លោក គួច ចំរើន ត្រូវតែងតាំងជាគណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រខេត្តព្រះសីហនុ

ជាតិ

សង្គមជាតិ

លោក គួច ចំរើន ត្រូវតែងតាំងជាគណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រខេត្តព្រះសីហនុ

09, Feb 2020 , 9:30 pm

រូបភាព

លោក គួច ចំរើន អភិបាលខេត្តព្រះសីហនុ

ដោយ: ឡាយ សុភាវតី

ភ្នំពេញ៖ លោក គួច ចំរើន អភិបាលខេត្តព្រះសីហនុ ត្រូវបានតែងតែងជាប្រធាននៃគណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រខេត្តព្រះសីហនុ ជំនួសលោក យន្ត មីន អតីតអភិបាលខេត្តជាប់សមុទ្រមួយនេះ។ នេះបើតាមសេចក្តីសម្រេចរបស់គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ចុះថ្ងៃទី៣០មករា ឆ្នាំ២០២០។

សេចក្តីសម្រេចដដែល ក្រៅពីប្រធាន គណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រខេត្តព្រះសីហនុ មានសមាជិកចំនួន៣៥រូបឲ្យដឹងទៀត ដែលត្រូវទទួលខុសត្រូវលើការរៀបចំផែនការសកម្មភាព ឬគម្រោងផ្សេងៗ ទាក់ទងនឹងការគ្រប់គ្រង និងការអភិវឌ្ឍតំបនឆ្នេរសមុទ្រខេត្តព្រះសីហនុ បញ្ជូនទៅគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ដើម្បីធ្វើសមាហរណកម្មជាមួយខេត្តជាប់សមុទ្រផ្សេងទៀត។ គ្រប់គ្រង អភិរក្សតំបន់ឆ្នេរសមុទ្រខេត្តព្រះសីហនុ ឲ្យមានចីរភាព និងសមធម៌ ក៏ដូចជាពិនិត្យ តាមដានសកម្មភាពនានាដែលកើតមាននៅតំបន់ឆ្នេរ និងចាត់វិធានការចាំបាច់ ដើម្បីទប់ស្កាត់សកម្មភាពអសកម្មទាំងឡាយ ដែលអាចប៉ះពាល់ដល់បរិស្ថាន និងធនធានធម្មជាតិ នៅតំបន់ឆ្នេរសមុទ្រខេត្តព្រះសីហនុ។

ក្រៅពីនេះ គណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រខេត្តព្រះសីហនុ ត្រូវផ្ដល់យោបល់ដល់ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា នៅពេលមានសំណើសុំវិនិយោគពាក់ព័ន្ធលើឆ្នេរសមុទ្រ ឬជុំវិញតំបន់សមុទ្រ និងត្រូវធ្វើរបាយការណ៍ប្រចាំខែ ប្រចាំត្រីមាស និងប្រចាំឆ្នាំ ដល់គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា៕