អន្តរជាតិ
នយោបាយអន្តរជាតិ
កូរ៉ូណាវីរុស៖ នាយករដ្ឋមន្ត្រីឡាវ ដាក់ផែនការប្រមូលទិញម៉ាស់សម្រាប់ផ្គត់ផ្គង់ក្នុងស្រុក និងឧបត្ថម្ភឲ្យចិន
×![]()
រដ្ឋាភិបាលក្រុងវៀងចន្ទន៍ បានណែនាំឲ្យក្រសួងពាក់ព័ន្ធរបស់ខ្លួនដាក់ផែនការដើម្បីប្រមូលទិញម៉ាស់ពីក្នុងស្រុក និងក្រៅប្រទេសឲ្យបានច្រើន ដើម្បីធានាផ្គត់ផ្គង់ម៉ាស់ឲ្យបានគ្រប់គ្រាន់ ដើម្បីការពារប្រជាជនពីការឆ្លងកូរ៉ូណាវីរុស។ បន្ថែមពីក្រុងវៀងចន្ទន៍ ក៏គ្រោងផ្តល់ជំនួយជាម៉ាស់មួយចំនួនទៅកាន់ចិនផងដែរ។ 
នាយករដ្ឋមន្ត្រីឡាវ លោក ថុងលួន ស៊ីសូលីត នៅថ្ងៃ៦ កុម្ភៈ បានណែនាំឲ្យក្រសួងពាណិជ្ជកម្ម និងឧស្សាហកម្ម និងក្រសួងសុខាភិបាលរបស់ខ្លួនមានវិធានសកម្ម និងទាន់ពេលដើម្បីទប់ស្កាត់ការរីករាលដាលនៃកូរ៉ូណាវីរុសក្នុងប្រទេស។ លោកនាយករដ្ឋមន្ត្រី បានឲ្យក្រសួងទាំងពីររៀបចំទិញម៉ាស់ឲ្យបានគ្រប់គ្រាន់សម្រាប់ការប្រើប្រាស់ក្នុងស្រុក ។ នេះបើយោងតាមចុះផ្សាយរបស់សារព័ត៌មាន Vientiane Times។
តាមប្រភពព័ត៌មានដដែល លោកនាយករដ្ឋមន្ត្រី បានក្រើនរម្លឹកផង និងព្រមានផងដល់ឱសថស្ថាន និងហាងទំនិញផ្សេងៗមិនឲ្យឡើងតម្លៃម៉ាស់ ឬសម្ភារផ្សេងៗពាក់ព័ន្ធការការពារពីវីរុសថ្មី។ លោក បានបញ្ជាក់ច្បាស់ផងដែរថា ប្រសិនបើជនណាម្នាក់ប្រព្រឹត្តផ្ទុយនឹងបម្រាមនេះ នឹងត្រូវទទួលខុសត្រូវចំពោះមុខច្បាប់ ដោយរាប់បញ្ចូលទាំងទោសព្រហ្មទណ្ឌ និងអាចឈានដល់ការបិទសិទ្ធិក្នុងការបន្តអាជីវកម្មផងដែរ។
ក្រៅពីចំណាត់ម៉ឺងម៉ាត់ក្នុងស្រុកនេះ រដ្ឋាភិបាលឡាវ ក៏គ្រោងនឹងបញ្ជូនម៉ាស់ការពារមួយចំនួនដើម្បីជាជំនួយ និងធនធានផ្នែកវេជ្ជសាស្ត្រទៅកាន់ចិន តាមសមត្ថភាពដែលឡាវអាចធ្វើទៅបានផងដែរ។ ឡាវ ក៏បានកើតសរសើររដ្ឋាភិបាលចិន ដែលជូនដំណឹងដល់ឡាវ ក៏ដូចជាបណ្តាប្រទេសផ្សេងទៀតពីវីរុសថ្មីនេះ ដែលជាលទ្ធផលឡាវ អាចមានវិធានការទប់ស្កាត់បានទាន់ពេល និងមានប្រសិទ្ធភាព។
យ៉ាងណា ប្រមុខរដ្ឋាភិបាលឡាវ ក៏បានសម្តែងការសោកស្តាយចំពោះហេតុការណ៍ដែលបានកើតឡើងនៅចិន ហើយឡាវ បានបង្ហាញជំនឿចិត្តថា រដ្ឋាភិបាល នឹងអាចទប់ស្កាត់ការរីករាលដាលនៃវីរុសថ្មីនេះបាន។
គួរជម្រាបផងដែរថា ឡាវ គឺជារដ្ឋមួយរបស់អាស៊ាន និងពិភពលោក ដែលមិនទាន់មានករណីឆ្លងកូរ៉ូណាវីរុសនោះទេ ខណៈប្រទេសជិតខាងរបស់ខ្លួនរួមមានទាំងកម្ពុជា វៀតណាម និងថៃជាដើមនោះ មានករណីឆ្លងជាបន្តបន្ទាប់រួចហើយ៕
Tag:
ឡាវ
ចិន
© រក្សាសិទ្ធិដោយ thmeythmey.com
