ជាតិ
សុខភាព
អ្នកនាំពាក្យ៖ជនបរទេសដែលដួលសន្លប់នៅព្រលានយន្តហោះ គ្រាន់តែខ្យល់គរប៉ុណ្ណោះ
× ភ្នំពេញ៖ អ្នកនាំពាក្យក្រសួងសុខាភិបាល បានបញ្ជាក់ថា បុរសជនបរទេសដែលដួលសន្លប់នៅអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី៩ កុម្ភៈនេះ មិនមានផ្ទុកកូរ៉ូណាវីរុសទេ គឺគ្រាន់តែមានអាការខ្យល់គរប៉ុណ្ណោះ។ លោក លី សូវ៉ាន់ ពន្យល់ដូច្នេះ៖ «កូរ៉ូណាវីរុស ជាជំងឺឆ្លង។ វាមិនអាចឆ្លងចូលភ្លាម ចេញរោគសញ្ញាដួលសន្លប់ភ្លាមទេ។ ក្នុងករណីដែលដួលសន្លប់ភ្លាមៗ នេះជាប្រភេទជំងឺមិនឆ្លង គឺបញ្ហាបេះដូង បញ្ហាផ្លូវដង្ហើម និងខ្យល់គរ»។
បើតាមលោកវេជ្ជបណ្ឌិត លី សូវ៉ាន់ មន្ត្រីអាកាសយានដ្ឋានបានបញ្ជូនបុរសនោះ ទៅព្យាបាលនៅមន្ទីរពេទ្យភ្លាមៗ ហើយរូបគេក៏បានដឹងខ្លួនវិញ។
សូមបញ្ជាក់ថា កាលពីថ្ងៃទី៦ កុម្ភៈ ក្រសួងសុខាភិបាលបានប្រកាសថា បុរសជនជាតិចិនដែលមានជំងឺរលាកសួតបង្កដោយមេរោគកូរ៉ូណាប្រភេទថ្មី បានជាសះស្បើយពីជំងឺហើយ បន្ទាប់ពីវិទ្យាស្ថានប៉ាស្ទ័រធ្វើតេស្តិ៍ឃើញលទ្ធផលអវិជ្ជមានដល់ទៅ២លើក៕
© រក្សាសិទ្ធិដោយ thmeythmey.com