អន្តរជាតិ
រុស្ស៊ី៖ អ្នកយកករណីកូរ៉ូណាវីរុសទៅធ្វើ Prank ប្រឈមជាប់គុក៥ឆ្នាំ
× អាជ្ញាធររុស្ស៊ី កាលពីពេលថ្មីៗកន្លងមកនេះ បានចាប់ខ្លួនបុរសម្នាក់ដែលបានថតវីដេអូបោកបញ្ឆោត (Prank) តាមរយៈការធ្វើត្រាប់តាមករណីអ្នកមានរោគសញ្ញាកូរ៉ូណាវីរុស (COVID-19) ទៅធ្វើជារឿងកំប្លែងសើចលេង។ នេះបើតាមការផ្សាយរបស់ CNN។
រូបភាពវីដេអូ បានបង្ហាញពីបុរសម្នាក់ពាក់ម៉ាស់នៅរថភ្លើងក្រោមដីមួយក្នុងក្រុងមូស្គូ ហើយធ្វើជាដួលទៅលើកម្រាល ដើម្បីឲ្យគេជឿថា ខ្លួនកំពុងកើត COVID-19។ ករណីនេះ បានធ្វើឲ្យអ្នកដំណើរផ្សេងទៀតភ័យខ្លាច ហើយនាំគ្នារត់ចេញ។
បុរសរូបនោះដែលមានឈ្មោះថា Karomatullo Dzhaborov ជនជាតិតាហ្ស៊ីគីស្ថាន ត្រូវបានឃុំខ្លួនតាំងពីថ្ងៃទី៨ ខែកុម្ភៈ ហើយទង្វើរបស់គេ ប្រឈមជាប់ពន្ធនាគារអតិបរិមារយៈពេលដល់ទៅ៥ឆ្នាំ។ ជាមួយគ្នា ប៉ូលិសរុស្ស៊ី ក៏បានរកឃើញអ្នកជាប់ពាក់ព័ន្ធពីរនាក់ទៀតផងដែរ។
មេធាវីរបស់ Dzhaborov បានអះអាង កូនក្តីរបស់ខ្លួន ធ្វើវីដេអូក្នុងន័យអប់រំពី COVID-19 មិនមែនបង្ករចលាចលនោះឡើយ ហើយលោកសំណូមពរឲ្យពិនិត្យមើលវីដេអូនោះឲ្យចប់ចុងចប់ដើម។
រុស្ស៊ីរកឃើញមាន២ករណីនៃអ្នកកើត COVID-19 ដែលសុទ្ធតែជាជនជាតិចិន កាលពីថ្ងៃទី៣១ ខែមករា ដោយម្នាក់នៅក្រុង Tyumen Oblast និងម្នាក់ទៀតនៅ Zabaykalsky Krai។ នាថ្ងៃទី១២ ខែកុម្ភៈនេះ រុស្ស៊ីបានអះអាងថា អ្នកជំងឺបានសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យហើយ៕
© រក្សាសិទ្ធិដោយ thmeythmey.com