ជាតិ
នយោបាយជាតិ
សម្តេច ស ខេង៖«មូលដ្ឋានកម្លាំងនយោបាយរបស់បក្ស គឺអំពើល្អជាមួយប្រជាជន»
× សម្តេច ស ខេង ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានក្រើនរំឭកសមាជិកគណបក្សប្រជាជនកម្ពុជារបស់លោក ឱ្យពង្រឹងគុណភាពនៃការបម្រើប្រជាជន ដើម្បីទទួលបានការគាំទ្រពីអ្នកបោះឆ្នោត។ សេចក្តីណែនាំនេះត្រូវបានធ្វើឡើងនៅក្នុងពិធីសម្ភោធអគារសាខាគណបក្សនៅក្នុងស្រុកព្រះស្តេចនៃខេត្តព្រៃវែងនាថ្ងៃសៅរ៍ទី៨ខែកុម្ភៈ។
ការបន្តកសាងមូលដ្ឋានគណបក្សដែលមានដូចជាអគារសាខាគណបក្ស និងហេដ្ឋារចនាសម្ព័ន្ធនានានៅមូលដ្ឋាន គឺបញ្ហាដែលសមាជិកគណបក្សប្រជាជនកម្ពុជាត្រូវបន្តកសាងពិតមែនហើយ។ ប៉ុន្តែសម្រាប់សម្តេច ស ខេង ដែលជាអនុប្រធានគណបក្សកាន់អំណាចផងនោះ ការស្វែងរកការគាំទ្រពីសំណាក់អ្នកដែលមិនមែនជាជាសមាជិកគណបក្ស គឺរឹតតែសំខាន់សម្រាប់ប្រជាប្រិយភាពគណបក្ស។ សម្តេចបានបញ្ជាក់ថា៖«មូលដ្ឋានក្នុងការកសាងកម្លាំងនយោបាយរបស់គណបក្ស គឺអំពើល្អជាមួយប្រជាជន។ ធ្វើអ្វីដែលការពារសិទ្ធិ និងផលប្រយោជន៍ដល់ប្រជាជន។ បើធ្វើតាមអំណាចរបស់យើង ប្រជាជនមិនគាំទ្រទេ។ គេមិនបោះឆ្នោតឱ្យយើងទេ។ យើងប្រកាន់របបបោះឆ្នោត។ មិនមែនឡើងកាន់អំណាច តាមយោធាឯណា!»។
សម្តេច ស ខេង ក៏បានដាស់តឿនដល់មន្ត្រីគណបក្សដែលកំពុងកាន់តួនាទីនៅក្នុងរដ្ឋាភិបាលផងនោះ ដោយមិនឱ្យពួកគេ គំរាមកំហែង រំលោភអំណាចលើប្រជាជននោះឡើយ៕
© រក្សាសិទ្ធិដោយ thmeythmey.com