផុស សុវណ្ណ ប្រតិភូរដ្ឋាភិបាលទទួលបន្ទុកអគ្គនាយកព័ត៌មាន និងសោតទស្សន៍ ជាអនុប្រធាន រីឯលោក ជា កែវចិន្តា ជាអនុប្រធានអចិន្ត្រៃយ៍។
រីឯសមាសភាពសមាជិក ក៏មានវត្តមានថ្នាក់ដឹកនាំក្លិប សមាគមផងដែរ ក្នុងនោះ មាន លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា លោក ប៉ែន បូណា ប្រធានក្លិបអ្នកកាសែតកម្ពុជា និងលោក អ៊ុំ សារិន ប្រធានសមាគមកម្ពុជាការពារអ្នកកាសែតជាដើម៕
Tag:
ក្រសួងព័ត៌មាន
វិវាទ
អ្នកសារព័ត៌មាន
© រក្សាសិទ្ធិដោយ thmeythmey.com
