អន្តរជាតិ
ចិន លៃលកលុយជាង១០ពាន់លានដុល្លារដើម្បីទប់ទល់កូរ៉ូណាវីរុស រូបភាព Xinhua
× ក្រសួងសេដ្ឋកិច្ចចិន នៅថ្ងៃទី៩ ខែកុម្ភៈ បានប្រកាសពីតួលេខនៃការបែងចែកលុយលើការប្រយុទ្ធប្រឆាំងកូរ៉ូណាវីរុសដែលសម្លាប់មនុស្សជាង៩០០នាក់ទៅហើយ។ បើតាមទិន្នន័យរបស់ក្រសួងសេដ្ឋកិច្ចចិន គិតត្រឹមថ្ងៃទី៨ ខែកុម្ភៈ លុយចំនួនជាង១០ពាន់លានដុល្លារ ត្រូវបានលៃលកទុកដើម្បីជួយប្រតិបត្តិការទប់ទល់ និងគ្រប់គ្រងកូរ៉ូណាវីរុស។ ចិន ក៏គ្រោងបញ្ចេញប្រមាណ៤០ពាន់លានដុល្លារដើម្បីជួយក្រុមហ៊ុនក្នុងស្រុក។
ក្នុងសេចក្ដីប្រកាសលើវេបសាយរបស់ខ្លួន ក្រសួងសេដ្ឋកិច្ចចិនអះអាងថា រដ្ឋាភិបាលគ្រប់កម្រិតទាំងអស់ បានប្រមូលទឹកប្រាក់ចំនួន៧១,៨៥ពាន់លានយ័ន ស្មើនឹង១០,២៦ពាន់លានដុល្លារ ដើម្បីជួយដល់ការទប់ស្កាត់ការរាលដាលកូរ៉ូណាវីរុសដែលផ្ទុះពីដំបូងនៅទីក្រុងវូហាន ខេត្តហ៊ូប៉ី។ ទឹកប្រាក់ទាំងនេះ នឹងត្រូវបែងចែកដើម្បីធានា ប្រជាជននៅតែអាចទទួលបានការពិនិត្យ និងព្យាបាលជំងឺរបស់ខ្លួនបានដូចធម្មតាអំឡុងពេលវិបត្តិផ្នែកសុខាភិបាលមួយនេះ។
ជាមួយគ្នានេះ ទឹកប្រាក់នេះ ក៏នឹងត្រូវប្រើប្រាស់សម្រាប់ឧបត្ថម្ភដល់ខេត្ត និងតំបន់ទាំងអស់ សំដៅធានានិរន្តភាពសាច់ប្រាក់ និងធានាថា នឹងមិនមានការខ្វះខាតលុយដើម្បីទប់ទល់ការរាតត្បាតរបស់កូរ៉ូណាវីរុសឡើយ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ខណៈមេរោគកូរ៉ូណាវីរុសបន្តរាតត្បាតមិនទាន់ស្រាកស្រាន្តនោះ រដ្ឋាភិបាលចិន ក៏បន្តចាត់វិធានការគាំទ្រការរកស៊ីក្នុងស្រុកដែលប្រឈមមុខផលប៉ះពាល់ផងដែរ។ នៅថ្ងៃទី៩ ខែកុម្ភៈ ធនាគារប្រជាជនចិន ប្រកាសថា ខ្លួននឹងបញ្ចេញលុយ៣០០ពាន់លានយ័ន ស្មើនឹង៤៣ពាន់លានដុល្លារដើម្បីជួយក្រុមហ៊ុនដែលរួមចំណែកក្នុងការប្រយុទ្ធប្រឆាំងកូរ៉ូណាវីរុសដែលបច្ចុប្បន្ននេះធ្វើឲ្យចិន និងប្រទេសជាច្រើនលើពិភពលោកឈឺក្បាលយ៉ាងខ្លាំង។
កញ្ចប់ដំបូងនៃមូលនិធិពិសេសនេះ នឹងត្រូវបញ្ចេញនៅថ្ងៃទី១០ ខែកុម្ភៈ ដែលត្រូវបញ្ចូលទៅក្នុងស្ថាប័នហិរញ្ញវត្ថុជាតិដូចជាធនាគាររដ្ឋជាដើម។ បន្ទាប់មក ទឹកប្រាក់ទាំងនេះ អាចបើកចំហដល់ក្រុមហ៊ុននានាដើម្បីខ្ចីក្នុងការងារទប់ស្កាត់ និងគ្រប់គ្រងវីរុស។ ធនាគាររដ្ឋចិននៅហ៊ូប៉ី ប៉េកាំង និងសៀងហៃជាដើម សុទ្ធតែអាចទទួលបានកញ្ចប់ពិសេសនេះ។ អនុប្រធានធនាគារប្រជាជនចិន លោក Liu Guoqiang និយាយថា វិធានការនេះ នឹងជួយក្រុមហ៊ុនទាំងនៅថ្នាក់ជាតិ និងថ្នាក់តំបន់។
សូមបញ្ជាក់ថា អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (2019-nCoV) ឡើងដល់នាក់៩១០នាក់ហើយ ពោលគឺកើនលើសចំនួនអ្នកស្លាប់ដោយសារជំងឺផ្លូវដង្ហើមស្រួចស្រាល់ (SARS) និងជំងឺផ្លូវដង្ហើមមជ្ឈិមបូព៌ា (MERS) ទៅទៀត។ អ្នកស្លាប់ស្ទើរតែទាំងអស់ស្ថិតក្នុងប្រទេសចិន ជាពិសេសក្រុងវូហាន ទីតាំងដែលផ្ទុះជំងឺដំបូង។ ក្រៅពីនោះ មាន១ករណីនៅហ្វីលីពីន និង១ករណីទៀតនៅហុងកុងដែលជាតំបន់រដ្ឋបាលពិសេស។
លើសពីនេះ អ្នកជំងឺបង្កដោយកូរ៉ូណាវីរុសនេះឡើងដល់ជាង៤០ ០០០នាក់ ដោយក្នុងនោះ ខេត្តហ៊ូប៉ីតែមួយ កើនជាង២៥០០ករណីក្នុង១ថ្ងៃ។ ជាមួយគ្នានេះ អ្នកជំងឺជាង៣០០០នាក់ បានជាសះស្បើយ ហើយត្រូវបានអនុញ្ញាតឲ្យចេញពីមន្ទីរពេទ្យ រីឯជាង៦៣០០នាក់ស្ថិតក្នុងស្ថានភាពធ្ងន់ធ្ងរ៕
© រក្សាសិទ្ធិដោយ thmeythmey.com