អន្តរជាតិ
ប្រធានាធិបតីចិន ស៊ី ជិនភីង ចុះត្រួតពិនិត្យកិច្ចការទប់ស្កាត់ និងគ្រប់គ្រងកូរ៉ូណាវីរុស។ រូបភាព Xinhua
×![]()
ដោយ: តន ចាន់រិទ្ធារ៉ា
ប្រធានាធិបតីចិន ស៊ី ជិនភីង នៅថ្ងៃទី១០ ខែកុម្ភៈ បានចុះត្រួតពិនិត្យដោយកិច្ចការទប់ស្កាត់ និងគ្រប់គ្រងកូរ៉ូណាវីរុសនៅរដ្ឋធានីប៉េកាំង។ នេះជាលើកដំបូងដែលលោក ស៊ី ចេញមុខផ្ទាល់ដល់ទីតាំងដើម្បីស្វែងយល់ការងារនេះ ខណៈកន្លងមកលោកបានដឹកនាំកិច្ចប្រជុំមន្ត្រីលើសង្គ្រាមប្រឆាំងកូរ៉ូណាវីរុស។ ដោយចាត់ទុកយុទ្ធនាការប្រឆាំងវីរុសនេះជាសង្គ្រាមរបស់ប្រជាជន មេដឹកនាំចិនអះអាងថា ចិននឹងទទួលជោគជ័យនៅទីបំផុត។
ដោយពាក់ម៉ាស់ការពារផងនោះ ប្រធានាធិបតីចិន ស៊ី ជិនភីង បានទៅត្រួតពិនិត្យប្រតិបត្តិការទប់ស្កាត់ និងគ្រប់គ្រងកូរ៉ូណាវីរុស សហគមន៍ប្រជាជន មន្ទីរពេទ្យដែលរ៉ាប់រងព្យាបាលអ្នកជំងឺកូរ៉ូណាវីរុស និងមជ្ឈមណ្ឌលតាមដានវីរុសនេះនៅក្នុងទីក្រុងប៉េកាំង។ លោក ស៊ី និយាយថា ស្ថានភាពបច្ចុប្បន្ននៅតែធ្ងន់ធ្ងរដដែល ប៉ុន្តែលោកបង្ហាញការជឿជាក់ថា សង្គ្រាមប្រជាជនប្រឆាំងកូរ៉ូណាវីរុសនឹងទទួលបានជោគជ័យដោយពេញលេញ។
ក្នុងដំណើរទៅកាន់មន្ទីរពេទ្យ Beijing Ditan លោក ស៊ី ប្រាប់បុគ្គលិកពេទ្យទាំងអស់ឲ្យប្រឹងប្រែងអស់ពីលទ្ធភាពដើម្បីព្យាបាលប្រជាជន បន្តអនុវត្តផែនការព្យាបាលរបស់ខ្លួន និងណែនាំឲ្យប្រជានបង្កើនការការពារខ្លួនឯង។ ពីទីនោះ លោក ស៊ី ក៏បានជជែកជាមួយក្រុមគ្រូពេទ្យនៅទីក្រុងវូហាន ខេត្តហ៊ូប៉ីតាមអនឡាញផងដែរ។ បើតាមទីភ្នាក់ងារព័ត៌មានរដ្ឋចិន Xinhua មេដឹកនាំចិនបានលើកទឹកចិត្តគ្រូពេទ្យ និងមន្ត្រីទាំងអស់បន្តការប្រយុទ្ធរបស់ពួកគេដើម្បីការពារទីក្រុង។
«វូហានជាទីក្រុងវីរបុរស។ ប្រជាជនហ៊ូប៉ី និងវូហានជាអ្នកក្លាហានដែលមិនអាចបំបែកបានដោយការលំបាក ឬគ្រោះថ្នាក់ប្រវត្តិសាស្ត្រអ្វីទាំងអស់។ ដរាបណាធ្វើការជាមួយគ្នា ប្រយុទ្ធដោយអង់អាច និងជម្នះក្ដីលំបាក យើងច្បាស់ជាអាចយកឈ្នះសង្គ្រាមប្រឆាំងកូរ៉ូណាវីរុស។» នេះជាការលើកឡើងរបស់ប្រមុខរដ្ឋចិនដែលចាត់ទុកទីក្រុងវូហាន ខេត្តហ៊ូប៉ី ជាអាទិភាពសំខាន់ជាងគេក្នុងយុទ្ធនាការប្រឆាំងវីរុសប្រភេទថ្មីនេះ។
ដូចដឹងស្រាប់ ទីក្រុងវូហាន ខេត្តហ៊ូប៉ី ជាចំណុចចាប់ផ្ដើមនៃការរាលដាលកូរ៉ូណាវីរុស។ ស្ថានការណ៍ក្នុងទីក្រុងនេះ នៅតែមិនទាន់ស្រាកស្រាន្តនៅឡើយ ខណៈអ្នកស្លាប់ និងអ្នកឆ្លងកូរ៉ូណាវីរុសប្រភេទថ្មីនេះ ចេះតែកើនឡើង។ បច្ចុប្បន្ន វូហានស្ថិតក្រោមការបិទជិតតែម្ដង ដោយអាជ្ញាធរមិនបិទការធ្វើដំណើរចេញចូលទីក្រុងដែលមានប្រជាជន១១លាននាក់នេះ ខណៈការជួយសង្គ្រោះកំពុងធ្វើឡើងយ៉ាងញាប់ដៃបំផុត។
បើគិតត្រឹមម៉ោង៧ និង៣០នាទីព្រឹកថ្ងៃអង្គារ ទី១១ ខែកុម្ភៈ អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (2019-nCoV) ឡើងដល់១០១៨នាក់ហើយ តួលេខនេះ កើនពី៩១០នាក់ កាលពីថ្ងៃម្សិលមិញ ដោយបន្ថែមករណីស្លាប់១០៨នាក់ទៀត។ ក្នុងនោះ ចំនួនអ្នកស្លាប់ដល់ទៅ១០៣ គឺនៅខេត្តហ៊ូប៉ីតែម្ដង និង៥នាក់ទៀត ដោយម្នាក់ៗនៅរដ្ឋធានីប៉េកាំង, ទីក្រុងធានជីន, ខេត្តហីឡុងជាំង, អានហ៊ុយ និងហឺណាន៕
Tag:
ចិន
ស៊ី ជិនភីង
កូរ៉ូណាវីរុស
© រក្សាសិទ្ធិដោយ thmeythmey.com
