AFC ពិន័យគ្រូវៀតណាម៤ប្រកួត និងប្រាក់៥០០០ដុល្លារ ក្រោយរកឃើញថាប្រមាថអាជ្ញាកណ្តាលនៅស៊ីហ្គេម ២០១៩

កីឡាអន្តរជាតិ

អន្តរជាតិ

AFC ពិន័យគ្រូវៀតណាម៤ប្រកួត និងប្រាក់៥០០០ដុល្លារ ក្រោយរកឃើញថាប្រមាថអាជ្ញាកណ្តាលនៅស៊ីហ្គេម ២០១៩

11, Feb 2020 , 9:39 pm

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់អាស៊ី (AFC) ដាក់ពិន័យគ្រូបង្វឹកក្រុមជម្រើសជាតិវៀតណាមលោក Park Hang-seo ចំនួន៤ប្រកួត និងប្រាក់ ៥០០០ ដុល្លារអាមេរិក ដោយសារប្រើឥរិយាបទមិនសមរម្យកាលពីព្រឹត្តិការណ៍កីឡាស៊ីហ្គេម (SEA Games) ឆ្នាំ ២០១៩ លើកទី៣០ នៅហ្វីលីពីន។

ទង្វើរបស់លោក Park កើតឡើងអំឡុងពេលជំនួបវគ្គផ្តាច់ព្រ័ត្រវិញ្ញាសាកីឡាបាល់ទាត់បុរស រវាងវៀតណាមទល់នឹងឥណ្ឌូណេស៊ី។ គ្រូបង្វឹកសញ្ជាតិកូរ៉េខាងត្បូងរូបនេះបានប្រើកាយវិការរញ៉េរញ៉ៃដាក់លោកអជ្ញាកណ្តាលកាត់សេចក្តីនៅពេលប៉ះទង្គិតគ្នារបស់កីឡាករឥណ្ឌូណេស៊ី និងកីឡាករវៀតណាម Nguyen Trong Hoang រហូតត្រូវបានផ្តល់កាតក្រហមបណ្តេញចេញផង។

បន្ទាប់ពីបានកាតក្រហម លោក Park រិតតែសម្តែងការមិនពេញចិត្ត និងតវ៉ាតឹងសរសៃកដោយជម្លោះពាក្យសម្តីដាក់អាជ្ញាកណ្តាល និងមន្ត្រីអាជ្ញាកណ្តាលផ្សេងៗទៀត រហូតមានការអន្ត្រាគមន៍ពីសំណាក់អ្នករៀបចំការប្រកួតនេះថែមទៀតផង។

AFC កំកត់បានថាលោក Park បានប្រើពាក្យប្រមាថទៅលើអាជ្ញាកណ្តាលធ្ងន់ធ្ងរមួយ ដែលឈានដល់កម្រិតរំលោភបំពាន រហូតត្រូវផ្តន្ទាទោសតាមមាត្រា ៤៧ នៃក្រមវិន័យ និងក្រមសីលធម៌របស់ AFC។

គ្រូសញ្ជាតិកូរ៉េខាងត្បូង វ័យ៦២ឆ្នាំរូបនេះ ត្រូវ AFC ព្យួរក្នុងការប្រកួតមិត្តភាពចំនួន៤ប្រកួតដែលក្នុងនោះមានការព្យួរដោយស្វ័យប្រវត្តិមួយប្រកួតតាមរយៈការបណ្តេញចេញពីការប្រកួតវគ្គផ្តាច់ព្រ័ត្រស៊ីហ្គេមកាលពីថ្ងៃទី១០ ខែធ្នូ ឆ្នាំ២០១៩។ ក្រៅពីនេះ លោក Park ក៏ត្រូវបង់ប្រាក់ផាកពិន័យចំនួន៥០០០ដុល្លារផងដែរ ហើយ AFC ព្រមានទៀតថាបើសិនជាលោកធ្វើទង្វើបែបនេះបន្តទៀត ស្ថាប័នគ្រប់គ្រងកីឡាបាល់ទាត់ទ្វីបអាស៊ីមួយនេះ នឹងដាក់ពិន័យឲ្យធ្ងន់ធ្ងរជាងនេះទ្វេរដង។

នាជំនួបវគ្គផ្តាច់ព្រ័ត្រនោះ វៀតណាមបានយកឈ្នះឥណ្ឌូណេស៊ីក្នុងលទ្ធផល ៣-០ និងក្លាយជាម្ចាស់មេដាយមាសផ្នែកកីឡាបាល់ទាត់បុរសនៃព្រឹត្តិការណ៍កីឡាតំបន់អាស៊ានឆ្នាំ២០១៩ នៅលើទឹកដីហ្វីលីពីន។

ការប្រកួតមិត្តភាពអន្តរជាតិលើកដំបូងរបស់វៀតណាមគ្រោងនឹងធ្វើឡើងនៅខែមីនា ឆ្នាំ២០២០ ដោយត្រូវជួបអ៊ីរ៉ាក់៕