សៀមរាប៖ ស្របពេលបណ្តាប្រទេសមួយចំនួន កំពុងជួបវិបត្តិសេដ្ឋកិច្ចដោយសារការផ្ទុះឡើងនូវប្រភេទវីរុសកូរ៉ូណានៅប្រទេសចិន វិស័យទេសចរណ៍នៅខេត្តសៀមរាបក៏រងផលប៉ះពាល់ខ្លាំងដែរ។ តាមពិតទៅ វិបត្តិនេះកើតឡើងមុនការកើតមានវីរុសប្រភេទថ្មីនេះទៅទៀត ហើយការផ្ទុះឡើងនូវមេរោគថ្មីនេះ វាកាន់តែសង្កត់ករប្រតិបត្តិករទេសចសរណ៍មួយកម្រិតទៀត។
ទេសចរធ្លាក់ចុះ ចំណាយច្រើនជាងចំណូល ដែលធ្វើឱ្យអាជីវកម្មខ្លះបង្ខំចិត្តបិទទ្វារ។ ក្នុងកិច្ចប្រជុំជាមួយក្រសួងទេសចរណ៍និងវិស័យឯកជនក្នុងវិស័យទេសចរណ៍ក្នុងសប្ដាហ៍នេះ ក្រុមប្រតិបត្តិករទទូចឱ្យរាជរដ្ឋាភិបាលពិចារណារកដំណោះស្រាយជួយពួកគេក្នុងកាលៈទេសៈដ៏ពិបាកនេះ ដូចជាការមិនយកពន្ធ ការមិនយកថ្លៃអគ្គិសនី ឬទម្លាក់ការប្រាក់ធនាគារក្នុងកម្រិតមួយដែលអាចឱ្យម្ចាស់អាជីវកម្មទប់ទល់បាន ប្រសិនបើរាជរដ្ឋាភិបាលមិនចង់ឃើញវិស័យទេសចរណ៍ក្នុងខេត្តសៀមរាបបិទទ្វារជាបន្តបន្ទាប់។
បញ្ហាមួយមិនទាន់ទាំងបានដោះស្រាយផង បញ្ហាមួយទៀតក៏មកពីលើមួយជាន់ទៀត។ វីរុសកូរ៉ូណាដែលផ្ទុះឡើងនៅចុងខែធ្នូ ឆ្នាំ២០១៩ បានធ្វើឱ្យពិភពលោកទាំងមូលរង្គោះរង្គើ។ ងាកមកមើលវិស័យទេសចរណ៍ក្នុងខេត្តសៀមរាបវិញ វិបត្តិនេះធ្វើឱ្យប្រតិបត្តិករទេសចរណ៍ក្រពុលមុខមិនតិចទេ និងប្រឹងទប់អាជីវកម្មក្នុងស្ថានការណ៍ដ៏លំបាកនេះ។
បញ្ហាការកើតឡើងនៃវីរុសកូរ៉ូណា បានក្លាយជាប្រធានបទដ៏សំខាន់ក្នុងកិច្ចប្រជុំការងារទេសចរណ៍ជាមួយផ្នែកឯកជនក្នុងវិស័យទេសចរណ៍ នាថ្ងៃទី១០ កុម្ភៈ នៅរដ្ឋបាលខេត្តសៀមរាប។ កិច្ចប្រជុំនេះ បានជជែកពីបញ្ហាផលប៉ះពាល់ និងដំណោះស្រាយបន្ទាន់នានាដើម្បីអាចធ្វើបានក្នុងកាលៈទេសៈនេះ។
តំណាងវិស័យឯកជន លោក ហ្វីលីព កៅ បានធ្វើបទបង្ហាញត្រួសៗពីតួលេខទេសចរនារយៈពេលចុងក្រោយ ក៏ដូចជាការធ្លាក់ចុះទេសចរនៅឆ្នាំ២០១៩កន្លងទៅ។ ក្នុងឆ្នាំ២០១៩ មុនផ្ទុះវីរុសកូរ៉ូណា ទេសចរធ្វើដំណើរឆ្លងកាត់ព្រលានយន្តហោះអន្ដរជាតិខេត្តសៀមរាប ធ្លាក់ចុះប្រមាណ១៤ភាគរយ។ លោក ហ្វីលីព បានយកស្ថានការណ៍ធ្លាក់ចុះនេះទៅប្រៀបធៀបនឹងប្រទេសជិតខាង២ ស្របពេលដែលកម្ពុជាធ្លាក់ចុះចំនួនទេសចរ តែប្រទេសថៃ និងវៀតណាម បែរជាមានកំណើនទេសចរគួរឱ្យកត់សម្គាល់ទៅវិញ។
លោក ហ្វីលីព លើកឡើងថា៖«...យើងលើកប្រទេសជិតខាង២ គឺថៃនិងវៀតណាម ថ្មីៗថៃមានការកើនឡើង(ទេសចរ) ឆ្នាំ២០១៩ មានទេសចរ៣៩,៨លាននាក់មកប្រទេសគេ វៀតណាមកើនខ្លាំងដែរ ចឹងយើងគិតថាសៀមរាបគួរតែទទួលបានលទ្ធផលបែបនេះ ឬគួរធ្វើអ្វីខ្លះដើម្បីកែប្រែស្ថានភាពជាក់ស្ដែង...»។
ប្រធានក្លឹបប្រតិបត្តិករទេសចរណ៍សៀមរាប ហៅកាត់ថា STC ក៏បានលើកករណីច្រើនទៀតដែលក្រសួងទេសចរណ៍ សហការជាមួយវិស័យឯកជន ត្រូវរៀបចំដើម្បីអភិវឌ្ឍន៍ទេសចរណ៍ឱ្យមានភាពល្អប្រសើរ និងឆ្លើយតបតាមតម្រូវការរបស់ទេសចរ។ សម្រាប់លោក ហ្វីលីព សៀមរាបនៅតែជាទីផ្សារល្អសម្រាប់ភ្ញៀវទេសចរ ហើយនៅខ្វះធនធានសម្រាប់បំពេញឱ្យទេសចរ។
ក្នុងស្ថានការណ៍នៃការផ្ទុះឡើងនៃវីរុសកូរ៉ូណានេះ ម្ចាស់អាជីវកម្មជាច្រើនកំពុងប្រឈមមុខនឹងការខាតបង់ ខណៈដែលគ្មានភ្ញៀវ ហើយការចំណាយច្រើនជាងចំណូល។ លោក ហ្វីលីព បានលើកករណីមួយចំនួនដែលរដ្ឋាភិបាលគួរពិចារណាជួយវិស័យឯកជន ដើម្បីស្រោចស្រង់ការខាតបង់ពួកគេក្នុងស្ថានការណ៍ដ៏លំបាកនេះ។ ប្រតិបត្តិករទេសចរណ៍ស្នើឱ្យរដ្ឋាភិបាកពិចារណាមិនយកតម្លៃអគ្គិសនី ឬពន្ធដា ហើយសម្រួលដល់ធនាគារ ឱ្យពន្យារពេលការបង់ប្រាក់ថ្លៃដើមដែលម្ចាស់អាជីវកម្មមួយចំនួនធំខ្ចី និងបញ្ចុះតម្លៃការប្រាក់៥០ភាគរយក្នុងឆ្នាំ២០២០នេះ។ ជាម្ចាស់សណ្ឋាគារមួយរូប លោក ហ្វីលីព បានលើកពីប្រទេសមួយចំនួន ដែលរដ្ឋាភិបាលបានបញ្ចេញវិធានការភ្លាមៗ ជួយវិស័យឯកជនក្នុងស្ថានការណ៍ដូចគ្នានេះ។
បន្ថែមពីនេះ លោក ហ្វីលីព ក៏ស្នើឱ្យក្រុមហ៊ុនអាកាសចរណ៍មួយចំនួនពិចារណាបញ្ចុះតម្លៃ៥០ភាគរយក្នុងការហោះហើរមកកាន់ខេត្តសៀមរាបផងដែរ ក្នុងកាលៈទេសៈដែលមិនសូវមានអ្នកធ្វើដំណើរ។ ចំណែកវិស័យសណ្ឋាគារក៏ដូចគ្នា គួររៀបចំការបញ្ចុះតម្លៃបែបណាដែលអាចឱ្យខ្លួនរស់បាន ជាជាងគ្មានចំណូលសម្រាប់ទ្រទ្រង់អាជីវកម្មរបស់ខ្លួន។ ការជំរុញសកម្មភាពទេសចរណ៍ក្នុងស្រុកក៏ជាចំណុចដែលគួរធ្វើផងដែរក្នុងស្ថានការណ៍នេះ។ លោក ហ្វីលីព បន្ថែម។
ឆ្លើយតបទៅនឹងការស្នើសុំនេះ រដ្ឋមន្ត្រីស្ដីទី លោក ទិត ចន្ថា លើកឡើងថា ក្រសួងនឹងពិចារណា ក៏ដូចជាពិភាក្សាជាមួយស្ថាប័នពាក់ព័ន្ធ ដើម្បីយកជម្រើសមួយដែលល្អ និងអាចធ្វើបាន។ លោកថា ក្រសួងតែមួយមិនអាចសម្រេចកិច្ចការទាំងនេះបានទេ ព្រោះពាក់ព័ន្ធនឹងវិស័យច្រើនដូចជា ពន្ធដា អគ្គិសនី ផ្នែកធនាគារជាដើម ហើយលោកជឿថា វិស័យឯកជននឹងយល់ពីកិច្ចការទាំងនេះ។
ចំណែកអភិបាលខេត្តសៀមរាប លោក ទៀ សីហា ក៏គ្មានយោបល់អ្វីច្រើនទេចំពោះការស្នើសុំរបស់វិស័យឯកជន។ តែលោកសុំពេលដើម្បីពិភាក្សាជាមួយមន្ត្រីរបស់លោក ក្នុងការរកលទ្ធភាពបន្ធូបន្ថយផ្នែកពន្ធដា អគ្គិសនី និងការទម្លាក់ការប្រាក់ពីធនាគារជាដើមនេះ។ ឆ្លើយតបទៅនឹងការស្នើពីវិស័យឯកជនថាឱ្យជួយរៀបចំពិធីបុណ្យ និងព្រឹត្តិការណ៍ឱ្យកាន់តែច្រើនក្នុងកាលៈទេសៈនេះ ដើម្បីទប់ទល់ការធ្លាក់ភ្ញៀវ លោកអភិបាលខេត្តប្រាប់ថា កន្លងមកខេត្តបានរៀបចំច្រើនហើយ តែទទួលស្គាល់ថា វានៅមិនទាន់ឆ្លើយតបគ្រប់គ្រាន់ដល់ប្រតិបត្តិករទេសចរណ៍។
លោក ទិត ចន្ថា បានផ្តល់សារលើកទឹកចិត្តដល់ប្រតិបត្តិករទេសចរណ៍ទាំងអស់ កុំឱ្យមានការបាក់ទឹកចិត្តក្នុងពេលវេលានៃការកើតវីរុសកូរ៉ូណានេះ ព្រោះថានេះមិនមែនជាលើកទី១ទេដែលកម្ពុជាជួបវិបត្តិ។ លោក ចន្ថា បានផ្ដល់សារមួយឃ្លាយ៉ាងដូច្នេះថា «អង្គរឈរជាង១ពាន់ឆ្នាំ រង់ចាំអ្នកមកទស្សនា កុំភ័យកុំខ្លាចកូរ៉ូណា ២-៣ថ្ងៃទើបនឹងកើតទេ»។ មន្ត្រីក្រសួងទេសចរណ៍រូបនេះប្រាប់ថា កម្ពុជានៅតែស្វាគមន៍ភ្ញៀវទេសចរគ្រប់ជាតិសាសន៍ ហើយបច្ចុប្បន្នសកម្មភាពទេសចរណ៍នៅខេត្តសៀមរាបមានសភាពធម្មតា ហើយលោកជឿជាក់ថា ស្ថានការណ៍នឹងត្រឡប់រកសភាពដើមវិញឆាប់ៗ។ យ៉ាងណាលោកថា ក្រសួងនៅតែតាមដានស្ថានការណ៍នេះយ៉ាងយកចិត្តទុកដាក់ និងមានការត្រួតពិនិត្យយ៉ាងត្រឹមត្រូវលើទេសចរដែលបានចេញចូលប្រទេសកម្ពុជា៕