ជាតិ
សម្តេច ហ៊ុន សែន ស្នើឱ្យលើកយកបញ្ហាកូរ៉ូណាវីរុសទៅពិភាក្សាក្នុងកិច្ចប្រជុំអាស៊ាន និងថ្នាក់អន្តរជាតិ
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ស្នើឱ្យលើកយកបញ្ហាជំងឺរលាកសួតបង្កដោយវីរុសកូរ៉ូណាប្រភេទថ្មី (COVID-19) ដាក់ចូលទៅក្នុងកិច្ចប្រជុំអាស៊ាន-ចិន និងកិច្ចប្រជុំអន្តរជាតិផ្សេងៗ ដើម្បីរកដំណោះស្រាយទប់ស្កាត់ការរីករាលដាលនៃវីរុសនេះ។
សម្ដេច ហ៊ុន សែន បានបញ្ជាក់ថា បញ្ហាវីរុសកូរ៉ូណា (COVID-19) គឺជារឿងតូចតាចទេ ប៉ុន្តែរឿងដែលគួរឱ្យភ័យខ្លាចជាងវីរុសកូរ៉ូណានោះ «ការរើសអើង»តែម្ដង។ សម្រាប់សម្ដេច ហ៊ុន សែន ការរើសអើងចិន ព្រោះតែវីរុសកូរ៉ូណានេះ គឺជាបញ្ហាធ្ងន់ធ្ងរ ដែលនាំឱ្យខាតបង់ប្រយោជន៍រួម។ ត្រង់ចំណុចនេះ លោកនាយករដ្ឋមន្ត្រី ស្នើឱ្យពិភពលោកទប់ស្កាត់ និងបញ្ឈប់ការរើសអើងចិន។ សម្ដេច ក៏ចង់ឱ្យមានកិច្ចប្រជុំពិភាក្សាថ្នាក់តំបន់ និងអន្តរជាតិ ពីបញ្ហាវីរុសកូរ៉ូណានេះដែរ។
ថ្លែងក្នុងពិធីបើកការដ្ឋានស្ដារនិងសាងសង់ផ្លូវជាតិលេខ២ និងលេខ២២ ប្រវែងសរុបជាង ៧២គីឡូម៉ែត្រ កាលពីថ្ងៃទី១១ កុម្ភៈ ប្រមុខរដ្ឋាភិបាលកម្ពុជា បាននិយាយដូច្នេះថា៖«ព្រោះពេលនេះ វិធានការដែលប្រកាន់យកដោយប្រទេសខ្លះសម្រាប់បញ្ហានេះ វាមានផលប៉ះពាល់ជាមួយនឹងបញ្ហាដែលវានាំមកការរើសអើង និងការភ័យខ្លាច ដែលមិនគួរកើតមានទេ។ ក្នុងឋានៈជាសមាជិកមួយ នៃអង្គការតំបន់របស់អាស៊ាន ខ្ញុំគាំទ្រឱ្យមានការប្រជុំរដ្ឋមន្ត្រីការបរទេសអាស៊ាន-ចិន ពិភាក្សាលើបញ្ហាទប់ស្កាត់ការរីករាលសាក នៃជំងឺកូរ៉ូណាថ្មី ហើយខ្ញុំនឹងបន្តគាំទ្រនូវការប្រជុំកំពូលអាស៊ានចិនលើបញ្ហាទាក់ទងនឹងជំងឺនេះ ។ហើយប្រសិនបើមានវេទិកាអន្តរជាតិដទៃទៀត ខ្ញុំក៏គាំទ្រដើម្បីរកវិធានការឆ្លើយតប»។
សម្ដេច ហ៊ុន សែន បានសង្កត់ធ្ងន់ថា បញ្ហាវីរុសកូរ៉ូណា គឺជាបញ្ហាប្រឈមរបស់ពិភពលោកទាំងមូល ពោលគឺមិនមែនជាផលលំបាករបស់ចិនតែម្នាក់នោះទេ។ «មិនត្រូវយក(បញ្ហាវីរុសកូរ៉ូណា)ពេលនេះ ដើម្បីធ្វើឱ្យចិនឯកោ និងសម្លាប់ចិននោះទេ។ ចិនច្បាស់ជាមានសមត្ថភាព ដើម្បីដោះស្រាយបញ្ហានេះ។ នេះជាការលើកឡើងរបស់នាយករដ្ឋមន្ត្រីកម្ពុជា ដែលបានបន្ថែមថា អ្នកដែលរើសអើងចិន ព្រោះវីរុសកូរ៉ូណា កំពុងសម្លាប់សេដ្ឋកិច្ចខ្លួនឯង។ ក្នុងន័យនេះសម្ដេច ហ៊ុន សែន ចង់ដំដៅទៅលើទំហំពាណិជ្ជកម្ម ការផ្គត់ផ្គង់វត្ថុធាតុដើម និងភ្ញៀវទេសចរចិន ដែលបានចាក់បញ្ជូលថវិកាទៅសេដ្ឋកិច្ចប្រទេសជុំវិញពិភពលោក។
គិតត្រឹមម៉ោង៩ និង២០នាទី ព្រឹកថ្ងៃពុធ ទី១២ ខែកុម្ភៈនេះ អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ឡើងដល់នាក់១១១៥នាក់ហើយ ខណៈតួលេខអ្នកជំងឺកើនឡើងដល់ប្រមាណ៤៥ ០០០នាក់ នៅប្រទេសចំនួន២៥ ដោយភាគច្រើនបំផុតនៅចិន ជាពិសេសនៅក្រុងវូហានដែលជាកន្លែងផ្ទុះជំងឺ។ អ្នកជំងឺជាង៨០០០នាក់ ត្រូវបានរាយការណ៍ថា ស្ថិតក្នុងស្ថានភាពគ្រោះថ្នាក់ រីឯជិត៥០០០នាក់ បានសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។ នេះបើតាមទិន្នន័យ Tracking Coronavirus របស់ BNO News៕
Tag:
ហ៊ុន សែន
COVID-19
Coronavirus
© រក្សាសិទ្ធិដោយ thmeythmey.com