ពីនេះ ពីនោះ
ព័ត៍មានសុខភាព
ឧស្សាហ៍ញុាំ “សណ្ដែកបាយ” តែតិចអត់ដឹងអត្ថប្រយោជន៍អស្ចារ្យរបស់វាចំពោះសុខភាព
×![]()
ដោយ: ថ្មីៗ
ទោះបីជាភាគច្រើននៃពួកយើងស្គាល់និងឧស្សាហ៍ទទួលទានសណ្ដែកបាយ ប៉ុន្តែប្រហែលជាមិនធ្លាប់ចាប់អារម្មណ៍អំពីអត្ថប្រយោជន៍ដ៏ប្រសើររបស់វាចំពោះសុខភាពឡើយ។ ថាតើសណ្ដែកបាយអាចផ្ដល់ផលល្អៗអ្វីខ្លះ? 
ថ្ងៃនេះយើង នឹងបង្ហាញឱ្យដឹងពីមូលហេតុដែលអ្នកគួររួមបញ្ចូលសណ្ដែកបាយក្នុងរបបអាហារ ៖
១. ផ្ទុកសម្បូរទៅដោយជាតិដែក
ជាតិដែក គឺសំខាន់ណាស់សម្រាប់សុខភាពរាងកាយទាំងមូល។ អ្នកដែលខ្វះជាតិដែកច្រើនតែមានសុខភាពខ្សោយនិងពិបាកផ្ដោតអារម្មណ៍។ ជាតិដែកទទួលខុសត្រូវក្នុងការដឹកនាំអុកស៊ីសែនពេញក្នុងរាងកាយ។ ប្រសិនបើខ្វះជាតិដែកអ្នកនឹងងាយជួបប្រទះអាការៈខ្សោយសាច់ដុំ មិនសកម្ម ចង្អោរចង់ក្អួត និងអស់កម្លាំងខ្លាំង។ កង្វះជាតិដែកក៏បង្កើនហានិភ័យនៃជំងឺខ្វះគ្រាប់ឈាមក្រហមផងដែរ។ ដូច្នេះដើម្បីជាការប្រសើរកុំភ្លេចរួមបញ្ចូលសណ្ដែកបាយក្នុងរបបអាហារក៏ព្រោះវាមានផ្ទុកសម្បូរទៅដោយជាតិដែក។
២. ផ្ទុកសម្បូរទៅដោយជាតិសរសៃ
សណ្ដែកបាយជាប្រភពដ៏ប្រសើរបំផុតមួយនៃជាតិសរសៃដែលចាំបាច់សម្រាប់សុខភាពរាងកាយ។ ជាតិសរសៃជួយគ្រប់គ្រងកម្រិតនៃកូឡេស្តេរ៉ូលនិងការពារសុខភាពបេះដូង។ ជាតិសរសៃគ្រប់គ្រាន់ក្នុងរាងកាយក៏ទប់ស្កាត់ព្យាបាលអាការៈទល់លាមកផងដែរ។ ជាតិសរសៃក៏បញ្ឈប់ការស្រូបយកកូឡេស្តេរ៉ូលដែលទប់ស្កាត់បញ្ហាបេះដូងផ្សេងៗ។ វាក៏ចាំបាច់ក្នុងការសម្រុកទម្ងន់! អាហារសម្បូរទៅដោយជាតិសរសៃជួយឱ្យឆាប់ឆ្អែតនិងឆ្អែតបានយូរ។
៣. ផ្ទុកសម្បូរទៅដោយប្រូតេអ៊ីន
សណ្ដែកបាយមានផ្ទុកសម្បូរទៅដោយប្រូតេអ៊ីនគុណភាពខ្ពស់។ សណ្ដែកនេះប្រសើរណាស់សម្រាប់អ្នកមិនចូលចិត្តញ៊ាំសាច់។ ប្រូតេអ៊ីនចាំបាច់សម្រាប់សុខភាពសាច់ដុំនិងការលូតលាស់នៃក្រចក ស្បែក ព្រមទាំងសក់។ ប្រូតេអ៊ីនក៏ជួយជួសជុលកោសិកាដែលខូចខាតឡើងវិញ ហើយបង្កើនថាមពលផងដែរ។
៤. ផ្ទុកសម្បូរទៅដោយប៉ូតាស្យូម
ប៉ូតាស្យូម គឺសំខាន់ណាស់សម្រាប់រក្សាកម្រិតនៃសម្ពាធឈាមមិនឱ្យឡើងខ្ពស់ខុសប្រក្រតីនិងការពាររាងកាយពីហានិភ័យនៃជំងឺបេះដូង។ ប៉ូតាស្យូមក៏ជួយដល់ការលូតលាស់នៃឆ្អឹងនិងសាច់ដុំគួរឱ្យកត់សម្គាល់។
៥. មានផ្ទុកកាឡូរីនិងជាតិខ្លាញ់ទាប
ការទទួលទានសណ្ដែកបាយអាចជួយទប់ស្កាត់ហានិភ័យនៃជំងឺធាត់ជ្រុល ខណៈដែលសណ្ដែកនេះមានផ្ទុកកាឡូរីនិងជាតិខ្លាញ់ទាប។ ម្យ៉ាងវិញទៀតអ្នកដែលទទួលទានអាហារមានជាតិខ្លាញ់ទាបក៏មិនងាយប្រឈមមុខនឹងហានិភ័យនៃជំងឺបេះដូង ជំងឺធ្លាក់ទឹកចិត្ត និងទឹកនោមផ្អែមផងដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
