ជាតិ
ជប៉ុន ចង់ផ្ដល់ថវិកាដល់កម្ពុជា សម្រាប់ទិញរថយន្ត និងសម្ភារប្រើប្រាស់ នៅកិច្ចប្រជុំអាស៊ាន ឆ្នាំ២០២២
× ភ្នំពេញ៖ រដ្ឋាភិបាលជប៉ុន គ្រោងផ្ដល់ថវិកាខ្លះ ដល់កម្ពុជា ដើម្បីយកទៅទិញសម្ភារមួយចំនួន សម្រាប់ប្រើប្រាស់នៅក្នុងកិច្ចប្រជុំអាស៊ាន ឆ្នាំ២០២២ខាងមុខ ដែលកម្ពុជាធ្វើជាម្ចាស់ផ្ទះ។ លោក មីកាមី ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា បានប្រាប់សម្ដេច ហ៊ុន សែន នៅព្រឹកថ្ងៃទី១២ កុម្ភៈ។
ថ្លែងប្រាប់នាយករដ្ឋមន្ត្រីកម្ពុជា លោក មីកាមី ម៉ាសាហ៊ីរ៉ូ បាននិយាយថា ៖«(ជប៉ុន)កំពុងពិចារណារៀបចំដើម្បីធ្វើយ៉ាងណាជួយដល់កម្ពុជាក្នុងការរៀបចំកិច្ចប្រជុំអាស៊ី-អឺរ៉ុបនៅក្នុងឆ្នាំនេះ និងកិច្ចប្រជុំអាស៊ាននៅឆ្នាំ២០២២ខាងមុខ។ ហើយជប៉ុន ក៏កំពុងពិចារណាផ្ដល់ថវិកាជួយដល់កម្ពុជា ក្នុងការទិញរថយន្ត និងសម្ភារៈសម្រាប់ការប្រើប្រាស់ក្នុងការរៀបចំកិច្ចប្រជុំអាស៊ានក្នុងឆ្នាំ២០២២»។
ក្រៅពីនេះរដ្ឋាភិបាលជប៉ុន ក៏នឹងបន្តជួយវិស័យដោះមីន និងយុទ្ធភ័ណ្ឌមិនទាន់ផ្ទុះនៅកម្ពុជាផងដែរ។ បើតាមឯកអគ្គរាជទូតជប៉ុន រដ្ឋាភិបាលលោកកំពុងពិចារណាផ្ដល់ថវិកាបន្ថែមលើគម្រោងនេះទៀតផង។ នេះបើតាមហ្វេសប៊ុកនាយករដ្ឋមន្ត្រីកម្ពុជា ដែលបានស្រងសម្តីលោក មីកាមី ម៉ាសាហ៊ីរ៉ូ។
«ថ្លែងអំណរគុណ ជូនចំពោះរដ្ឋាភិបាល និងប្រជាជនជប៉ុន ដែលបានជួយដល់កម្ពុជា និងបន្តជួយដល់កម្ពុជាលើវិស័យដោះមីននិងគ្រាប់មិនទាន់ផ្ទុះ ក៏ដូចជារៀបចំជួយដល់កម្ពុជា ធ្វើយ៉ាងណាឲ្យកិច្ចប្រជុំអាស៊ី-អឺរ៉ុប និងកិច្ចប្រជុំអាស៊ាន នាពេលខាងមុខ ឱ្យទទួលបានជោគជ័យ»។ នេះជាការលើកឡើងរបស់នាយករដ្ឋមន្ត្រី ហ៊ុន សែន។
ប្រមុខរដ្ឋាភិបាលកម្ពុជា ក៏បានស្នើសុំឲ្យជប៉ុនបន្តជួយកម្ពុជា លើការពង្រឹងបទដ្ឋានគតិយុត្ត ក៏ដូចជាការត្រួតពិនិត្យលើសំណង់ទាំងឡាយ ដែលកំពុងសាងសង់នៅកម្ពុជា ដើម្បីឱ្យវិស័យនេះមានការរឹងមាំ៕
Tag:
ហ៊ុន សែន
ជប៉ុន
អាស៊ាន
© រក្សាសិទ្ធិដោយ thmeythmey.com