កីឡាអន្តរជាតិ
អន្តរជាតិ
Man Utd ដាក់សមាជិកថ្មី Ighalo ឲ្យស្ថិតក្រោមចត្តាឡីស័ក ដ្បិតបារម្ភពី COVID-19
× Odion Ighalo ខ្សែប្រយុទ្ធចំណូលថ្មីរបស់ Manchester United កំពុងដាក់ឲ្យហ្វឹកហាត់ដាច់ដោយឡែកពីគេ (ចត្តាឡីស័ក) រយៈពេល១១ថ្ងៃមកហើយ បន្ទាប់ពីរូបគេទើបផ្លាស់ពីក្រុមនៅប្រទេសចិន។ បិសាចក្រហមធ្វើបែបនេះ ដើម្បីជាការប្រុងប្រយ័ត្ននៃការរីករាលដាលនៃមេរោគកូរ៉ូណាវីរុស (COVID-19)។
ខ្សែប្រយុទ្ធសញ្ជាតិនីហ្សេរីយ៉ាវ័យ ៣០ ឆ្នាំរូបនេះបានក្លាយជាសមាជិករបស់ក្រុម Man United ក្នុងលក្ខខណ្ឌខ្ចីជើងពីក្លិបនៃលីគកំពូលចិន Shanghai Shenhua រហូតដល់ចុងបញ្ចប់រដូវកាលនេះ។
ដោយបារម្ភពីការឆ្លងជំងឺរលាកសួតបង្កដោយមេរោគកូរ៉ូណារីរុសប្រភេទថ្មី COVID-19 ក្រុមដែលមានមូលដ្ឋានក្នុងក្រុង Manchester មួយនេះ បានសម្រេចឲ្យ Ighalo ហ្វឹកហាត់ដាច់ដោយឡែកពីគេបណ្តោះអាសន្ន ដោយសាររូបគេទើបផ្លាស់ពីចិន ដែលជាទីផ្ទុះឡើងនៃមេរោគដ៏កាចសាហាវ។
យ៉ាងណាក៏ដោយ បើតាមការផ្សាយរបស់ BBC Ighalo ដែលត្រូវដាក់ឲ្យហ្វឹកហាត់ដោយឡែកមែន ក៏ត្រូវអនុវត្តលក្ខខណ្ឌតឹងតែងថែមទៀត ព្រោះ Man Utd នឹងត្រៀមដាក់រូបគេនាជំនួបទល់ Chelsea ក្នុងការប្រកួតក្របខណ្ឌ Premier League ចុងសប្តាហ៍នេះ។
អតីតសមាជិកក្រុម Watford រូបនេះ ហ្វឹកហាត់តែម្នាក់ឯងនៅឯមជ្ឈមណ្ឌលជាតិតេក្វាន់ដូ ក្បែកីឡដ្ឋាន Etihad របស់ Manchester City និងជាកន្លែងដែលរូបគេបានស្នាក់នៅចាប់តាំងពីទៅដល់អង់គ្លេសកាលពី១១ថ្ងៃមុន។
Ighalo ជាសមាជិកទី២របស់អ្នកចាត់ការទូទៅលោក Ole Gunnar Solskjaer ដែលលោកនាំយកទៅកាន់ Old Trafford នាទីផ្សារដោះដូរកីឡាករខែមករា បន្ទាប់ពីទិញបានខ្សែបម្រើ Bruno Fernandes ពី Sporting Lisbon៕
Tag:
COVID-19
Manchester United
Odion Ighalo
© រក្សាសិទ្ធិដោយ thmeythmey.com