កីឡាអន្តរជាតិ
អន្តរជាតិ
ទោះបីបារម្ភពី COVID-19 តែការប្រណាំង F1 លើកដំបូងនៅវៀតណាម មិនលើកពេលឡើយ
× លោក Ross Brawn នាយកគ្រប់គ្រងកម្មវិធីប្រណាំងរថយន្ត Formula One នៅថ្ងៃទី១៣ ខែកុម្ភៈ អះអាងថាការប្រណាំងនៅទីលានប្រទេសវៀតណាម Vietnam Grand Prix ជាលើកដំបូងក្នុងប្រវត្តិសាស្ត្រនៅតែដំណើរការដដែលបើទោះមានការព្រួយបារម្ភខ្លាំងពីមេរោគរាលដាលនៃកូរ៉ូណាវីរុសប្រភេទថ្មី (COVID-19) ក៏ដោយ។ តាមការគ្រោងទុក Vietnam Grand Prix នឹងបើកការប្រកួតនៅថ្ងៃទី៥ ខែមេសា ឆ្នាំ២០២០។
ទីលានប្រណាំង F1 របស់វៀតណាម នឹងធ្វើឡើងនៅទីក្រុងហាណូយដែលមានចម្ងាយ១០០គីឡូម៉ែត្រពីព្រំដែនប្រទេសចិន ជាទីបង្កឲ្យមានមេរោគកូរ៉ូណាវីរុសប្រភេទថ្មីនេះផ្ទុះឡើង។
ស្របពេលសហព័ន្ធកីឡាប្រណាំងរថយន្ត (FIA) ដែលគ្រប់គ្រងការប្រណាំង F1 បានទទួលយកសំណើពីអ្នករៀបចំកម្មវិធីរបស់ភាគីចិនដើម្បីពន្យាពេលការប្រណាំងនៅទីលានសៀងហៃ Chinese Grand Prix ដែលនឹងប្រព្រឹត្តទៅនៅថ្ងៃទី១៩ ខែមេសានោះ លោក Brawn ថាការប្រណាំងនៅវៀតណាម នឹងមិនមានការលើកពេលនោះទេ។
«សម្រាប់វៀតណាមរាល់មតិប្រតិកម្មដែលយើងកំពុងទទួលបានគឺដូចជានៅចក្រភពអង់គ្លេសដែរ។ មានករណីខ្លះ ប៉ុន្តែមិនមានបញ្ហាណាមួយដែលគួរឲ្យព្រួយបារម្ភនោះទេ។ លោក Brawn ប្រធាន F1 បានប្រាប់ទីភ្នាក់ងារព័ត៌មាន Reuters ដូច្នេះ ហើយលោកបានបន្ថែមទៀតថា អ្វីៗគឺមានភាពល្អប្រសើរដែលធ្វើឲ្យកម្មវិធីប្រកួតអាចបន្តបានជាធម្មតា។
នៅថ្ងៃទី១៣ ខែកុម្ភៈ អាជ្ញាធរសុខាភិបាលវៀតណាមប្រកាសថាបានធ្វើវិធានចត្តាឡីស័កលើមនុស្សចំនួន១ ម៉ឺននាក់នៅក្នុងឃុំ Son loi នៃខេត្ត Vinh Phuc ប្រទេសវៀតណាម ដែលមានចម្ងាយជាង៤០គីឡូម៉ែត្រពីក្រុងហាណូយ ក្រោយរកឃើញករណីឆ្លងកូរ៉ូណាវីរុសប្រភេទថ្មី (COVID-19) ចំនួន៦នាក់នៅទីនោះ។ នេះជាដាក់ឲ្យនៅដាច់ដោយឡែកទ្រង់ទ្រាយធំលើកដំបូង នៅក្រៅប្រទេសចិន ចាប់តាំងពីជំងឺផ្លូវដង្ហើមបង្កដោយកូរ៉ូណាវីរុស បានផ្ទុះរីករាលដាលពីក្រុងវូហាន ភាគកណ្ដាលនៃប្រទេសចិន កាលពីចុងឆ្នាំ២០១៩។
អ្នកនាំពាក្យរបស់ F1 បញ្ជាក់ដែរថាលោក Brawn មិនបានដឹងអំពីការវិវឌ្ឍន៍ថ្មីនៃមេរោគកូរ៉ូណានៅវៀតណាមទេនៅពេលលោកអះអាងដូចខាងលើនេះ ប៉ុន្តែវៀតណាមនៅតែស្ថិតក្នុងកាលវិភាគប្រណាំងរបស់ខ្លួនរដូវកាលនេះដដែល។
គិតត្រឹម ព្រឹកថ្ងៃសុក្រ ទី១៤ ខែកុម្ភៈ នេះ អ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ឡើងដល់នាក់១៤៨៧នាក់ ហើយតួលេខនេះ កើនពីចំនួន១៣៧០នាក់ កាលពីថ្ងៃម្សិលមិញ៕
Tag:
Formula One
Vietnam Grand Prix
© រក្សាសិទ្ធិដោយ thmeythmey.com