កីឡាអន្តរជាតិ
អន្តរជាតិ
វីរបុរសប្រេស៊ីល Pele ប្រឈមបញ្ហាផ្លូវចិត្ត ដោយសារជំងឺត្រគាករ៉ាំរ៉ៃ
× Pele ហាក់ដូចជាមានអារម្មណ៍ថា «មានបញ្ហាធ្លាក់ទឹកចិត្ត» និងមិនចង់ចាកចេញពីក្នុងផ្ទះសោះ ដោយសារតែបញ្ហាជំងឺត្រគាករបស់ខ្លួន។ នេះបើតាមការអះអាងរបស់ Edinho ដែលជាកូនប្រុសបង្កើតរបស់ Pele។
ស្តេចបាល់ទាត់ប្រេស៊ីល ដែលសព្វថ្ងៃមានវ័យ៧៩ឆ្នាំ បានរងទុក្ខនឹងបញ្ហាត្រគាកតាំងពីយូរយារណាស់មកហើយ ដែលតម្រូវឲ្យលោកធ្វើលំហាត់ប្រាណដោយការដើរ។ ដោយសារតែជំងឺនេះ ភាគច្រើននៃការបង្ហាញខ្លួនជាសាធារណៈរបស់ Pele នាពេលថ្មីៗនេះគឺស្ថិតលើរទេះរុញ។
លោក Edinho បានប្រាប់ GloboEsporte.com ថា៖«គាត់ [Pele] មានការពិបាកក្នុងការចល័តទៅទីតាំងផ្សេងៗ។ គាត់បានរប្តូរត្រគាកហើយ ប៉ុន្តែអ្វីៗមិនបានធ្វើឲ្យមានភាពប្រសើរឡើងវិញនោះទេ។ ដោយសារតែពិបាកទៅណាមកណានេះហើយ ទើបធ្វើឲ្យប៉ារបស់ខ្ញុំកំពុងមានជំងឺធ្លាក់ទឹកចិត្ត»។
«គាត់ខ្មាស់អៀនគាត់មិនចង់ចេញទៅក្រៅទេ ព្រោះខ្លាចគេមើលឃើញពីស្ថានភាពយ៉ាប់យ៉ឺនរបស់គាត់ នៅពេលគាត់មានកម្មវិធីផ្សេងៗដែលតម្រូវឲ្យចេញពីផ្ទះនោះ។ គាត់ពិតជាមានការខ្មាស់អៀនខ្លាំងណាស់»។ នេះជាការបញ្ជាក់បន្ថែមរបស់ Edinho។
Pele ដែលជួយក្រុមកីឡាបាល់ទាត់ជាម្រើសជាតិប្រេស៊ីលលើកពាន World Cup ៣លើក បានចំណាយពេល ១៨ ឆ្នាំជាមួយក្រុម Santos ដោយបង្ហាញខ្លួន ១២៨១ ប្រកួត និងស៊ុតបាល់បញ្ចូលទីចំនួន១០៩១គ្រាប់។ កំណត់ត្រាស៊ុតបញ្ចូលទីដ៏ច្រើនសន្ធឹកនេះ នៅមិនទាន់មានកីឡាករណាអាចធ្វើបាននៅឡើយនោះទេមកទល់សព្វថ្ងៃ៕
© រក្សាសិទ្ធិដោយ thmeythmey.com